បង្ក្រាបហាងខារ៉ាអូខេ «ម្លប់ស្នេហ៍» ឃាត់ខ្លួនមនុស្សប្រុសស្រី ៣៨នាក់ សង្ស័យបង្កប់សេវាផ្លូវភេទ

កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជនសហការជាមួយកម្លាំងសម្ថកិច្ចខណ្ឌសែនសុខ ធ្វើការឆ្មក់បង្ក្រាបហាងខារ៉ាអូខេមួយកន្លែងស្លាកយីហោ «ម្លប់ស្នេហ៍» ដែលសង្ស័យបង្កប់សេវាជួញដូរផ្លូវភេទ ឃាត់ខ្លួនមនុស្សប្រុសស្រី៣៨នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះបានធ្វេីឡេីងកាលពីវេលាម៉ោង ៩យប់ថ្ងៃទី២៥ ខែមករា ឆ្នាំ២០២៥ ស្ថិតតាមបណ្ដោយផ្លូវ ឧកញ៉ាឌីប៉ុក (ផ្លូវ ឱកាសខ្ញុំ ) សង្កាត់ឃ្មួញ ខណ្ឌសែនសុខ រាជធានីភ្នំពេញ។

មន្ត្រីនៃនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ បានអោយដឹងថា កម្លាំងជំនាញបានទទួលការរាយការណ៍ពីប្រជាពលរដ្ឋថា មានទីតាំងហាងខារ៉ាអូខេយីហោ «ម្លប់ស្នេហ៍» នៅតាមបណ្តោយផ្លូវ ឪកាសខ្ងុំ មានលួចលាក់បង្កប់សេវាផ្លូវភេទ និងមាននារីមួយចំនួនមិនទាន់គ្រប់អាយុបានមកកាន់កន្លែងនេះ ដើម្បីបម្រើសេវាទៅកាន់ភ្ញៀវ។

បន្ទាប់ពីទទួលបានការរាយការណ៍ពីប្រជាពលរដ្ឋ កម្លាំងនាយកដ្ឋានប្រឆាំងបទល្មើលជួញដូរមនុស្ស និងការពារអនីតិជន ក៏បានសហការជាមួយកម្លាំងសម្ថកិច្ចខណ្ឌសែនសុខ ឆ្មក់បង្ក្រាប និងឃាត់ខ្លួនបានមនុស្សប្រុសស្រីចំនួន៣៨នាក់ ក្នុងនោះមានប្រុស៤នាក់ ម៉ូតូចំនួន០៤គ្រឿង និងសម្ភារៈសង្ស័យមួយចំនួន។

ក្រោយមកកម្លាំងនាយកដ្ឋានប្រឆាំងបទល្មើលជួញដូរមនុស្ស និងការពារអនីតិជន ក៏បានបញ្ជូនមនុស្សប្រុសស្រីទាំង៣៨នាក់ រួមទាំងម៉ូតូ០៤គ្រឿង និងសម្ភារៈដែលសង្ស័យខាងលើយកទៅរក្សាទុកនៅអគ្គស្នងការនគរបាលជាតិដេីម្បី សួរនាំបន្តតាមនីតិវិធីច្បាប់ ៕

អត្ថបទ៖ រដ្ឋា