ព័ត៌មានអន្ដរជាតិ

អាមេរិកឱ្យវៀតណាមកាត់បន្ថយវត្ថុធាតុដើមសម្រាប់ផលិតកម្មពីចិន ក្នុងការចរចាពន្ធ

បានផុស

២៦ វិនាទី មុន

នៅ

ថ្ងៃពុធ ៤ មិថុនា ២០២៥

ដោយ

សហរដ្ឋអាមេរិកបានផ្ញើសំណើដ៏ «តឹងតែង» និង «វែងអន្លាយ» ទៅកាន់វៀតណាម ដើម្បីជាផ្នែកមួយនៃការចរចាពន្ធ ដោយរួមបញ្ចូលទាំងការទាមទារឱ្យវៀតណាមកាត់បន្ថយការពឹងផ្អែកលើទំនិញឧស្សាហកម្មចិនសម្រាប់ផលិតកម្មរបស់ខ្លួន។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ កាលពីថ្ងៃអង្គារ ដោយស្រង់សម្ដីប្រភពមិនបញ្ចេញឈ្មោះ ២ រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិក ចង់ឱ្យរោងចក្រដែលមានមូលដ្ឋាននៅវៀតណាម កាត់បន្ថយការប្រើប្រាស់វត្ថុធាតុដើម និងសមាសធាតុពីប្រទេសចិន ហើយស្នើសុំផងដែរ ឱ្យវៀតណាមគ្រប់គ្រងការផលិត និងខ្សែច្រវ៉ាក់ផ្គត់ផ្គង់របស់ខ្លួនដោយប្រយ័ត្នប្រយែងថែមទៀត។ នេះបើតាមប្រភពម្នាក់ក្នុងចំណោម ២ នាក់ ដែលដឹងពីការចរចា ប៉ុន្តែមិនបានបញ្ជាក់ថា អំពីគោលដៅជាក់លាក់លើមុខទំនិញនោះទេ។

ប្រភពបន្តថា ការទាមទាររបស់អាមេរិក ធ្វើឡើងកាលពីចុងខែឧសភា បន្ទាប់ពីការចរចាពន្ធរវាងភាគីទាំង២ បានបញ្ចប់ទៅ។ វៀតណាម ដែលមានអតិរេកពាណិជ្ជកម្ម ១២៣,៥ ប៊ីលានដុល្លារ ជាមួយសហរដ្ឋអាមេរិក បានរងនូវពន្ធគយបដិការ ៤៦ ភាគរយ ហើយកំពុងស្ថិតនៅក្នុងដំណាក់កាលចរចា ដោយមិនទាន់មានការសម្រេចជាដុំកំភួនណាមួយនៅឡើយទេ។

កាលពីថ្ងៃចន្ទ រ៉យទ័របានរាយការណ៍ថា រដ្ឋបាលប្រធានាធិបតីអាមេរិក ដូណាល់ ត្រាំ ចង់ឱ្យផ្ដល់ «ការផ្ដល់ជូនឱ្យបានល្អបំផុត» ទៅសហរដ្ឋអាមេរិក ដើម្បីជាការចរចាត្រឹមថ្ងៃពុធ ដោយសំណើនេះធ្វើឡើងក្នុងលិខិតទៅកាន់ដៃគូចរចារបស់សហរដ្ឋអាមេរិក។

គេមិនច្បាស់ទេថាតើប្រទេសណានឹងទទួលបានលិខិតនោះទេ ប៉ុន្តែវាត្រូវបានផ្ញើតម្រង់ទៅប្រទេសដែលមានការចរចាសកម្មជាមួយសហរដ្ឋអាមេរិក ខណៈប្រទេសមានការចរចាក្នុងលក្ខណៈបែបនេះ រួមមានវៀតណាម សហភាពអឺរ៉ុប ជប៉ុន និងឥណ្ឌា៕