មន្ត្រីជាន់ខ្ពស់អាមេរិក លាលែងតំណែង ព្រោះខឹងរដ្ឋបាលលោក បៃដិន ធ្វើគថ្លង់ ការសម្លាប់ប្រជាជនប៉ាឡេស្ទីន 

មន្ត្រីជាន់ខ្ពស់ម្នាក់នៃក្រសួងអប់រំអាមេរិក បានសម្រេចលាលែងពីតំណែង ព្រោះមិនពេញចិត្តនឹងគោលនយោបាយរបស់លោកប្រធានាធិបតី ចូ បៃដិន ដែលគាំទ្រប្រទេសអ៊ីស្រាអែល ដោយគាត់និយាយថា រដ្ឋបាលនេះធ្វើគថ្លង់ ចំពោះអំពើឃោរឃៅ ប្រឆាំងប្រជាជនប៉ាឡេស្ទីន ចាប់តាំងពីសង្គ្រាមនៅហ្គាហ្សាផ្ទុះឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីប្រឹក្សាគោលនយោបាយ Tariq Habash សុខចិត្តចោលតំណែងកាលពីថ្ងៃព្រហស្បតិ៍ទី៤ខែមករា ដោយគាត់បានពន្យល់នៅក្នុងលិខិតលាលែងនោះថា គាត់មិនអាចបន្តធ្វើការតំណាងឲ្យរដ្ឋបាលមួយ ដែលមិនឲ្យតម្លៃជីវិតមនុស្សទាំងអស់ស្មើគ្នាបានទៀតទេ។

លោកសរសេរថា “សកម្មភាពរបស់រដ្ឋបាល បៃដិន-ហារីស ធ្វើឲ្យជីវិតមនុស្សស្លូតត្រង់រាប់លាននាក់ស្ថិតក្នុងគ្រោះថ្នាក់ ជាពិសេសជនស៊ីវិលប៉ាឡេស្ទីនកំពុងរស់នៅក្នុងតំបន់ហ្គាហ្សាជាង ២.៣លាននាក់ ដែលស្ថិតក្រោមការវាយលុកជាបន្តបន្ទាប់ និងការបោសសម្អាតជនជាតិភាគតិចដោយរដ្ឋាភិបាលអ៊ីស្រាអែល។ ដូច្នេះ ខ្ញុំ​ត្រូវ​តែ​លាលែង​ពី​តំណែង ខ្ញុំមិនអាចនៅស្ងៀមបានឡើយ ដោយសាររដ្ឋបាលនេះ ធ្វើគថ្លង់ចំពោះឃោរឃៅដែលបានប្រព្រឹត្តលើជីវិតជនជាតិប៉ាឡេស្ទីនស្លូតត្រង់”។

មិនមែនតែលោក Habash ទេ ដែលមិនពេញចិត្តចំពោះគោលនយោបាយរបស់លោក ចូ បៃដិន។ កាលពីខែតុលា លោក Josh Paul ដែលជាមន្ត្រីបម្រើការនៅក្រសួងការបរទេស រយៈពេល១១ឆ្នាំ ក៏លាលែងពីតំណែងផងដែរ ជុំវិញរឿងរ៉ាវដូចគ្នានេះ។

លោក បៃដិន បានបង្ហាញការគាំទ្រយ៉ាងមុតមាំចំពោះអ៊ីស្រាអែល ក្នុងការសងសឹកក្រុមហាម៉ាស ដែលសម្លាប់មនុស្សប្រហែល១២០០នាក់ និងចាប់ជាង២៤០នាក់ ជាចំណាប់ខ្មាំងកាលពីខែតុលា។

ទោះបីជាយ៉ាងណាក៏ដោយ ប្រតិបត្តិការរយៈពេលប៉ុន្មានខែមកនេះ បានបណ្តាលឲ្យតំបន់ហ្គាហ្សាស្ទើរតែទាំងមូល ត្រូវខ្ទេច ហើយស្លាប់ប្រជាជនប៉ាឡេស្ទីនជាង២២០០០នាក់ និងច្រើនពាន់នាក់ទៀតរងរបួស។

ថ្វីបើក្រុមសិទ្ធិមនុស្សអន្តរជាតិនិងអង្គការសហប្រជាជាតិ បានព្រមានម្តងហើយម្តងទៀតអំពីគ្រោះមហន្តរាយមនុស្សធម៌នៅក្នុងតំបន់ហ្គាហ្សាក្តី ប៉ុន្តែទីក្រុងវ៉ាស៊ីនតោន មិនខ្វល់ទៅរិះគន់យុទ្ធនាការរបស់អ៊ីស្រាអែលឡើយ ហើយនៅតែបន្តគាំទ្រផ្នែកយោធាដដែល៕

ប្រែសម្រួល៖ Vann Vann

ប្រភព៖ RT

ចុចអាន៖ អ៊ីស្រាអែល ដាក់ចេញផែនការសង្គ្រាមដំណាក់កាលថ្មីនៅហ្គាហ្សា