ពូជ្រួញ មានគម្រោងទៅ «ប្រាសាទតាមាន់ និងតាក្របី» ម្តងទៀត ដើម្បីផលិតវីដេអូនិងផ្តិតរូបភាព

លោក ឆេង សុភ័ក្រ្ត ដែលមហាជនតែងស្គាល់ថា ជាអ្នកផលិតមាតិកាដ៏ល្បី ពូជ្រួញ និងជាស្ថាបនិក “រៀនថត Rean Thort” បានបង្ហាញរូបភាពចាស់ៗរបស់ខ្លួនភ្ជាប់និងរូបភាពប្រាសាទតាមាន់ និងប្រាសាទ តាក្របី ប្រាសាទរបស់ខ្មែរដែលថៃកំពុងទន្ទ្រានកាន់កាប់ កាលពីជិត ១០ឆ្នាំមុន ដោយគូសបញ្ជាក់ថា លោកនឹងទៅទីនោះម្តងទៀត ដើម្បីផលិតវីដេអូ និងផ្តិតរូបភាពកាន់តែប្រសើរជាងមុន។

តាមរយៈសំណេរលើទំព័រហ្វេសប៊ុកផ្ទាល់ខ្លួន អ្នកផលិតមាតិការូបនេះ បានរៀបរាប់ថា “រូបភាពឯកសារពីប្រាសាទ តាមាន់ និង តាក្របី ដែលខ្ញុំបានទៅដល់ផ្ទាល់កាលពី​ ២០១៦​ ” ។ លោកគូសបញ្ជាក់ទៀតថា លោកនឹងទៅម្តងទៀតថ្ងៃខាងមុខ ដើម្បីផលិតវីដេអូ និងផ្តិតរូបភាពឱ្យបានប្រសើរជាងនេះ។

ទន្ទឹមនឹងគម្រោងទៅកាន់តំបន់ប្រាសាទរបស់ខ្មែរ ដែលជាចំណុចក្តៅរវាងកម្ពុជា-ថៃដែរនេះ លោក ឆេង សុភ័ក្ត្រ ឆ្លៀតអំពាវនាវដល់ពលរដ្ឋកម្ពុជាគ្រប់រូប បើមានឱកាសគួរទៅមើលផ្ទាល់។ ជាមួយគ្នានេះ លោកបញ្ជាក់ដែរថា ប្រាសាទតាមាន់ រងការបែកបាក់ខ្លះ ហើយតាក្របី គឺនៅស្អាតល្អណាស់។

គួរជម្រាបថា ប្រាសាទតាមាន់ ប្រាសាទតាក្របី ជាប្រាសាទបុរាណខ្មែរ ដែលកសាងឡើងដោយព្រះបាទសូរ្យវរ្ម័នទី១ និងព្រះបាទឧទ័យទិត្យទី២ ក្នុងសតវត្សទី១១ គោលបំណងនៃការកសាងប្រាសាទនេះ គឺដើម្បីឧទ្ទិសថ្វាយ ព្រះឥសូរ ព្រះវិស្ណុ ស្ថិតក្នុងស្រុកបន្ទាយអំពិល ខេត្តឧត្តរមានជ័យ៕