ព័ត៌មានអន្ដរជាតិ

អ៊ីស្រាអែល ប្រកាសថារកឃើញសាកសពមេដឹកនាំហាម៉ាសនៅរូងជម្រៅ៨ម៉ែត្រក្រោមដីមន្ទីរពេទ្យ

បានផុស

២៦ វិនាទី មុន

នៅ

ថ្ងៃចន្ទ ៩ មិថុនា ២០២៥

ដោយ

Chheang

កាលពីថ្ងៃទី៨ខែមិថុនាឆ្នាំ២០២៥ អ៊ីស្រាអែល បានប្រកាសថា សាកសពរបស់ប្រមុខយោធាហាម៉ាស លោក Mohammed Sinwar ត្រូវបានយកចេញពីផ្លូវរូងក្រោមដីមួយកន្លែងនៅក្រោមបន្ទប់សង្គ្រោះបន្ទាន់របស់មន្ទីរពេទ្យអឺរ៉ុបនៅទីក្រុង Khan Younis នៃតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ធ្វើឡើងបន្ទាប់ពីមានការបញ្ជាក់តាមរយៈ DNA និងវិធីសាស្ត្រកំណត់អត្តសញ្ញាណជាច្រើន ក្រោយការវាយប្រហារតាមអាកាសរបស់អ៊ីស្រាអែលកាលពីថ្ងៃទី១៣ខែឧសភា ដែលកំណត់គោលដៅលើសមាជិកសំខាន់ៗរបស់ក្រុមហាម៉ាសដែលរស់នៅក្រោមដី។

យោងតាមកងកម្លាំងអ៊ីស្រាអែល ទីតាំងផ្លូវរូងក្រោមដីដែលរកឃើញនោះ ត្រូវបម្រើការជា «បរិវេណបញ្ជា និងត្រួតពិនិត្យ» របស់ក្រុមហាម៉ាស។ ទន្ទឹមនោះ ក្រៅតែពីសាកសពលោក Sinwar សាកសពរបស់ Mohammad Shabana មេបញ្ជាការកងពលតូចហាម៉ាសប្រចាំទីក្រុង Rafah ក៏ដូចជាក្រុមសកម្មប្រយុទ្ធមិនស្គាល់អត្តសញ្ញាណផ្សេងៗទៀត ក៏ត្រូវបានគេប្រទះឃើញផងដែរ។

មេបញ្ជាការកងពលតូចអ៊ីស្រាអែលលោក Effie Defrin បាននិយាយថា រូងក្រោមដីនោះមានជម្រៅប្រហែល៨ម៉ែត្រពីក្រោមមន្ទីរពេទ្យ ហើយមានបន្ទប់ជាច្រើន រួមទាំងមជ្ឈមណ្ឌលបញ្ជា ឃ្លាំងផ្ទុកអាវុធ ឧបករណ៍ស៊ើបការណ៍ និងផ្ទះបាយ។

អ៊ីស្រាអែលបានសង្កត់ធ្ងន់ថា រចនាសម្ព័ន្ធមន្ទីរពេទ្យមិនរងការបំផ្លិចបំផ្លាញឡើយ ដោយប្រតិបត្តិការនេះបានគ្រោងទុកយ៉ាងល្អិតល្អន់ដើម្បីបញ្ចៀសការខូចខាតដល់ហេដ្ឋារចនាសម្ព័ន្ធស៊ីវិល។

ក្រុមហាម៉ាសមិនទាន់ធ្វើអត្ថាធិប្បាយជាផ្លូវការអំពីការស្លាប់របស់លោក Mohammed Sinwar នៅឡើយទេ។

សូមជម្រាបថា ជម្លោះដែលកំពុងបន្តបានបណ្តាលឲ្យមានវិបត្តិមនុស្សធម៌យ៉ាងធ្ងន់ធ្ងរនៅតំបន់ហ្គាហ្សា ដោយជនជាតិប៉ាឡេស្ទីនជាង ៥៤ ០០០នាក់ត្រូវបានគេរាយការណ៍ថាបានស្លាប់ចាប់តាំងពីការកើតឡើងនៃអរិភាពក្នុងឆ្នាំ២០២៣។ កិច្ចខិតខំប្រឹងប្រែងដើម្បីឈានដល់បទឈប់បាញ់ដ៏ទូលំទូលាយនៅតែបន្ត ដោយមានអ្នកសម្រុះសម្រួលមកពីសហរដ្ឋអាមេរិក អេហ្ស៊ីប និងកាតា ចូលរួមជាមួយភាគីទាំង២ ដើម្បីដោះស្រាយបញ្ហាដែលជាប់គាំងក្នុងដំណើរឆ្ពោះទៅរកសន្តិភាព៕