ក្រុមតាលីបង់ ហាមលេងអុក ទូទាំងប្រទេសអាហ្វហ្គានីស្ថាន

ក្នុងសេចក្តីប្រកាសកាលពីថ្ងៃអាទិត្យទី១១ខែឧសភាឆ្នាំ២០២៥ រដ្ឋាភិបាលដឹកនាំដោយក្រុមតាលីបង់ បានហាមឃាត់មិនឲ្យមានការលេងអុកឡើយ នៅទូទាំងប្រទេសប៉ាគីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសដែលផ្សាយដោយសារព័ត៌មាន RT, អ្នកនាំពាក្យ​នាយកដ្ឋាន​កីឡានៃរដ្ឋាភិបាលតាលីបង់លោក Atal Mashwani និយាយថា «មានបញ្ហាខាងសាសនាពាក់ព័ន្ធនឹងកីឡាអុក។ កីឡានេះត្រូវបានចាត់ទុកថាជាល្បែងស៊ីសងខុសច្បាប់ ក្រោមច្បាប់សីលធម៌របស់សាសនាឥស្លាម។ ល្បែងអុក នឹងត្រូវហាមឃាត់ទូទាំងប្រទេសរហូតដល់បញ្ហាទាំងអស់ ដោះស្រាយចប់ជាស្ថាពរ»។

អុក គឺជាកីឡាចុងក្រោយបំផុត ដែលជាប់ក្នុងបញ្ជីខ្មៅរបស់រដ្ឋាភិបាលតាលីបង់ ហាមមិនឲ្យលេង ​បន្ទាប់ពីឆ្នាំមុន ក្រុមនេះក៏ហាមប្រាប់មិនឲ្យមានការប្រកួតកីឡាគុនចម្រុះ MMA ក្នុងលក្ខណៈអាជីពផងដែរ ដោយសំអាងថា កីឡាប្រភេទនេះគឺឃោរឃៅនិងហិង្សាពេក ដែលមិនគោរពច្បាប់ Sharia។

សូមជម្រាបថា ក្រុមតាលីបង់ បានវិលមកកាន់អំណាចសាជាថ្មីក្នុងប្រទេសអាហ្វហ្គានីស្ថាន នៅឆ្នាំ២០២១ ក្រោយការដកទ័ពដ៏ចលាចលរបស់សហរដ្ឋអាមេរិក បន្ទាប់ពីគ្រប់គ្រងសន្តិសុខក្នុងប្រទេសអាស៊ីកណ្តាលមួយនេះ អស់រយៈពេលពីរទសវត្សរ៍។

នៅពេលឡើងកាន់អំណាច ក្រុមតាលីបង់ បានអនុវត្តច្បាប់តឹងរ៉ឹងជាច្រើន ជាពិសេសដាក់កំហិតខ្លាំងតែម្តងលើស្រ្តី៕

អត្ថបទ៖ សុខ សុវណ្ណ

ចុចអាន៖ ក្រុមតាលីបង់ ចេញច្បាប់ហាមស្រីៗនិយាយឮ និងសម្លឹងមើលមនុស្សប្រុស ដែលមិនជាប់សាច់ឈាម