កីឡា

អតីតអ្នកលេងកែងឆេះ ឡឹក វិបុល ដាក់គោលដៅឡើងប្រកួតវិញមែន

បានផុស

៣ years មុន

នៅ

ថ្ងៃសៅរ៍ ២៩ កក្កដា ២០២៣

ដោយ

អតីតអ្នកប្រដាល់ជើងខ្លាំង ឡឹក វិបុល ពិតជាមានបំណងឡើងប្រកួតប្រដាល់គុនខ្មែរសាជាថ្មីមែនដោយបច្ចុប្បន្នកំពុងហ្វឹកហាត់ដើម្បីសម្រកទម្ងន់ឲ្យនៅសល់ត្រឹមប្រហែលជា៧០គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម៉ោងប្រមាណ១ថ្ងៃត្រង់ ទី២៩ ខែកក្កដានេះ លោក ឡឹក វិបុល បានបង្ហោះសារលើគណនី Facebook ថា ៖«ជួបគ្នាឆាប់ៗតាមប៉ុស្តិ៍ទូរទស្សន៍នាពេលខាងមុខ»។ កាលពីថ្ងៃទី២៨ ខែកក្កដា លោកក៏បានសរសេរថា ៖«ខ្ញុំហាត់សម្រកគីឡូបាន៥គីឡូហើយ។ ពីមុន៨០ឥឡូវនៅសល់៧៥គីឡូ ខ្ញុំព្យាយាមហាត់ឲ្យនៅសល់៧០ដើម្បីរកគីឡូចាស់ៗដូចគ្នាវ៉ៃជាមួយគ្នា។ កុំឲ្យថា ចាស់វ៉ៃមិនកើត បើវ៉ៃឃើញនៅល្អក្មេងក៏ខ្ញុំប្រកួតដែរ»។

ដើម្បីស្រាយបញ្ជាក់ជុំវិញបញ្ហានេះ «កម្ពុជាថ្មី»បានសួរដោយលោក ឡឹក វិបុល បានឆ្លើយថា ៖«បាទ ខ្ញុំហាត់សម្រកគីឡូបន្តិច ខ្ញុំនឹងឡើងប្រកួតជាមួយសេរីចាស់ៗដូចគ្នាពីរបីប្រកួតទៀត។ ឥឡូវខ្ញុំកំពុងហាត់ដែរ។ គីឡូខ្ញុំនៅធ្ងន់ ក្បាលពោះមិនទាន់ស្រកអស់ អីចឹង បើយើងឡើងវ៉ៃឥឡូវអត់ទាន់កើតទេ ខ្លាចហត់ ចាំស្រកបួនប្រាំគីឡូទៀតសិនទើបឡើងប្រកួត»។

សូមបញ្ជាក់ថា ឡឹក វិបុល ដែលជាអតីតកីឡាករនៅក្លិបប្រដាល់ពន្លឺសាមគ្គី ក្នុងខេត្តបាត់ដំបូងបានក្លាយជាជើងខ្លាំងកាលដើមទសវត្ស៍ឆ្នាំ២០០០។ លោកជាកីឡាករដែលពូកែ និងទាត់ ហើយធ្លាប់ឈ្នះខ្សែក្រវាត់ទាំង៣គឺខ្សែក្រវាត់ទម្ងន់៥៧.៦០គីឡូក្រាម ខ្សែកក្រវាត់ ABC ទម្ងន់៥៧គីឡូក្រាម និងខ្សែក្រវាត់ប៉ុស្តិ៍លេខ៥ទម្ងន់៦០គីឡូក្រាម។ ជាពិសេស លោកធ្លាប់មានកំណត់ត្រាឈ្នះការប្រកួត៣ឆ្នាំជាប់គ្នារហូតដល់សង្វៀនទូរទស្សន៍ប៉ុស្តិ៍លេខ៥ផ្តល់អាវមាសដើម្បីជាកិត្តិយស៕

អត្ថបទ៖ វីរបុត្រ