ព័ត៌មានអន្ដរជាតិ

ហ្វីលីពីន ចោទ ចិន ថាបំពានចូលក្នុងដែនទឹកមានជម្លោះនៅសមុទ្រចិនខាងត្បូង

បានផុស

៣ years មុន

នៅ

ថ្ងៃសុក្រ ៣ វិច្ឆិកា ២០២៣

ដោយ

ក្រសួងការបរទេសហ្វីលីពីនកាលពីថ្ងៃព្រហស្បតិ៍បានចោទប្រកាន់ប្រទេសចិនថា បំពានចូលទៅក្នុងដែនទឹករបស់ខ្លួន បន្ទាប់ពីឧប្បត្តិហេតុពាក់ព័ន្ធនឹងនាវាយោធារបស់ប្រទេសទាំងពីរ នៅឯតំបន់មានជម្លោះក្នុងសមុទ្រចិនខាងត្បូងកាលពីដើមសប្តាហ៍នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានកិច្ចការបរទេសហ្វីលីពីន (DFA) បាននិយាយថា “ការអះអាងរបស់យោធាចិនពាក់ព័ន្ធនឹងកប៉ាល់យោធាហ្វីលីពីនដែលបានបើកចូលដោយខុសច្បាប់នៅដែនទឹកជិតតំបន់ថ្មប៉ប្រះទឹក Scarborough មិនមានមូលដ្ឋានផ្លូវច្បាប់នោះទេ ហើយវាគ្រាន់តែជាការញុះញង់បង្កើនភាពតានតឹងនៅក្នុងផ្លូវទឹកដែលមានជម្លោះប៉ុណ្ណោះ ប៉ុន្តែការពិតប្រទេសចិននោះទេ ដែលបំពានចូលមកក្នុងដែនទឹករបស់ហ្វីលីពីន” ។

DFA បានលើកឡើងថា តំបន់ថ្មប៉ប្រះទឹកដែលហ្វីលីពីនហៅថា “Bajo de Masinloc” ស្ថិតនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ហើយប្រទេសនេះមានសិទ្ធិអធិបតេយ្យភាព និងយុត្តាធិការលើតំបន់មួយនេះ ខណៈរដ្ឋាភិបាលទីក្រុងម៉ានីលក៏ទាមទារជាហូរហែមកហើយផងដែរ ឲ្យនាវាចិនចេញពីតំបន់ថ្មប៉ប្រះទឹក “Bajo de Masinloc” ជាបន្ទាន់ ។

តំបន់ថ្មប៉ប្រះទឹកដែលស្ថិតនៅចម្ងាយ ២០០ គីឡូម៉ែត្រពីប្រទេសហ្វីលីពីន គឺជាផ្នែកមួយដែលរដ្ឋាភិបាលទីក្រុងម៉ានីលដាក់ពាក្យបណ្ដឹងទាមទារទៅកាន់តុលាការអន្តរជាតិ ។ នៅឆ្នាំ ២០១៦ តុលាការបានចេញសេចក្ដីសម្រេចថា ៩០ ភាគរយនៃការទាមទារគ្រប់គ្រងតំបន់ថ្មប៉ប្រះទឹកនៅសមុទ្រចិនខាងត្បូងពីសំណាក់ទីក្រុងប៉េកាំង គឺមិនមានមូលដ្ឋាននៅក្រោមច្បាប់អន្តរជាតិនោះ ខណៈប្រទេសចិនក៏បានបដិសេធមិនទទួលស្គាល់សេចក្តីសម្រេចនេះផងដែរ ។

គួរបញ្ជាក់ថា ប្រទេសហ្វីលីពីន និងចិនសុទ្ធតែទាមទារការគ្រប់គ្រងលើតំបន់ថ្មប៉ប្រះទឹក Scarborough ប៉ុន្តែអធិបតេយ្យភាពជាក់លាក់ណាមួយមិនដែលត្រូវបានបង្កើតឡើងនោះទេ ហើយវានៅតែស្ថិតក្រោមការគ្រប់គ្រងរបស់រដ្ឋាភិបាលទីក្រុងប៉េកាំង ចាប់តាំងពីដណ្តើមបានតំបន់មួយនេះពីទីក្រុងម៉ានីលក្នុងឆ្នាំ ២០១២ ៕