កីឡា

មកដឹងប្រវត្តិអ្នកចាំទី វីរៈ ដារ៉ា មុនលេចធ្លោនៅព្រះខ័នរាជស្វាយរៀង

បានផុស

១ year មុន

នៅ

ថ្ងៃពុធ ១៥ ឧសភា ២០២៤

ដោយ

ក្លិបបាល់ទាត់វិសាខាបានប្រកាសលាគ្នាជាមួយ អ្នកចាំទីឆ្នើម វីរៈ ដារ៉ា កាលពីចុងសប្តាហ៍កន្លងទៅនេះ បន្ទាប់ពីបានចូលរួមជាមួយក្លិបនេះកាលពីឆ្នាំ២០២២ ប៉ុន្តែនៅរដូវកាល២០២៣-២៤ត្រូវបានព្រះខ័នរាជស្វាយរៀងខ្ចីជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាកីឡាករខ្ចីជើង វីរៈ ដារ៉ា បានរួមចំណែកយ៉ាងសំខាន់ជួយឲ្យក្លិបព្រះខ័នរាជស្វាយរៀងឈ្នះពានរង្វាន់ធំ២ក្នុងមួយរដូវកាល ហើយនេះជាពានរង្វាន់ពានសម្តេចតេជោ ហ៊ុន សែន លើកទី២ និងពានរង្វាន់ខេមបូឌានព្រីមៀរលីគ លើកទី១សម្រាប់អ្នកចាំទីរូបនេះ។

បើក្រឡេកមើលប្រវត្តិកាលពីកុមារភាព កីឡាករវ័យ២០ឆ្នាំរូបនេះមិនបានចូលហ្វឹកហាត់នៅថ្នាលយុវជនស្តង់ដាណាមួយទេ ប៉ុន្តែសេចក្តីស្រឡាញ់ និងឆន្ទៈដ៏មុះមុតបានបើកផ្លូវឲ្យអ្នកចាំទីរូបនេះបោះជំហ៊ានទៅមុខយ៉ាងលឿនក្នុងរយៈពេល៣ប៉ុន្មានឆ្នាំចុងក្រោយ។

ចាប់ផ្តើមចេញពីការលេងបាល់ជាមួយមិត្តភក្តិ និងសាលារៀនកាលពីដើមឆ្នាំ២០១៤នៅស្រុកកំណើតខេត្តបាត់ដំបង វីរៈ ដារ៉ា មិនសូវទទួលបានការគាំទ្រខ្លាំងពីក្រុមគ្រួសារទេដោយសារពួកគាត់ចង់ឲ្យកូនប្រុសផ្តោតលើការសិក្សា។ ទោះបីជាយ៉ាងណា ក្តីស្រឡាញ់ និងឆន្ទៈយ៉ាងមុតមាំចំពោះកីឡាបាល់ទាត់គ្មាននរណាម្នាក់អាចហាមឃាត់រូបគេបានទេ។

ទីបំផុត រូបគេទទួលបានឱកាសលេងបាល់ និងហ្វឹកហាត់កាន់តែច្រើន។ នៅចុងឆ្នាំ២០១៥ រូបគេបានមកហ្វឹកជាមួយបាល់ទាត់ស្តង់ដានៅស្តាតចាស់ ប៉ុន្តែដោយសារជីវភាពមុនសូវអំណោយផល រូបគេបានវិលត្រឡប់ទៅស្រុកកំណើតវិញមួយរយៈពេលមុនពេលត្រឡប់មកវិញនៅឆ្នាំ២០១៩។

នៅឆ្នាំ២០០២០ វីរៈ ដារ៉ា បានចូលរួមជាមួយក្លិបបាល់ទាត់ព្រៃវែង ជាពេលបានឈ្នះជើងឯកពានរង្វាន់សម្តេចតេជោ ហ៊ុន សែន លើកទី១៤ ថ្នាក់ខេត្ត និងបានឈ្នះពានរង្វាន់អ្នកចាំទីឆ្នើមថ្នាក់ខេត្ត។ មិនត្រឹមតែប៉ុណ្ណោះរូបគេបានរួមចំណែកយ៉ាងសំខាន់ឲ្យក្លិបបានឡើងដល់វគ្គពាក់កណ្តាលផ្តាច់ព្រ័ត្រថ្នាក់ជាតិ។ រូបគេត្រូវបានគេចាប់អារម្មណ៍ខ្លាំងក្នុងការប្រកួតវគ្គពាក់កណ្តាលផ្តាច់ព្រ័ត្រពានរង្វាន់សម្តេចតេជោ ហ៊ុន សែន កាលពីឆ្នាំ២០២០។ ពេលនោះ រូបគេបានបានសង្គ្រោះបាល់ពីការទាត់ប៉េណាល់ទីរបស់ កែវ សុខផេង ក្នុងលទ្ធផល ៨-៩ ដែល វិសាខា បានឡើងវគ្គផ្តាច់ព្រ័ត្រពានរង្វាន់សម្តេចតេជោជាលើកដំបូង។ ទោះបីជារូបគេមិនបានជួយក្រុមព្រៃវែងឲ្យបានឡើងវគ្គផ្តាច់ព្រ័ត្រ ប៉ុន្តែរូបគេបានជាប់ឈ្មោះជាកីឡាករល្អប្រចាំការប្រកួត។

ការបង្ហាញខ្លួនយ៉ាងល្អឲ្យក្រុមខេត្តព្រៃវែងក្នុងពានរង្វាន់សម្តេចតេជោ ហ៊ុន សែន រហូតដល់ឆ្នាំ២០២២ វីរៈ ដារ៉ា ត្រូវបានវិសាខានាំចូលជាផ្លូវការ។ សម្រាប់រដូវកាលដំបូងជាមួយវិសាខា រូបគេបានឈ្នះជើងឯកពានរង្វាន់សម្តេចតេជោ ហ៊ុន សែន នៅឆ្នាំ២០២២។

ស្របពេលវិសាខាមានអ្នកចាំទីល្អៗ ព្រះខ័នរាជស្វាយរៀងក៏បានខ្ចីជើងរូបគេនៅរដូវកាល២០២៣-២៣។ ក្នុងនាមជាអ្នកចាំទីខ្ចីជើង វីរៈ ដារ៉ា ពិតជាធ្វើបានល្អមែនទែនដោយមួយរដូវកាលពេញ។ រូបគេបង្ហាញខ្លួនស្ទើរគ្រប់ការប្រកួត ហើយបានឈ្នះពានរង្វាន់ធំ២ក្នុង១រដូវកាលគឺពានសម្តេចតេជោ ហ៊ុន សែន លើកទី១៧ និងពានរង្វាន់ខេមបូឌានព្រីមៀរលីគ២០២៣-២៤។ រូបគេបានឈ្នះពានរង្វាន់អ្នកចាំទីឆ្នើមក្នុងពានរង្វាន់សម្តេចតេជោ និងប្រហែលជាឈ្នះពានរង្វាន់អ្នកចាំទីឆ្នើមប្រចាំលីគថែមទៀត។

បន្ទាប់ពីរដូវកាលនេះបានបញ្ចប់ទៅ វិសាខា បានប្រកាសលាគ្នាជាផ្លូវការជាមួយ វីរៈ ដារ៉ា ដូច្នេះរូបគេនឹងក្លាយជាកីឡាកររបស់ក្លិបព្រះខ័នរាជស្វាយរៀងនៅពេលក្លិបប្រកាសជាផ្លូវការ។

ក្រៅពីលេចធ្លោនៅក្លិប អ្នកចាំទី វីរៈ ដារ៉ា ត្រូវបានកោះហៅចូលរួមជាមួយក្រុមបាល់ទាត់ជម្រើសជាតិកម្ពុជាអាយុក្រោម១៩ឆ្នាំ ជាប់ក្នុងក្រុមអាយុ២០ឆ្នាំ និងជាប់ក្នុងក្រុមអាយុ២៣ឆ្នាំសម្រាប់កីឡាស៊ីហ្គេម កីឡា AFF U23 ព្រមទាំងជាប់ក្នុងក្រុមធំថែមទៀត៕