១៣ឆ្នាំមកនេះ ក្រុមគ្រូពេទ្យនៃមន្ទីរពេទ្យគន្ធបុប្ផាកម្ពុជា បានវះកាត់បេះដូងកុមារធ្ងន់ស្រាលជាង ៦ពាន់ករណី

មូលនិធិគន្ធបុប្ផាកម្ពុជា កាលពីពេលថ្មីៗនេះ បានឱ្យដឹងថា ១៣ឆ្នាំកន្លងមកនេះ ក្រុមគ្រូពេទ្យនៃមន្ទីរពេទ្យគន្ធបុប្ផាកម្ពុជា បានសម្រេចជោគជ័យលើការវះកាត់បេះដូងកុមារធ្ងន់ស្រាល បានជាង ៦ពាន់ករណី ក្នុងនោះនៅសៀមរាបបានចំនួន ៤ពាន់ករណី និងនៅភ្នំពេញ មានជិត ២ពាន់ករណី។

បើតាមមូលនិធិគន្ធបុប្ផាកម្ពុជា កុមារប្រមាណ ០,៥ ទៅ ១ភាគរយ បានប្រឈមនឹងជំងឺបេះដូងពីកំណើត ពោលគឺក្នុងចំណោមកុមារ ១០០នាក់ មានកុមារម្នាក់ដែលអាចកើតជំងឺបេះដូងពីកំណើត។ គេចាត់ទុកថា ជំងឺបេះដូងពីកំណើត ជាជំងឺដ៏កាចសាហាវ និងធ្ងន់ធ្ងរមួយ ដែលបានឆក់យកជីវិតកុមារជាច្រើន។ ជាមួយគ្នានេះ ការព្យាបាលជំងឺបេះដូង គឺមានលក្ខណៈស្មុគស្មាញ និងត្រូវការចំណាយថវិកាច្រើន។

ដើម្បីឆ្លើយតបទៅនឹងតម្រូវការ និងចំនួនកុមារដែលមានបញ្ហាបេះដូង វេជ្ជបណ្ឌិត បេអាត រិឆ្នឺរ ស្ថាបនិកមូលនិធិគន្ធបុប្ផាស្វីល បានបង្កើតកន្លែងវះកាត់បេះដូងនៅឆ្នាំ២០១១ នៅមន្ទីរពេទ្យជ័យវរ្ម័នទី៧ ឬមន្ទីរពេទ្យគន្ធបុប្ផាទី៣ ក្នុងខេត្តសៀមរាប និងនៅមន្ទីរពេទ្យគន្ធបុប្ផាភ្នំពេញ ក្នុងឆ្នាំ២០១៩ ដើម្បីជួយសង្រ្គោះកុមារដែលមានបញ្ហាបេះដូងពីកំណើត៕