នាដការីរបាំ សាលី ស្រីមាស រំភើបស្រក់ទឹកភ្នែក ក្រោយទទួលបានការឧបត្ថម្ភដូរក្រលៀនថ្មី

ពិតជារឿងដ៏គួរឱ្យរំភើបខ្លាំងសម្រាប់នាដការីរបាំ កញ្ញាសាលី ស្រីមាស និងក្រុមគ្រួសារ ខណ:ដែលនាដការីរូបនេះទទួលបានការឧបត្ថម្ភទាំងស្រុង ក្នុងការវះកាត់ដូរក្រលៀនថ្មី ដើម្បីបន្តជីវិតរស់ជុំគ្រួសារ និងបម្រើវិស័យសិល្ប:បុរាណ។

ប្រាកដណាស់ដោយមើលឃើញពីកាលំបាក និងការអំពាវនាវសុំជំនួយសប្បុរសជនកាលថ្មីៗកន្លងទៅ ពីសំណាក់នាដការី សាលី ស្រីមាស នោះ ដោយឃើញក្តីអាណិតអាសូរស្រាប់តែអ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយកក្រុមហ៊ុន ជីបម៉ុង និងលោកជំទាវ បានសម្រេចជួយឧបត្ថម្ភថវិការទាំងស្រុងដើម្បីវះកាត់ដូរក្រលៀនថ្មីផ្តល់ក្តីសង្ឃឹមដល់កញ្ញា ស្រីមាស ។

ជាក់ស្តែងកាលពីរសៀលថ្ងៃទី ២០ ខែកុម្ភៈ ឆ្នាំ២០២៥ អ្នកឧកញ៉ា លាង ម៉េង ដោយមានការចូលរួមពីប្រធានសមាគមសិល្បករខ្មែរ បានរៀបចំពិធីសំណេះសំណាល ជាមួយកញ្ញា សាលី ស្រីមាស នាដការីដ៏មានទេពកោសល្យមួយរូបដែលកំពុងមានបញ្ហាខូចក្រលៀនទាមទារការព្យាបាលជាបន្ទាន់។

បន្ទាប់ពីទទួលបានការឧបត្ថម្ភសង្គ្រោះជីវិត តាមរយ:ការប្តូរក្រលៀនថ្មីនេះដែរ នាដការីកញ្ញា សាលី ស្រីមាស បានសម្តែងក្ដីរំភើបរីករាយយ៉ាងខ្លាំង ចំពោះគុណដ៏ធំធេងពីសំណាក់អ្នកឧកញ៉ាដែលផ្តល់ក្តីអាណិតជួយជីវិតនាងជាថ្មី។ គួរបញ្ជាក់ថា សាលី ស្រីមាស គឺជានាដការីរបាំព្រះរាជទ្រព្យដ៏មានទេពកោសល្យម្នាក់មានស្នាដៃច្រើន និងជាធនធានដ៏សំខាន់សម្រាប់ការអភិវឌ្ឍ និងអភិរក្សសម្បត្តិវប្បធម៌ខ្មែរ។

តាមរយ:ការតាំងចិត្ត និងភាពក្លាហានរបស់នាដការីវ័យក្មេង សាលី ស្រីមាស បានដើរតួជាសិល្បៈការនីគំរូម្នាក់ដល់យុវជនបន្តវេនជំនាន់ក្រោយ ដោយសម្រេចបានសមិទ្ធផលដ៏ត្រចះត្រចង់ជាច្រើន ក្នុងការសម្ដែងសិល្បៈចម្រុះ របាំអប្សរា របាំក្ងោកការសម្ដែងរឿងបុរាណទាំងនៅកម្ពុជា និងក្រៅប្រទេស ជាមួយកាយវិការដ៏រស់រវើកនិងពោរពេញទៅដោយសក្តានុពលក្នុងការជួយផ្សព្វផ្សាយវិស័យសិល្បៈបុរាណខ្មែរ ទៅកាន់ឆាកអន្តរជាតិ៕ អត្ថបទ៖ ចាន់រ៉ា