ភាគីសហជីពរកឃើញតួលេខចំនួនពីរសម្រាប់ដាក់ចរចាប្រាក់ឈ្នួលឆ្នាំ២០២៤

តំណាងសហជីពចំនួន១៧ស្ថាប័នដែលជាសមាជិកក្រុមប្រឹក្សាជាតិប្រាក់ឈ្នួលអប្បបរមាបានរកឃើញតួលេខចំនួនពីរ គឺ២១២ដុល្លារ និង២២០,២ដុល្លារសម្រាប់ធ្វើការចរចាប្រាក់ឈ្នួលឆ្នាំ២០២៤នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាដែលនឹងប្រព្រឹត្តិទៅនៅថ្ងៃទី២៨ ខែសីហា ឆ្នាំ២០២៣ខាងមុខ។

លោក អាត់ ធន់ ប្រធានសហភាពការងារកម្ពុជាបានមានប្រសាសន៍នៅរសៀលថ្ងៃទី២៣សីហានេះថា តួលេខចំនួនពីរនេះត្រូវបានតំណាងសហជីពទាំង១៧បានឯកភាពគ្នានៅក្នុងប្រកិច្ចជុំមួយកាលពីរសៀលថ្ងៃទី២១សីហា ដោយយោងទៅលើទិន្នន័យចំពោះលក្ខណៈវិនិច្ឆ័យទាំង៧ក្នុងនោះរួមមានការចំណាយក្នុងការរស់នៅ អត្រាអតិផរណាស្ថានភាពគ្រួសារ ផលិតភាព ភាពប្រកួតប្រជែងចំណែកទីផ្សារ និងកំរិតចំណេញថ្នាក់វិស័យ។

លោកបានបន្តថា ក្នុងចំណោមតំណាងសហជីព១៧ក្នុងនោះមានតំណាងសហជីពចំនួន១២បានគាំទ្រតួលេខដែលត្រូវដំឡើងចំនួន១២ដុល្លារ។ ចំណែតំណាងសហជីព៥ទៀតគាំទ្រតួលេខ២០,២ដុល្លារបន្ថែមពីប្រាក់ឈ្នួលអប្បបរមាដែលមានចំនួន២០០ដុល្លារក្នុង១ខែ។

លោក អ៊ឹម ចាន់សំណាង អនុប្រធានក្រុមប្រឹក្សាជាតិប្រាក់ឈ្នួល ភាគីសហជីបានឱ្យដឹងនៅក្នុងកំណត់ហេតុកិច្ចប្រជុំថាតំណាងភាគីសហជីពទាំងអស់បានចូលរួមពិភាក្សាយ៉ាងលម្អិត និងមានភាពចាស់ ដោយទទួលបាននូវការឯកភាពនូវតួលេខទាំង២ខាងលើ ដើម្បីត្រៀមដាក់ចរចានៅថ្ងៃទី២៨ ខែសីហា ឆ្នាំ២០២៣ខាងមុខនេះ។

គួរបញ្ជាក់ថា កាលពីទី១៦ ខែសីហា ឆ្នាំ២០២៣ ក្រុមប្រឹក្សាជាតិប្រាក់ឈ្នួលអប្បបរមាបានបើកកិច្ចប្រជុំអាណត្តិទី៣​លើកទី១ដើម្បីពិភាក្សាពីប្រាក់ឈ្នួលអប្បបរមាសម្រាប់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូបសម្រាប់ឆ្នាំ២០២៤។ ប៉ុន្តែភាគីទាំងបីរួមានភាគីរដ្ឋាភិបាល ភាគីនិយោជក និងភាគីសហជីពនៅមិនទាន់មានការដាក់តួលេខណាមួយនៅឡើយទេ។ ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣បានសម្រេចនឹងរៀបចំកិច្ចប្រជុំបន្ទាប់នៅព្រឹកថ្ងៃទី២៨ ខែសីហា, ថ្ងៃទី៤, ថ្ងៃទី១១, ថ្ងៃទី១៨, ថ្ងៃទី២៥ ខែកញ្ញា និងថ្ងៃទី២ ខែតុលា ឆ្នាំ២០២៣៕

អត្ថបទ៖ សំអឿន