ក្លិបគូប្រជែង Man United នៅ Premier League មួយចាប់អារម្មណ៍ចង់បាន Antony

ក្លិបកាំភ្លើងធំ Arsenal ចាប់អារម្មណ៍ចង់បានខ្សែប្រយុទ្ធស្លាប Antony ពីក្រុមបិសាចក្រហម Manchester United។

Antony ហាក់ពុំសូវជោគជ័យនោះទេ ក្នុងការលេងនៅ Man United ២ រដូវកាលកន្លះ គឺតាំងពីរដូវក្តៅឆ្នាំ ២០២២ មក ហើយជានិច្ចជាកាលរូបគេតែងតែទទួលបានពាក្យរិះគន់ពីអ្នកគាំទ្រ។ យ៉ាងណា បន្ទាប់ពីរូបគេត្រូវបានក្លិបដាក់ឱ្យក្លិប Real Betis របស់ អេស្ប៉ាញ ខ្ចីជើងកន្លះរដូវកាល រូបគេពិតជាបង្ហាញសមត្ថភាពបានល្អប្រសើរមែនទែន ដោយក្នុងការបង្ហាញខ្លួន ១៩ ប្រកួត រូបគេរកបាន ៦ គ្រាប់ និងបញ្ជូន (assist) ៤ លើក។

ក្រោយខ្សែប្រយុទ្ធស្លាបសញ្ជាតិ ប្រេស៊ីល វ័យ ២៥ ឆ្នាំរូបនេះបង្ហាញសមត្ថភាពបានល្អ គឺមានក្លិបនៅ អឺរ៉ុប ជាច្រើន ដែលកំពុងចាប់អារម្មណ៍ចង់បានគេដូចជា Atletico Madrid ជាដើម។ ចំណែកក្លិប Real Betis វិញក៏កំពុងមានបំណង​ទិញយករូបគេជាអចិន្ត្រៃយ៍ពី Man United ផងដែរ។

ប៉ុន្តែថ្មីៗនេះ យោងតាមការចុះផ្សាយដោយ Metro បានឱ្យដឹងថា ក្លិប Arsenal បានក្លាយជាក្លិបមួយទៀត ដែលចាប់អារម្មណ៍លើ Antony។ ឥឡូវនេះ ពួកគេកំពុងពិចារណាលើការផ្ទេរយកខ្សែប្រយុទ្ធស្លាប ប្រេស៊ីល រូបនេះនៅទីផ្សារដោះដូរកីឡាកររដូវក្តៅខាងមុខ។

ទោះបីជាយ៉ាងណា សារព័ត៌មាន El Chiringuito TV បានអះអាងថា Man United នឹងមិនរារាំងឱ្យកីឡាកររូបនេះចាកចេញឡើយ ប៉ុន្តែលុះត្រាតែមានក្លិបណាហ៊ានចំណាយលុយចន្លោះពី ៤៥ លានដុល្លារអាមេរិក ទៅ ៥៦ លានដុល្លារអាមេរិក ទើបក្លិបបិសាចក្រហមព្រមអនុញ្ញាតឱ្យគេចាកចេញ៕

ប្រែសម្រួល៖ សេម កុសល
ប្រភព៖ Sportbible