ព័ត៌មានជាតិ

IMF ព្យាករណ៍សេដ្ឋកិច្ចកម្ពុជានឹងបន្តងើប ឡើងក្នុងអត្រា ៥,៣ ភាគរយក្នុងឆ្នាំ ២០២៣

បានផុស

៣ years មុន

នៅ

ថ្ងៃពុធ ១ វិច្ឆិកា ២០២៣

ដោយ

ប្រធានបេសកកម្មសម្រាប់កម្ពុជានៃមូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចកម្ពុជា បន្តងើបឡើង ក្នុងអត្រា ៥,៣ ភាគរយ នៅឆ្នាំ២០២៣ និង ៦ ភាគរយ នៅឆ្នាំ២០២៤។ ជាមួយនឹងអត្រាអតិផរណាបន្តមានកម្រិតទាប ប្រមាណ ២,៣ ភាគរយ ហើយប្រព័ន្ធធនាគារបន្តមានស្ថិរភាពជាមួយកំណើនឥណទានទាបជាងឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍បឋមរបស់ក្រុមបេសកកម្មមាត្រា IV របស់មូលនិធិរូបិយវត្ថុអន្តរជាតិបានឱ្យដឹងថា កំណើន នេះ ដោយសារការស្ទុះងើបឡើងវិញនៃវិស័យទេសចរណ៍ និងកំណើននៃការនាំចេញបន្ទះសូឡា និងគ្រឿងបន្គុំអគ្គិសនី ដែលជាកត្តាជំរុញកំណើនដ៏សំខាន់។ ចំពោះការនាំចេញសម្លៀកបំពាក់ នៅតែមានភាពទន់ខ្សោយ ដោយបង្ហាញសញ្ញា នៃការងើបឡើងវិញតិចតួច ក្នុងរយៈពេលចុងក្រោយនេះ។ ចំណែកវិស័យសំណង់វិញ បានបង្ហាញការងើបឡើងវិញយឺត យ៉ាវផងដែរ។

លោក Davide Furceri ប្រធានបេសកកម្មសម្រាប់កម្ពុជានៃមូលនិធិរូបិយវត្ថុអន្តរជាតិ (IMF) បានលើកឡើងថា សម្រាប់ទស្សនវិស័យ និងអនុសាសន៍ផ្នែកគោលនយោបាយម៉ាក្រូសេដ្ឋកិច្ច និងការកែទម្រង់រចនាសម្ព័ន្ធចាំបាច់នានា សំដៅបន្តរួមចំណែកគាំទ្រកំណើនសេដ្ឋកិច្ចប្រកបដោយចីរភាព។

ទន្ទឹមនឹងការវាយតម្លៃនេះ ក្រុមបេសកកម្មសម្រាប់កម្ពុជានៃមូលនិធិរូបិយវត្ថុអន្តរជាតិ (IMF) ក៏បានផ្ដល់អនុសាសន៍ ពាក់ព័ន្ធនឹងនយោបាយរូបិយវត្ថុ និងម៉ាក្រូហិរញ្ញវត្ថុ ដែលក្នុងនោះ ភាគច្រើនធនាគារជាតិនៃកម្ពុជា បាននិងកំពុងអនុវត្ត និងគ្រោងដាក់ចេញនាពេលខាងមុខដើម្បីបន្តគាំទ្រកំណើនសេដ្ឋកិច្ចនិងវឌ្ឍនភាពប្រព័ន្ធធនាគារ និងវិស័យហិរញ្ញវត្ថុ ប្រកបដោយស្ថិរភាព។ ការលើកឡើងរបស់ប្រធានបេសកកម្មសម្រាប់កម្ពុជានៃមូលនិធិរូបិយវត្ថុអន្តរជាតិ (IMF) នេះ នៅក្នុងជំនួបជាមួយលោកស្រី ជា សិរី ទេសាភិបាលធនាគារជាតិនៃកម្ពុជា។

លោកស្រី ជា សិរី បានសម្តែងការស្វាគមន៍ចំពោះការវាយតម្លៃទស្សនវិស័យក៏ដូចជាអនុសាសន៍របស់ក្រុមបេសកកម្ម សម្រាប់កម្ពុជានៃមូលនិធិរូបិយវត្ថុអន្តរជាតិ (IMF)។

លោកស្រីទេសាភិបាលនៃធនាគារជាតិ ក៏បានថ្លែងអំណរគុណចំពោះ IMF ដែលតែងផ្តល់ជំនួយបច្ចេកទេស និងការ បណ្តុះបណ្តាលនានា ដែលបានរួមចំណែកយ៉ាងសំខាន់ដល់ការអភិវឌ្ឍធនធានមនុស្ស និងប្រសិទ្ធភាពនៃការអនុវត្ត គោលនយោបាយរបស់ធនាគារជាតិនៃកម្ពុជា។

សូមបញ្ជាក់ថា លោក Davide Furceri ប្រធានបេសកកម្មសម្រាប់កម្ពុជានៃមូលនិធិរូបិយវត្ថុអន្តរជាតិ (IMF) បាន បំពេញបេសកកម្មពិគ្រោះយោបល់មាត្រាទី IV (Article IV Consultation) ប្រចាំឆ្នាំ២០២៣ នៅកម្ពុជាចាប់ពីថ្ងៃ ទី១៨-៣១ ខែតុលាកន្លងមកនេះ៕

អត្ថបទ៖ ផល ធារិត