ក្រុមតាលីបង់ ចេញច្បាប់ហាមស្រីៗនិយាយឮ និងសម្លឹងមើលមនុស្សប្រុស ដែលមិនជាប់សាច់ឈាម

តាមការចុះផ្សាយរបស់ ABC News កាលពីថ្ងៃសុក្រទី២៣ខែសីហាឆ្នាំ២០២៤, ក្រុមតាលីបង់ដែលកាន់អំណាចនៅប្រទេសអាហ្វហ្គានីស្ថាន បានអនុម័តច្បាប់ថ្មីមួយទៀត ដែលហាមស្រ្តីនិយាយឮៗនៅតាមទីសាធារណៈ ឬសូម្បីសម្លឹងមើលមុខមនុស្សប្រុសដែលមិនជាប់សាច់ឈាមហ្នឹងគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់ដ៏តឹងតែងនេះត្រូវបានអនុម័តកាលពីពាក់កណ្តាលសប្តាហ៍ដោយមេដឹកនាំកំពូល Hibatullah Akhundzada ជាមួយគោលបំណងលើកកម្ពស់តម្លៃគុណធម៌ ហើយប្រសិនបើអ្នកណាមិនគោរព ច្បាស់ជាត្រូវចាប់ខ្លួននិងដាក់ទោសទណ្ឌថែមទៀត។

ក្រៅពីច្បាប់គុណធម៌ ក្រុមតាលីបង់ ក៏បានបោះពុម្ភសៀវភៅក្បួនច្បាប់កម្រាស់១១៤ទំព័រដែលនិយាយអំពីទិដ្ឋភាពនៃជីវិតរស់នៅប្រចាំថ្ងៃផងដែរ ដោយដាក់កំហិតឲ្យស្រីៗត្រូវអនុវត្តតាមការណែនាំ។

ច្បាប់នេះចែងថា វាជាកាតព្វកិច្ចសម្រាប់ស្ត្រីទាំងអស់ ដែលត្រូវបិទបាំងរាងកាយរបស់ពួកគេនៅតាមទីសាធារណៈ ហើយការបិទមុខចាំបាច់បំផុតដើម្បីចៀសវាង ត្រូវគេល្បួង។ សម្លៀកបំពាក់មិនត្រូវស្តើង តឹង ឬខ្លីទេ។

មិនត្រឹមប៉ុណ្ណឹង សំឡេងរបស់ស្ត្រី ត្រូវចាត់ទុកថាមានភាពស្និទ្ធស្នាលនិងទាក់ទាញ ដូច្នេះពួកគេមិនគួរច្រៀង សូត្រកំណាព្យ ឬអានឮៗនៅទីសាធារណៈឡើយ។ ស្ត្រីក៏មិនត្រូវសម្លឹងមើលបុរសដែលគ្មានជាប់សាច់ឈាមដែរ។

លើសពីនេះ ច្បាប់នេះថែមទាំងហាមប្រាមការចាក់តន្ត្រី ស្ត្រីធ្វើដំណើរតែម្នាក់ឯង និងការចូលរួមសកម្មភាពសង្គមជាមួយមនុស្សប្រុសដែលជាប់ទាក់ទងគ្នាទៀតផង។

សូមជម្រាបថា ក្រុមតាលីបង់ បានឡើងកាន់អំណាចជាថ្មីក្នុងប្រទេសអាហ្វហ្គានីស្ថាន នៅឆ្នាំ២០២១ បន្ទាប់ពីសហរដ្ឋអាមេរិក ដកទ័ពយ៉ាងវឹកវរ។ លុះក្រោយមក ក្រុមឥស្លាមនិយមប្រកាន់តឹងមួយនេះ បានចេញច្បាប់រឹតត្បិតជាបន្តបន្ទាប់ ដែលគាបសង្កត់ខ្លាំងលើមនុស្សស្រី៕

អត្ថបទ៖ សុខ សុវណ្ណ

ចុចអាន៖ UNESCO៖ ក្រុមតាលីបង់ហាមក្មេងស្រី​ ១,៤លាននាក់​មិនឲ្យទៅសាលារៀន