ព័ត៌មានអន្ដរជាតិ

វៀតណាមកំណត់គោលដៅ GDP សម្រាប់មនុស្សម្នាក់ ៤ ៩០០ ដុល្លារ នៅឆ្នាំ ២០២៥

បានផុស

២ years មុន

នៅ

ថ្ងៃអង្គារ ១០ ធ្នូ ២០២៤

ដោយ

វៀតណាមបានកំណត់គោលដៅផលិតផលក្នុងស្រុកសរុប (GDP) សម្រាប់មនុស្សម្នាក់ ចំនួន ៤ ៩០០ ដុល្លារអាមេរិក នៅឆ្នាំក្រោយ ដែលជាគោលដៅមួយក្នុងចំណោមគោលដៅសំខាន់ៗចំនួន ១៥ ដែលត្រូវបានដាក់ចេញក្នុងសេចក្ដីសម្រេចទទួលបានការអនុម័តពីរដ្ឋសភា។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលដៅនេះ ឆ្លុះបញ្ចាំងពីការប្តេជ្ញាចិត្តរបស់វៀតណាម ក្នុងការពន្លឿនកំណើនសេដ្ឋកិច្ច និងការដោះស្រាយបញ្ហាប្រឈមជាប្រព័ន្ធ ដើម្បីសម្រេចបាននូវគោលបំណងនៃផែនការអភិវឌ្ឍន៍សេដ្ឋកិច្ចសង្គមឆ្នាំ ២០២១-២០២៥ របស់ខ្លួន។ បើតាមធនាគារពិភពលោក GDP សម្រាប់មនុស្សម្នាក់របស់វៀតណាម មានចំនួនជិត ២ ៥០០ ដុល្លារអាមេរិក នៅឆ្នាំ ២០២៣។

គោលបំណងសំខាន់សម្រាប់ឆ្នាំ ២០២៥ គឺការជំរុញកំណើនសេដ្ឋកិច្ច ខណៈធានាបាននូវស្ថិរភាពម៉ាក្រូសេដ្ឋកិច្ច គ្រប់គ្រងអតិផរណា និងរក្សាតុល្យភាពក្នុងចំណោមសមាសធាតុសេដ្ឋកិច្ចសំខាន់ៗ។ រដ្ឋាភិបាលវៀតណាម ក៏កំពុងផ្តល់អាទិភាពដល់កំណែទម្រង់ក្នុងក្របខណ្ឌស្ថាប័ន ដោះស្រាយការរាំងស្ទះផ្លូវច្បាប់ និងនីតិវិធី និងជំរុញនវានុវត្តន៍ដើម្បីបង្កើតរបកគំហើញក្នុងការអភិវឌ្ឍផងដែរ។

វិធានការទាំងនេះ ត្រូវបានរៀបចំឡើងដើម្បីពង្រឹងមូលដ្ឋានគ្រឹះសេដ្ឋកិច្ចរបស់វៀតណាម និងគាំទ្រដល់វឌ្ឍនភាពប្រកបដោយនិរន្តរភាព ក្នុងការប្រឈមមុខនឹងបញ្ហាប្រឈមសកល និងក្នុងតំបន់។ ក្នុងចំណោមគោលដៅឆ្នាំ ២០២៥ វៀតណាមមានបំណងធ្វើឱ្យ GDP របស់ខ្លួនកើនឡើងចន្លោះពី ៦,៥-៧,០ ភាគរយ ជាមួយនឹងគោលដៅប្រាថ្នាកាន់តែធំជាងនេះ ចន្លោះពី ៧,០-៧,៥ ភាគរយ។

គេមើលឃើញថា របៀបវារៈឆ្នាំ ២០២៥ ឆ្លុះបញ្ជាំងពីមហិច្ឆិតារបស់វៀតណាមក្នុងការពង្រឹងសមត្ថភាពប្រកួតប្រជែងរបស់ខ្លួន ខណៈជំរុញកំណើនប្រកបដោយសមធម៌។ តាមរយៈការដោះស្រាយបញ្ហាប្រឈមជារចនាសម្ព័ន្ធ និងឥទ្ធិពលសមាហរណកម្មតំបន់ និងសកលលោក វៀតណាមមានគោលបំណងធានានូវជំហររបស់ខ្លួនជាសេដ្ឋកិច្ចដ៏សំខាន់មួយនៅអាស៊ីអាគ្នេយ៍៕

Related Topics:វៀតណាម សេដ្ឋកិច្ចវៀតណាម

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា