ព័ត៌មានជាតិ

ជនសង្ស័យ៤នាក់ប្រើប្រាស់ថ្នាំញៀន ថែមទាំងយកកាំបិតដេញគេ ត្រូវសមត្ថកិច្ចឃាត់ខ្លួន

បានផុស

៥ years មុន

នៅ

ថ្ងៃសៅរ៍ ១៣ មីនា ២០២១

ដោយ

បន្ទាយមានជ័យ ៖ ជនសង្ស័យ៤នាក់ ប្រើប្រាស់ថ្នាំញៀន ថែមទាំងយកកាំបិត ដេញកាប់គេឯង ត្រូវកម្លាំងអាវុធហត្ថ១ក្រុម ដឹកនាំដោយលោក វរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ចុះបង្ក្រាបបាននៅវេលាម៉ោង២រសៀល ថ្ងៃទី១៣ ខែ មីនា ឆ្នាំ២០២១ ចំណុចនៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសមត្ថកិច្ច បានបញ្ជាក់ឲ្យដឹងបន្តទៀតថា មុនពេលកើតហេតុនោះមានជនសង្ស័យចំនួន២នាក់ ១ឈ្មោះវ៉ា សុខលាភ ភេទប្រុស អាយុ១៩ឆ្នាំ មុខរបររើសអេតចាយ ២ឈ្មោះ ប៊ុន មេសា ហៅ យ៉ុង ភេទប្រុស អាយុ២១ឆ្នាំអ្នកទាំងពីររស់នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានកម្លាំងអាវុធហត្ថឃាត់ខ្លួននៅពេលដែលកម្លាំងអាវុធហត្ថចុះល្បាតការពារសន្តិសុខក្នុងភូមិសាស្ត្រក្រុង ហើយបានឃើញជនសង្ស័យម្នាក់កាន់ពូថៅ និងម្នាក់ទៀតកាន់ដែកស្រួចរាងដូចកាំបិត។

ចំណែកជនសង្ស័យ២នាក់ទៀត១មានឈ្មោះសឹង្ហ វណ្ណៈ ភេទប្រុស អាយុ២១ឆ្នាំ រស់នៅភូមិសាមគ្គីមានជ័យ ត្រូវបានកម្លាំងអាវុធហត្ថក្រុងឃាត់ខ្លួនតាមពាក្យបណ្ដឹងរបស់ដើមបណ្ដឹងឈ្មោះ ធា ឆាត ភេទប្រុស អាយុ៣៥ឆ្នាំ ក្នុងករណីជនសង្ស័យយកកាំបិតដេញកាប់រូបគាត់បណ្ដាលឲ្យរងរបួសចំកស្រាល និង របួសកំភួនដៃធ្ងន់ ចំណែកជនសង្ស័យម្នាក់ទៀតឈ្មោះ ឡេង មន្នីលាភ ភេទប្រុស អាយុ២១ឆ្នាំរស់នៅភូមិសាមគ្គីមានជ័យ ដឹកជញ្ជូនអាវុធដោយគ្មានការអនុញ្ញាត។ ជនសង្ស័យទាំង៤នាក់ ត្រូវបានកម្លាំងការិយាល័យព្រហ្មទណ្ឌអាវុធហត្ថខេត្ត បញ្ជូនទៅសាលាដំបូងខេត្តចាត់ការតាមនីតិវិធីច្បាប់ភ្លាមៗផងដែរ៕

ដោយ ៖ វ៉ាន់ណាង