ហ៊ូធី បញ្ចេញវីដេអូកម្ទេច​នាវាដឹកទំនិញនៅសមុទ្រក្រហម ក្រោយ​ត្រូវ​អ៊ីស្រាអែល​វាយ​ប្រហារ​​ចាស់ដៃ

ក្រុមឧទ្ទាម​ហ៊ូធី​របស់ប្រទេសយេម៉ែន បានចេញផ្សាយវីដេអូមួយដែលបង្ហាញពីការវាយប្រហារដោយផ្ទាល់លើកប៉ាល់ដឹកទំនិញពាណិជ្ជកម្មនៅសមុទ្រក្រហម ដែល​ឆ្លុះ​បញ្ចាំង​ពីការកើនឡើង​ថ្មីនៃអំពើហិង្សាតាមសមុទ្រនៅក្នុងតំបន់។ នេះ​បើយោង​តាម​​ការ​ចុះ​ផ្សាយ​របស់​សារព័ត៌មាន Independent កាល​ពី​ថ្ងៃទី​៨ខែ​កក្កដា​ឆ្នាំ​២០២៥។

ខ្សែវីដេអូ​របស់​​ហ៊ូធី បង្ហាញ​ថា ក្រុម​សកម្ម​ប្រយុទ្ធ​ បាន​ប្រើ​​ដ្រូន និងមីស៊ីល​វាយ​ប្រហារ​លើ​កប៉ាល់ដឹកទំនិញក្រិក​ឈ្មោះ «Magic Seas» ដែលមានទង់ជាតិលីបេរីយ៉ា។ ក្រុមឧទ្ទាមក៏បានប្រើប្រាស់ទូកល្បឿនលឿន ដើម្បីចូលទៅជិតនាវា មុនពេលវា​ត្រូវ​បាន​​បំផ្ទុះ​ពន្លិច។ យោងតាមអាជ្ញាធរដែនសមុទ្រ សមាជិកនាវិកទាំង ១៩​នាក់ត្រូវបានជួយសង្គ្រោះដោយសុវត្ថិភាព និងនាំយកទៅកាន់ប្រទេសជីប៊ូទី។

មិនយូរប៉ុន្មាន កប៉ាល់ក្រិកដែលមានទង់ជាតិលីបេរីយ៉ាទីពីរឈ្មោះ «Eternity C» ក៏ត្រូវបានវាយប្រហារផងដែរ។ យ៉ាងហោចណាស់ សមាជិកនាវិក ៤នាក់ត្រូវបានសម្លាប់ និង ២នាក់ផ្សេងទៀតបានរងរបួស។ កប៉ាល់​ឥឡូវ​​នេះ​បាន​រសាត់​អណ្ដែត​នៅ​លើ​ផ្ទៃ​សមុទ្រ ​ហើយ​ខូច​ខាតខ្លាំង។

សមុទ្រក្រហម គឺជាផ្លូវពាណិជ្ជកម្មសកលដ៏សំខាន់ ហើយឧប្បត្តិហេតុទាំងនេះបានធ្វើ​ឲ្យ​អន្តរជាតិព្រួយបារម្ភ។ ចរាចរណ៍ដឹកជញ្ជូននៅក្នុងតំបន់ បានធ្លាក់ចុះរួចហើយ ដោយសារតែការគំរាមកំហែងរបស់ហ៊ូធី​ ហើយការវាយប្រហារថ្មីទាំងនេះអាចរំខានដល់ខ្សែសង្វាក់ផ្គត់ផ្គង់ពិភពលោកបន្ថែមទៀត។

ការ​បញ្ចេញ​វីដេអូ​នេះ ធ្វើ​ឡើង​បន្ទាប់​ពី​កង​កម្លាំង​ការពារ​អ៊ីស្រាអែល (IDF) បានបើកប្រតិបត្តិការ «Black Flag» នៅយេម៉ែន ដោយបាញ់មីស៊ីលនិងទម្លាក់គ្រាប់បែកយ៉ាងចាស់ដៃលើក្រុមហ៊ូធី កាលពី​ថ្ងៃទី​៧ខែ​កក្កដា។ ក្នុងប្រតិបត្តិការ «Black Flag» អ៊ីស្រាអែលបានវាយប្រហារលើគោលដៅសំខាន់ៗដូចជាកំពង់ផែ Hodeidah, Ras Isa និង Al-Salif ព្រមទាំងរោងចក្រអគ្គិសនី Ras Katib ផងដែរ។

IDF ចោទថា ក្រុមហ៊ូធី បានប្រើកំពង់ផែទាំងនេះ ដើម្បីផ្ទេរសព្វាវុធពីរបបអ៊ីរ៉ង់ ដែលត្រូវបានជួលឲ្យធ្វើប្រតិបត្តិការភេរវករប្រឆាំងរដ្ឋអ៊ីស្រាអែលនិងសម្ព័ន្ធមិត្តរបស់ខ្លួន៕

ដោយ៖ ឈាង

ចុចអាន៖ អ៊ីស្រាអែល បើកប្រតិបត្តិការ «Black Flag» នៅយេម៉ែន វាយប្រហារក្រុមហ៊ូធី ចាស់ដៃ