សម្ដេច យ៉ន សេងយៀត នឹងធ្វើដំណើរធម្មយាត្រាថ្មើរជើងតាមជួរភ្នំក្រវាញ ៣២ថ្ងៃ ដើម្បីពុទ្ធសាសនា និងបរិស្ថាន

សម្ដេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការពុទ្ធិកសាកលវិទ្យាល័យព្រះសីហនុរាជ រួមជាមួយព្រះសង្ឃ និងគ្រហស្ថចំនួន ៣០អង្គ/នាក់ នឹងធ្វើដំណើរធម្មយាត្រាថ្មើរជើងរយៈពេល៣២ថ្ងៃ តាមតំបន់ជួរភ្នំក្រវាញ ដោយឆ្លងកាត់ខេត្ត៣ គឺខេត្តកោះកុង កំពង់ស្ពឺ និងពោធិ៍សាត់ ក្នុងចម្ងាយចន្លោះ ២៧០គីឡូម៉ែត្រ ទៅ៣០០គីឡូម៉ែត្រ ដើម្បីផ្សព្វផ្សាព្រះពុទ្ធសាសនា និងរួមចំណែកអភិរក្សបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការបង្ហោះវីដេអូរបស់សម្ដេចព្រះមហាអរិយវង្ស បណ្ឌិត យ៉ន សេងយៀត លើបណ្តាញសង្គម បាន​ឱ្យដឹងថា ដំណើរធម្មយាត្រាថ្មើរជើង របស់ព្រះអង្គនឹងធ្វើចាប់ពីថ្ងៃទី២៩ ខែឧសភា ដល់ថ្ងៃទី១ ខែកក្កដា ឆ្នាំ២០២៥ ដើរក្រោមប្រធានបទ (ដំណើរអភិរក្ស-Walk to Preserve) ដើម្បីពុទ្ធសាសនា និងបរិស្ថាន។ តាមរយៈវីដេអូរបស់ សម្ដេចព្រះមហាអរិយវង្ស បណ្ឌិត យ៉ន សេងយៀត បញ្ជាក់ថា គោលបំណងនៃការធ្វើធម្មយាត្រានេះ គឺដើម្បីលើកកម្ពស់អំពីការយល់ដឹងនៃសារសំខាន់ព្រៃឈើ ចូលរួមជាមួយរដ្ឋាភិបាលក្នុងការថែរក្សាអភិរក្សព្រៃឈើ និងចូលរួមលើកកម្ពស់ពីទេសចរណ៍ធម្មជាតិ។

សម្ដេចព្រះមហាអរិយវង្ស បណ្ឌិត យ៉ន សេងយៀត មានសង្ឃដីកាសំណូមពរថា៖ “ព្រៃឈើគឺជាដង្ហើមរស់នៃមនុស្សជាតិ សូមញាតិញោមពុទ្ធបរិស័ទ និងប្រជាពលរដ្ឋខ្មែរគ្រប់រូប ចូលរួមថែរក្សាអភិរក្សព្រៃឈើរបស់យើង”។

សូមជម្រាបថា ចំពោះដំណើរធម្មយាត្រាថ្មើរជើងតាមជួរភ្នំក្រវាញរបស់ សម្ដេច យ៉ន សេងយៀត ត្រូវបានឧបត្ថម្ភដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនណម៉ាណែត លោក ស សុខា និងភរិយា លោក ពេជ សោភ័ន និងភរិយា លោក ហួត ហាក់ និងភរិយា រួមជាមួយអ្នកឧបត្ថម្ភជាច្រើនរូបទៀត៕