WHO កំពុងតាមដានជំងឺអាថ៌កំបាំងនៅកុងហ្គោ ព្រោះសឹងពាក់កណ្តាលនៃអ្នកស្លាប់ គឺចេញរោគសញ្ញាត្រឹម៤៨ម៉ោង

អង្គការសុខភាពពិភពលោក (WHO) និងមន្ត្រីសុខាភិបាលសាធារណរដ្ឋប្រជាធិបតេយ្យកុងហ្គោ កំពុងបារម្ភនិងតាមដានយ៉ាងយកចិត្តទុកដាក់ចំពោះជំងឺអាថ៌កំបាំងដ៏កាចសាហាវមួយ ដែលគិតត្រឹមពេលនេះបានសម្លាប់មនុស្សជាង៥០នាក់ហើយ ខណៈអ្វីដែលធ្វើឲ្យគេខ្វល់ខ្លាំងគឺថា បើតាមរបាយការណ៍ ក្នុងចំណោមអ្នកស្លាប់ គឺមានសឹងតែពាក់កណ្តាលទៅហើយ ដែលត្រូវបាត់បង់ជីវិតក្រោយចេញរោគសញ្ញាបានត្រឹម២ថ្ងៃប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម WHO, ជំងឺនេះ ផ្ទុះឡើងដំបូងនៅខេត្ត Equateur ភាគពាយព្យសាធារណរដ្ឋប្រជាធិបតេយ្យកុងហ្គោ កាលពីថ្ងៃទី២១ខែមករាឆ្នាំ២០២៥ ហើយគិតត្រឹមថ្ងៃអង្គារ មានមនុស្សឆ្លង៤១៩ករណីនិងស្លាប់៥៣នាក់។

មកទល់ពេលនេះ WHO ក៏ដូចជាមន្ត្រីសុខាភិបាលក្នុងតំបន់ បានបង្ហាញក្តីបារម្ភជាពន់ពេក ហើយចាត់ទុកការផ្ទុះឡើងនេះថាវាជា «ការគំរាមកំហែងដ៏ធំចំពោះសុខភាពសាធារណៈ»។

តាមការចុះផ្សាយរបស់ Daily Mail កាលពីថ្ងៃពុធទី២៦ខែកុម្ភៈឆ្នាំ២០២៥, ជំងឺនេះផ្ទុះខ្លាំងក្នុងភូមិចំនួន៣នៃខេត្ត Equateur ដោយនៅក្នុងភូមិ Bomate មានមនុស្ស៤៥នាក់បានស្លាប់ ខណៈ៨នាក់ទៀត ស្លាប់ក្នុងភូមិ Boloko និង Danda ដែលស្ថិតនៅក្បែរនោះ។

ចំពោះរោគសញ្ញា ជំងឺអាថ៌កំបាំងនេះចេញអាការដូចជាគ្រុនក្តៅ ញាក់ ឈឺក្បាល ឈឺខ្លួន ឈឺក ឈឺពោះ ក្អក ក្អួត រាគ និងបែកញើស។

ទោះបីជាយ៉ាងណាក៏ដោយ ក្រុមមន្ត្រីសុខាភិបាលកុងហ្គោ កំពុងស្វះស្វែងនិងដុតដៃដុតជើងខ្លាំងណាស់ ដើម្បីស្វែងរកប្រភពនៃជំងឺនេះ និងខិតខំធ្វើការដើម្បីទប់ស្កាត់មិនឲ្យវារីករាលដាលកាន់តែធំ។

សូមបញ្ជាក់ថា នេះមិនមែនទើបលើកដំបូងឡើយដែលសាធារណរដ្ឋប្រជាធិបតេយ្យកុងហ្គោ ផ្ទុះជំងឺឆ្លងក្នុងសភាពធ្ងន់ធ្ងរបែបនេះ ពោលប្រទេសនេះក៏ធ្លាប់មានប្រវត្តិឆ្លងរាលដាលជំងឺ Mpox ក្នុងកម្រិតធ្ងន់ធ្ងរផងដែរកាលពីប៉ុន្មានឆ្នាំមុន៕

អត្ថបទ៖ សុខ សុវណ្ណ

ចុចអាន៖ ជំងឺ​អាថ៌កំបាំង​ ​សម្លាប់​មនុស្សច្រើននាក់ ​នៅ កេនយ៉ា