សន្តិសុខសង្គម

លួចម៉ូតូក្នុងសង្កាត់ចោមចៅទី ៣ សមត្ថកិច្ចរកឃើញនៅខេត្តកណ្ដាល

បានផុស

១០ ខែ មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

នារីម្នាក់ រវល់តែរកទិញម្ហូប ស្រាប់តែត្រូវជនសង្ស័យម្នាក់ លួចយកម៉ូតូដែលចតខាងក្រោយខ្នងទៅបាត់ តែត្រូវសមត្ថកិច្ចស្រាវជ្រាវយកម៉ូតូបានមកវិញ។

ហេតុការណ៍នេះបានកើតឡើងកាលពីវេលាម៉ោង ៦ ល្ងាច ថ្ងៃទី ២៥ ខែមិថុនា ឆ្នាំ ២០២៥ នៅផ្សារមុខរោងចក្រ ១ កន្លែង ភូមិព្រៃព្រីងត្បូង សង្កាត់ចោមចៅទី ៣ ខណ្ឌពោធិ៍សែនជ័យ។

តាមសម្ដីជនរងគ្រោះបានឲ្យដឹងថា មុនពេលកើតហេតុ រូបគាត់បានជិះម៉ូតូ ម៉ាកស្កូបពី ពណ៌ស លាយផ្កាឈូក ពាក់ស្លាកលេខភ្នំពេញ 1LE 9926 ចេញពីផ្ទះ ដើម្បីទៅផ្សារទិញម្ហូប។ លុះទៅដល់ផ្សារ ក៏ឈប់ម៉ូតូ កាច់សោពន្លត់ម៉ាស៊ីន ដោយម៉ូតូប្រើសោស្មាតឃី។ ពេលនោះ ខណៈរូបគាត់កំពុងបែរខ្នងរកទិញម្ហូប ស្រាប់តែមានជនសង្ស័យម្នាក់ ដើរថ្មើរជើងមកកាច់សោបញ្ឆេះម៉ូតូលួចជិះទៅបាត់ ដោយជាប់ទូរស័ព្ទដៃម៉ាក I phone13 pro max ក្នុងឃ្លុបម៉ូតូ។ ជនរងគ្រោះ បន្តថា បន្ទាប់មក រូបគាត់ ក៏ទៅប៉ុស្តិ៍នគរបាលចោមចៅទី ៣ ដើម្បីសុំការអន្តរាគមន៍។

ក្រោយពីទទួលបានពាក្យបណ្ដឹងពីជនរងគ្រោះ ដោយមានការបញ្ជាផ្ទាល់ពី លោក ថេង កុសល នាយប៉ុស្តិ៍នគរបាល ឲ្យកម្លាំងស្រាវជ្រាវ និងឆែកតាមប្រព័ន្ធអាយខ្លោតទូរស័ព្ទដៃ កំណត់មុខសញ្ញាបាន និងតាមចាប់រហូតទៅដល់ស្រុកកណ្តាលស្ទឹង ខេត្តកណ្តាល ទើបឃើញម៉ូតូជនរងគ្រោះវិញ ចំណែកជនសង្ស័យគេចខ្លួនបាត់។ បច្ចុប្បន្ន ម៉ូតូ ត្រូវបានសមត្ថកិច្ចប្រគល់ជូនជនរងគ្រោះវិញ៕

អត្ថបទ ៖ សុខា