ព័ត៌មានអន្ដរជាតិ

សិស្សជាង៦ម៉ឺននាក់នៅមីយ៉ាន់ម៉ាតម្រូវឲ្យប្រឡងឡើងវិញ ព្រោះគ្រោះរញ្ជួយដីបំផ្លាញក្រដាសកិច្ចការលើកមុន

បានផុស

១ year មុន

នៅ

ថ្ងៃពុធ ២៣ មេសា ២០២៥

ដោយ

សិស្សវិទ្យាល័យជាង៦ម៉ឺននាក់ក្នុងប្រទេសមីយ៉ាន់ម៉ា ត្រូវបានរបបយោធាប្រាប់ឲ្យប្រឡងចូលរៀនឡើងវិញ បន្ទាប់ពីក្រដាសកិច្ចការប្រឡងដែលធ្វើរួចរបស់ពួកគេត្រូវបានបំផ្លាញដោយសាររញ្ជួយដីកាលថ្ងៃទី២៨ខែមីនា។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី២៣ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របបនេះបានរាយការណ៍ថា ក្រដាសចម្លើយជិត ៣៨ម៉ឺនរបស់សិស្សប្រហែល ៦៣០០០នាក់មកពីតំបន់ Mandalay និង Sagaing និងរដ្ឋ Kachin ត្រូវបានបំផ្លាញនៅសាកលវិទ្យាល័យ Mandalay ដោយសារគ្រោះរញ្ជួយដីដ៏សាហាវ។

ក្រសួងអប់រំនៃរបបនេះកាលពីថ្ងៃអង្គារបាននិយាយថា ការប្រឡងនឹងត្រូវធ្វើឡើងម្តងទៀតនៅ Sagaing, Mandalay និង Naypyitaw ក្នុងខែមិថុនា។ ការិយាល័យអប់រំប្រចាំតំបន់នឹងប្រកាសបញ្ជីឈ្មោះសិស្សដែលរងផលប៉ះពាល់។ បើតាមរបបនេះសិស្ស ៤៦៩៤៤ នាក់មកពី Mandalay, ៧៣១១មកពី Sagaing និង ៨៦៩៩ មកពីរដ្ឋ Kachin នឹងត្រូវតម្រូវឱ្យប្រឡងឡើងវិញ។

ពាក់ព័ន្ធនឹងបញ្ហានេះសិស្សជាច្រើនបានរិះគន់ការប្រឡងដោយលើកឡើងពីការមានពេលវេលារៀបចំដ៏ខ្លី ខណៈដែលមនុស្សជាច្រើនបានបាត់បង់មនុស្សជាទីស្រលាញ់ និងផ្ទះរបស់ពួកគេនៅក្នុងការរញ្ជួយដីកាលពីថ្ងៃទី២៨ ខែមីនា។

ជាមួយគ្នានេះអ្នកប្រើប្រាស់បណ្ដាញសង្គមបាននិយាថា របបនេះគួរតែគិតគូរដល់សិស្សដែលគ្មានផ្ទះសម្បែង និងសិស្សដែលបាត់បង់អ្វីៗទាំងអស់ រួមទាំងសៀវភៅរបស់ពួកគេ នៅក្នុងគ្រោះរញ្ជួយដី ដោយអំពាវនាវឱ្យមានការយោគយល់ជាពិសេសសម្រាប់អ្នកដែលរងរបួស ដែលមិនអាចត្រៀមខ្លួនសម្រាប់ការប្រលងក្នុងរយៈពេលដ៏ខ្លីខាងមុខនេះបានទេ។

ប្រជាជនមីយ៉ាម៉ាក៏បានបានរិះគន់របបនេះថាបានផ្តល់អាទិភាពដល់ការប្រឡងជាងការផ្តល់ជំនួយ និងការស្តារនីតិសម្បទាដល់ជនរងគ្រោះដោយគ្រោះរញ្ជួយដីនៅទីក្រុង Mandalay, Sagaing និង Naypyitaw ទៅទៀត។

គួរបញ្ជាក់ថា យោងតាមការបញ្ចេញព័ត៌មានរបស់របបយោធាមីយ៉ាន់ម៉ា ចំនួនអ្នកស្លាប់ពីការរញ្ជួយដីកាលពីថ្ងៃទី ២៨ខែមីនាបានកើនឡើងដល់ ៣៧៣៥នាក់ របួស៥១០៨ នាក់និង ១២០ នាក់ទៀតកំពុងបាត់ខ្លួននៅឡើយ គិតត្រឹមថ្ងៃអាទិត្យ ។ ប៉ុន្តែបើយោងតាម Mizzima News បានរាយការណ៍ថា មានអ្នកស្លាប់រហូតដល់៥៣៥២នាក់ របួស ៧១០៨នាក់ និងបាត់ខ្លួន ៥៣៨នាក់ ដោយទីក្រុង Mandalay មានអ្នកស្លាប់ និងរងការបំផ្លិចបំផ្លាញច្រើនបំផុត៕