ព័ត៌មានជាតិ

ក្រុមហ៊ុនមកពីវិស័យអចលនទ្រព្យពីរគ្រោងនឹងធ្វើការគៀរគទុនពីផ្សារមូលបត្រកម្ពុជា

បានផុស

១០ ខែ មុន

នៅ

ថ្ងៃពុធ ៩ កក្កដា ២០២៥

ដោយ

មន្រ្តីជាន់ខ្ពស់នៃផ្សារមូលបត្រកម្ពុជា (CSX) បានថ្លែងប្រាប់កម្ពុជាថ្មីថា ផ្សារមូលបត្រនឹងស្វាគមន៍ក្រុមហ៊ុនចំនួន២ មកពីវិស័យអចលនទ្រព្យចំនួនពីរកំពុងរៀបចំខ្លួនក្នុងការចុះបញ្ជីនៅផ្សារហ៊ុន ដើម្បីធ្វើការគៀរគទុនក្នុងការពង្រីកអាជីវកម្មរបស់ពួកគេ។

លោក ហុង សុហួរ អគ្គនាយនៃផ្សារមូលបត្រកម្ពុជាបានថ្លែងមកកាន់កម្ពុជាថ្មីថា ក្រុមហ៊ុនទាំងពីរបានដាក់ពាក្យស្នើសុំធ្វើការចុះបញ្ជីរួចរាល់មកហើយមកទាល់ពេលនេះ។ បច្ចុប្បន្នអ្នកជំនាញរបស់លោកកំពុងធ្វើការត្រួតពិនិត្យលើពាក្យស្នើសុំមុនឈានទៅដល់ដំណាក់កាលបន្ទាប់។

លោកបានថ្លែងថា៖«យើងនឹងមានក្រុមហ៊ុនពីរទៀតមកពីវិស័យអចលនទ្រព្យនឹងធ្វើការបោះផ្សាយមូលបត្រកម្មសិទ្ធិនៅក្នុងឆ្នាំនេះ ខណៈបច្ចុប្បន្នយើងកំពុងធ្វើការសិក្សាពិនិត្យលើកឯកសារស្នើសុំចុះបញ្ជីរបស់ពួកគេរួចហើយ»។

«យើងនឹងមើលជាក់ស្តែងថាទៅលើស្ថានភាពអាជិវកម្ម និងហិរញ្ញវត្ថុរបស់ក្រុមហ៊ុន ថាតើពួកគាត់មានគុណវុឌ្ឍន៍គ្រប់គ្រាន់ក្នុងការចុះបញ្ជីបានហើយឬនៅ។ ដូច្នេះយើងមិនទាន់ធ្វើការសន្និដ្ឋានបាននៅឡើយទេពេលនេះ ដោយសារយើងត្រូវការពិនិត្យបន្ថែមទៀត»។ នេះបើតាមការបញ្ជាក់របស់លោកសុហួរ។

បើតាម CSX ) អស់រយៈពេលជាង ១៣ ឆ្នាំ នៃការបើកដំណើរការផ្សារហ៊ុននៅក្នុងប្រទេសកម្ពុជា ផ្សារមូលបត្របានចូលរួមកៀរគរថវិកាបានប្រមាណជិត ៥០០ លានដុល្លារអាមេរិក។ បានលើកឡើងថា រយៈពេលជាង ១៣ឆ្នាំហើយ ចាប់តាំងពីទីផ្សារហ៊ុនបើកដំណើរការនៅក្នុងប្រទេសកម្ពុជា បច្ចុប្បន្នទីផ្សារមូលបត្រកម្ពុជា មានក្រុមហ៊ុនដែលចុះបញ្ជីជាភាគហ៊ុនជាមួយមានចំនួន ១១ ក្រុមហ៊ុន ដោយក្នុងនោះក្រៅពីភាគហ៊ុន ក៏នៅមានផលិតផលផ្សេងទៀតគឺមានសញ្ញាប័ណ្ណចំនួន ១៤ បន្ថែម សរុបក្រុមហ៊ុនទាំងអស់មានចំនួន ២៥។ ក្រុមហ៊ុនទាំង ២៥ នេះ បានកៀរគរទុនជូនដល់រាជរដ្ឋាភិបាលកម្ពុជា បានប្រមាណជិត ៥០០លានដុល្លារ៕