ភ្លៀងធ្លាក់ខ្លាំង​​លិចផ្ទះរាប់សិបខ្នង ខណៈ​ទឹកគួច​ក្មេងស្រី​៥ឆ្នាំម្នាក់​នៅ​​បូលីវី​

ភ្លៀងធ្លាក់ខ្លាំង​​ដែល​បង្ក​ឲ្យ​មាន​បំណាក់​ដី​​ដ៏ខ្លាំង​​និង​ជន់​លិច​ផ្ទះ​រាប់​សិបខ្នង​ បន្ទាប់ពីគ្រោះរាំងស្ងួតអូសបន្លាយ​យ៉ាង​យូរ​ក្នុងទីក្រុង La Paz រដ្ឋធានីនៃប្រទេសបូលីវី បាន​ឆក់យកជីវិតក្មេងស្រីម្នាក់កួច​ទៅតាមទឹក និង​ការ​ជម្លៀសចេញ​នៃ​ប្រជាជន​រាប់​សិបគ្រួសារ​ ខណៈផ្នែកខ្លះនៃទីក្រុងដោយគ្មានអគ្គិសនីប្រើប្រាស់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី២៥ខែវិច្ឆិកានេះ។

ភ្លៀងធ្លាក់ខ្លាំងកាលពីថ្ងៃសៅរ៍បានបណ្តាលឱ្យទន្លេមួយ​ពេញ​ប្រៀប និង​ហូរហៀរចេញពីច្រាំងទន្លេបញ្ចេញភក់ហូរចូលទីក្រុង La Paz ភាគនិរតីដែលជាកន្លែងលំនៅឋាន​ជាច្រើនសង់ឡើងទាបៗនៅលើភ្នំ។

លោក Juan Carlos Calvimontes អនុរដ្ឋមន្ត្រីការពារជាតិបូលីវី បាននិយាយថា ទឹកហូរលាយថ្ម និងដីបានហូរចុះជ្រោះតូចចង្អៀតតាម​ជ្រលងមួយកាលពីព្រឹកថ្ងៃអាទិត្យ ដោយបានបំផ្លាញផ្ទះរាប់សិបខ្នង និងជន់លិច៤០​ខ្នងទៀត។

ជាមួយគ្នានេះប៉ុន្មានម៉ោងបន្ទាប់ពីភ្លៀងធ្លាក់មក ក្រុមអ្នកជួយសង្គ្រោះនៅតែស្វែងរកក្មេងស្រីអាយុ៥ឆ្នាំម្នាក់ដែលបាត់ខ្លួននៅក្នុងសង្កាត់ Bajo Llojeta ដោយសារតែភក់នាំយកទៅ។ បុគ្គលិកសង្គ្រោះបន្ទាន់ក៏ជួយសង្គ្រោះមនុស្សចំនួនប្រាំមួយនាក់ផងដែរដែលបានកប់ក្នុងភក់។

អភិបាលក្រុង La Paz លោក Iván Arias បានស្តីបន្ទោសដោយផ្ទាល់ចំពោះការសាងសង់ផ្ទះក្រីក្រដែលសង់នៅលើភ្នំដោយគ្មានការអនុញ្ញាត។ ជាមួយគ្នានេះនៅក្នុងដំណើរទស្សនកិច្ចទៅកាន់កន្លែងនោះ លោកប្រធានាធិបតី Luis Arce បានប្រគល់ជំនួយដល់ជនរងគ្រោះដោយទឹកជំនន់ និងបានប្តេជ្ញាថានឹងរកអ្នកមនុស្សទទួលខុសត្រូវចំពោះសំណង់ខុសច្បាប់ ដែលធ្វើឲ្យការខូចខាតកាន់តែធ្ងន់ធ្ងរ។

គួរបញ្ជាក់ថា ទីក្រុង La Paz ស្ថិតនៅក្នុងជ្រលងភ្នំដែលហ៊ុំព័ទ្ធដោយភ្នំខ្ពស់ ជាពិសេសងាយនឹងទឹកជំនន់ និងការរអិលបាក់ដី ខណៈរដូវវស្សារបស់ប្រទេសបូលីវីនេះទើបតែចាប់ផ្តើម បន្ទាប់ពីប្រទេសនេះបានទទួលរងនូវគ្រោះរាំងស្ងួតធ្ងន់ធ្ងរបំផុតមួយមិនធ្លាប់មាននាពេឡថ្មីៗនេះ៕

អត្ថបទ៖ ប៊ុន សុភាព