S&P៖ វិស័យ​ផលិតកម្ម​អាស៊ាន​មានកំណើនតិច​ក្នុង​ខែ​សីហា​

ស្ថាប័នវាយតម្លៃហិរញ្ញវត្ថុអន្តរជាតិ S&P Global បានឱ្យដឹង​ថា វិស័យផលិតកម្មនៅក្នុងតំបន់​អាស៊ាន​មានភាពប្រសើរឡើងតិចតួច​នៅក្នុងខែសីហា ដោយសារតែតម្រូវការធ្លាក់ចុះ ដែលជះឥទ្ធិពលពីការថមថយនៃកំណើនសេដ្ឋកិច្ចក្នុងតំបន់ និងសកល។

បើយោងតាម​ S&P Global បានឱ្យដឹងនៅថ្ងៃទី៧ខែកញ្ញានេះថា ទោះជាយ៉ាងណាក៏ដោយ កំណើនបានធ្លាក់ចុះបន្តិចក្នុងខែនេះ ដោយសារការពង្រីកនៃការផលិតកាន់តែខ្សោយ ខណៈការបញ្ជាទិញថ្មីត្រូវបានគេកត់ត្រាថាងើបឡើងបន្តិច ​បន្ទាប់ពីការធ្លាក់ចុះបានអូសបន្លាយ​ជាបន្តបន្ទាប់​។ ជាមួយគ្នានេះដែរ​ លំហូរការងារនៅក្នុងវិស័យនេះក៏ធ្លាក់ចុះផងដែរ។

​​ដំណើរការធ្លាក់ចុះបន្តិចនៃវិស័យផលិតកម្ម​ដោយសារសម្ពាធអតិផរណា​។ ទាំងការចំណាយថ្លៃដើម និងតម្លៃលក់បានកើនឡើងក្នុងអត្រាខ្សោយក្នុងខែសីហា ​។

​បើយោងតាម​សន្ទស្សថ្លៃផលិតកម្មរបស់អាស៊ាន  ​ S&P បានបង្ហាញថា​វាបានធ្លាក់ចុះពីអត្រា ៥១,៦ ក្នុងខែកក្កដា ដល់កម្រិតទាបរយៈពេល ៤ខែមកនេះ ដែលអត្រានេះបានធ្លាក់ចុះមកកម្រិត​ ៥១,១​ នៅក្នុងខែសីហា។

​បណ្តាអ្នកផលិតទំនិញនៅអាស៊ានបានរាយការណ៍ពីភាពប្រសើរឡើងខ្លះៗក្នុងរយៈពេល៨ខែ ជាប់ៗគ្នា​។ តម្រូវការនៅក្នុងតំបន់អាស៊ានត្រូវបានជំរុញយ៉ាងខ្លាំងដោយទីផ្សារក្នុងស្រុក ដោយសារការលក់ទៅឱ្យអតិថិជនបរទេសបានបន្តធ្លាក់ចុះនៅក្នុងខែសីហា។ ​

ការចេញផ្សាយរបស់ S&P Global បានឱ្យដឹងថា បណ្តាអ្នកផលិតក៏បានកត់សម្គាល់ផងដែរនូវការកើនឡើងក្នុងរយៈពេល៦យខែជាប់ៗគ្នា ​។ ​ក្រុមហ៊ុនទាំងនោះនៅតែមានទំនុកចិត្តទាក់ទងនឹងកំណើនផលិតផលនៅឆ្នាំខាងមុខ​ ​។

លោក Stephen Higgins សហនាយកគ្រប់គ្រងនៃក្រុមហ៊ុន Mekong Strategy បានលើកឡើងកាលពីពេលថ្មីៗនេះថា សេដ្ឋកិច្ចរបស់ប្រទេសកម្ពុជាបានផ្តើមថមថយកំណើនចាប់តាំងប៉ុន្មានឆ្នាំមុន ហើយកំណើនយឺតនៅតែបន្តនៅឆមាសទី១ឆ្នាំ២០២៤នេះ ដែលកើនតិចជាងការរំពឹងទុកដោយសារតែស្ថានភាពសេដ្ឋកិច្ចទាំងក្នុងតំបន់និងសកលហាក់មានសភាពមិនប្រាកដប្រជានៅឡើយ។

​«ខ្ញុំគិតថាកំណើនសេដ្ឋកិច្ចកម្ពុជាធ្លាក់ចុះខ្លាំង​ នៅក្នុងឆមាសទី១ឆ្នាំ២០២៤នេះ ហើយយើងរំពឹងថានឹងមានកំណើនតិចតួចនៅក្នុងឆមាសទីឆ្នាំនេះ»។ នេះបើយោងតាមលោក Stephen។

លោកបានគូសបញាក់កំណើននេះត្រូវបានគាំទ្រដោយ​​កំណើនខ្ពស់នៃការនាំចេញ ដែលក្នុងនោះគឺការនាំចេញសម្លៀកបំពាក់កាត់ដេរ និងវាយនភ័ណ្ឌដោយកើនឡើងជាង ២២% នៅឆ្នាំ ២០២៣ ​។ ខណៈពេលដែល​ផលិតផលក្នុងស្រុកសរុបក៏បានចូលរួមបំពេញតម្រូវការក្នុងស្រុកផងដែរ។

ជាមួយគ្នានេះដែរ ក្រសួងសេដ្ឋកិច្ចនិងហិរញ្ញវត្ថុកាលពីពាក់កណ្តាលខែសីហា​ តាមរយៈសកម្មភាពសេដ្ឋកិច្​ចក្នុងរយៈពេល ៦ ខែ ដើមឆ្នាំ ២០២៤ នេះ, សេដ្ឋកិច្ចកម្ពុជា ត្រូវបានវាយតម្លៃថាអាចនឹងសម្រេចបានក្នុង អត្រាកំណើន ៦% ក្នុងឆ្នាំ ២០២៤ ជាមួយនឹងអត្រាអតិផរណាប្រមាណ ២.៧១%៕