មន្ត្រីជាន់ខ្ពស់អាមេរិក ទាមទារឲ្យ ណាតូ ដេញចោលសមាជិកណា ដែលចំណាយមិនគ្រប់ខ្ទង់

មន្ត្រីជាន់ខ្ពស់និងជាសមាជិកព្រឹទ្ធសភាអាមេរិកលោក Lindsey Graham បានស្នើឲ្យ ណាតូ បណ្តេញប្រទេសណាដែលមិនចំណាយតាមគោលដៅ ចេញពីអង្គការនេះចោលទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តីរបស់លោក ធ្វើឲ្យគេនឹកឃើញដល់ការព្រមានរបស់លោក ត្រាំ ដែលបង្កភាពចម្រូងចម្រាសខ្លាំងមែនទែន ពាក់ព័ន្ធនឹងរឿងរបស់អង្គការសន្ធិសញ្ញាអាត្លង់ទិកខាងជើង។

គោលការណ៍របស់អង្គការណាតូ តម្រូវឲ្យរដ្ឋជាសមាជិកចំណាយយ៉ាងតិច២% នៃ GDP របស់ពួកគេ ចំពោះកញ្ចប់វិស័យការពារ ប៉ុន្តែបច្ចុប្បន្នមានសមាជិកត្រឹម១៩ប៉ុណ្ណោះក្នុងចំណោម៣១ ដែលអាចបំពេញតាមលក្ខខណ្ឌនេះបាន។

ថ្លែងទៅកាន់ CBS News កាលពីថ្ងៃអាទិត្យទី១៨ខែកុម្ភៈ លោក Graham និយាយថា លោកយល់ស្របជាមួយលោក ត្រាំ ដែលអះអាងថា “ប្រទេសណាតូទាំងអស់​ គួរតែបង់ថ្លៃចំពោះការចំណាយ បើមិនដូច្នេះទេ ពួកគេមិនទទួលបានការការពារផ្នែកយោធាឡើយ”។

លោកបន្តថា “លោក ត្រាំ គិតត្រូវដែលចង់ឲ្យប្រទេសណាតូ បំពេញកាតព្វកិច្ចរបស់ពួកគេចំនួន២%។ យើងត្រូវប្រែក្លាយវាទៅជាកាតព្វកិច្ច ប្រសិនបើអ្នកមិនបង់ប្រាក់ទេ អ្នកនឹងត្រូវបណ្តេញចេញ។ ខ្ញុំ​ជា​អ្នក​គាំទ្រ​ដ៏​ធំ​ម្នាក់​របស់ ណាតូ ប៉ុន្តែនៅខ្វះលុយ៧០ទៅ៨០ពាន់លានដុល្លារទៀត។ ប្រសិន​បើ​អ្នក​នៅ​ក្នុង​អង្គការ ណាតូ សូម​បង់​ប្រាក់​ចំនួន ២%ទៅ”។

កាលពីសប្តាហ៍មុន អតីតប្រធានាធិបតិអាមេរិក ដូណាល់ ត្រាំ ប្រកាសថា គាត់នឹងមិនការពារប្រទេសណាតូណាមួយឡើយ ហើយលើកទឹកចិត្តរុស្ស៊ីឲ្យវាយប្រហារថែមទៀត លើសមាជិកណា ដែលមិនបំពេញតាមគោលដៅចំណាយ២% នៃ GDP របស់ពួកគេ។

ក្នុងឆ្នាំ២០១៤ សមាជិកសម្ព័ន្ធភាពមួយនេះ បានប្តេជ្ញាចំណាយយ៉ាងហោចណាស់ ២% នៃ GDP របស់ពួកគេជារៀងរាល់ឆ្នាំ លើវិស័យការពារជាតិ ប៉ុន្តែកាលពីឆ្នាំមុន សមាជិកភាគច្រើនមិនអាចបំពេញតាមគោលដៅបានឡើយ។

ក្នុងចំណោមនោះ មានប្រទេសធំ២ ដែលមិនអាចបំពេញតាមគោលការណ៍បាន នោះគឺជាបារាំង និងអាល្លឺម៉ង់ ដែលសុទ្ធជាប្រទេសមហាអំណាចសេដ្ឋកិច្ចទាំងពីររបស់សហភាពអឺរ៉ុប និងជាសមាជិកស្ថាបនិកនៃសម្ព័ន្ធភាពនេះទៀតផង។

សូមបញ្ជាក់ថា បើបូកបញ្ចូលគ្នាទៅ ប្រទេសចំនួន៣១របស់សម្ព័ន្ធភាពនេះ មានកញ្ចប់ថវិកាយោធារួមជាង១.១ពាន់ពាន់លានដុល្លារ, ទ័ពសកម្មជាង៣លាននាក់, ទ័ពបម្រុង២.៧លាននាក់ និងទ័ពប៉ារ៉ាជាង៧០០០០០នាក់៕

អត្ថបទ៖ សុខ សុវណ្ណ

ចុចអាន៖ តើសមាជិកណាតូណាខ្លះ មិនបំពេញតាមគោលដៅចំណាយ?