លោកស្រី អ៊ុងសាន ស៊ូជី ត្រូវបានផ្ទេរពីពន្ធនាគារទៅឃុំឃាំងនៅក្នុងផ្ទះរបស់រដ្ឋ

ប្រភពព័ត៌មានបានឱ្យដឹងថា លោកស្រី អ៊ុងសាន ស៊ូជី ត្រូវបានយោធាមីយ៉ាន់ម៉ាផ្ទេរពីពន្ធនាគារទៅឃុំឃាំងនៅផ្ទះរបស់រដ្ឋហើយ។ នេះបើយោងតាមមន្ត្រីរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ឱ្យដឹងនៅថ្ងៃទី២៨ ខែកក្កដានេះ។

លោកស្រី អ៊ុងសាន ស៊ូជី ត្រូវបានគេឃើញតែម្តងគត់ចាប់តាំងពីលោកស្រីត្រូវបានពួកយោធាឃុំខ្លួន បន្ទាប់ពីរដ្ឋប្រហារខែកុម្ភៈ ឆ្នាំ២០២១ តាមរយៈរូបថតនៅលើប្រព័ន្ធផ្សព្វផ្សាយរដ្ឋពីបន្ទប់សវនាការក្នុងទីក្រុងណៃពិដោរ។ ប្រភពដដែលនិយាយថា៖ “លោកស្រី អ៊ុងសាន ស៊ូជី ត្រូវបានផ្ទេរពីពន្ធនាគារទៅកាន់ផ្ទះជាន់ខ្ពស់ (VIP) របស់រដ្ឋមួយ កាលពីយប់ថ្ងៃចន្ទ” ។

មន្ត្រីដដែលបន្តថា លោកស្រី អ៊ុងសាន ស៊ូជី បានជួបជាមួយប្រធានសភាជាន់ទាបរបស់មីយ៉ាន់ម៉ា ហើយទំនងជានឹងបានជួបប្រេសិតពិសេសរបស់ចិនទទួលបន្ទុកកិច្ចការអាស៊ី ក្នុងអំឡុងពេលទស្សនកិច្ចប្រទេសមីយ៉ាន់ម៉ា។ អ្នកនាំពាក្យយោធាមីយ៉ាន់ម៉ាបាននិយាយថា ជំនួបពិភាក្សាមានរយៈពេលជាងមួយម៉ោង ប៉ុន្តែមិនបានផ្តល់ព័ត៌មានលម្អិតជុំវិញជំនួបពិភាក្សានោះទេ៕

ប្រែសម្រួល៖ គង់ សំអាន

ប្រភព៖ Mgronline

ចុចអាន៖ បាងកក បញ្ជាឲ្យអ្នកបើកបររកុំធ្វើដំណើរទៅតំបន់ចំនួន ២ ក្នុងក្រុង ខ្លាចផ្ទុះបាតុកម្ម