ព័ត៌មានជាតិ

ប្រតិភូសភាអាមេរិកបញ្ជាក់ពីការបន្តតាមដានលើបទឈប់បាញ់កម្ពុជា-ថៃ

បានផុស

១១ ខែ មុន

នៅ

ថ្ងៃសុក្រ ២៩ សីហា ២០២៥

ដោយ

ប្រតិភូសភាអាមេរិកបានបញ្ជាក់ពីជំហរក្នុងការបន្តតាមដាននូវបទឈប់បាញ់កម្ពុជា-ថៃ សំដៅធានាយ៉ាងណាប្រទេសទាំងពីរវិលត្រលប់ទៅរកសន្ដិភាព និងសន្ដិភាពឡើង។ នេះជាការបញ្ជាក់របស់តំណាងប្រតិភូសភាអាមេរិកលោកស្រី Beth Van Duyne ជាមួយនាយករដ្ឋមន្ត្រីកម្ពុជាកាលពីថ្ងៃទី២៨ ខែសីហា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនៅវិមានសន្ដិភាពកាលពីថ្ងៃព្រហស្បតិ៍ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងអំណរគុណដល់សហរដ្ឋអាមេរិក ជាពិសេសលោកប្រធានាធិបតីដូណាល់ត្រាំដែលបានសម្របសម្រួលឱ្យមានបទឈប់បាញ់រវាងកម្ពុជា និងថៃដែលបានជួយសង្គ្រោះអាយុជីវិតមនុស្សជាច្រើននាក់។

សម្ដេចបញ្ជាក់ថា៖ «ហេតុនេះហើយបានកម្ពុជាស្នើ ឯកឧត្តមប្រធានាធិបតីសហរដ្ឋអាមេរិក Donald J. Trump សម្រាប់ពានរង្វាន់ណូបែលសន្តិភាព ដែលស្របតាមសំណូមពររបស់ប្រជាពលរដ្ឋខ្មែរទាំងក្នុងនិងក្រៅប្រទេស និងដើម្បីជាការថ្លែងអំណរគុណចំពោះឯកឧត្តមប្រធានាធិបតី Donald Trump ដែលឯកឧត្តមបានយកចិត្តទុកដាក់ដោយផ្ទាល់ ក្នុងការផ្ដួចផ្ដើមនិងជំរុញឱ្យមានបទឈប់បាញ់នេះ»។

បន្ថែមលើនេះសម្ដេចក៏បានថ្លែងអំណរគុណចំពោះការទម្លាក់អត្រាពន្ធគយមកនៅ១៩%ដល់កម្ពុជាផងដែរ។

ក្នុងឱកាសនេះលោកស្រីតំណាងរាស្ត្រមកពីបក្សសាធារណរដ្ឋ Beth Van Duyne បានបញ្ជាក់ពីជំហរបស់សហរដ្ឋអាមេរិកក្នុងការគាំទ្របទឈប់បាញ់ និងវិលទៅរកសន្តិភាព និងស្ថិរភាពឡើងវិញ ហើយសហរដ្ឋអាមេរិកនឹងបន្តយកចិត្តទុកដាក់តាមដានលើការងារនេះ។

គួរឱ្យដឹងផងដែរថាគណៈប្រតិភូសភាអាមេរិកដឹកនាំដោយលោកស្រី Beth Van Duyne សមាជិកសភាប្រចាំរដ្ឋ Texas រួមមានលោក Richard McCormick សមាជិកសភាប្រចាំរដ្ឋGeorgia និងលោក Suhas Subraanyam សមាជិកសភាប្រចាំរដ្ឋ Virginia ។

ដំណើរទស្សនកិច្ចរបស់តំណាងសភាអាមេរិកពេលនេះស្របពេលខួប១ខែនៃបទឈប់បាញ់កម្ពុជា-ថៃចូលជាធរមានកាលពីថ្ងៃទី២៨ ខែកក្កដាកន្លងទៅ ដែលជាជោគជ័យការផ្ដួចផ្ដើមគំនិតរបស់លោកប្រធានាធិបតីដូណាល់ត្រាំ ដោយមានការសម្របសម្រួលពីប្រធានអាស៊ានលោក អាន់វ៉ា អ៊ីប្រាហ៊ីម និងការរួមចំណែកពីប្រទេសចិនផងដែរ។ ទោះជាយ៉ាងណាស្ថានភាពនៃបទឈប់បាញ់ស្ថិតក្នុងភាពផុយស្រួយនៅឡើយដោយថៃតែងតែបន្តបំពានជាបន្តបន្ទាប់។

កាលពីថ្ងៃទី២៧ ខែសីហា ឯកអគ្គរាជទូត និងជាតំណាងអចិន្ត្រៃយ៍កម្ពុជា ប្រចាំនៅអង្គការសហប្រជាជាតិលោក កែវ ឈា រាយការណ៍ពីការរំលោភសិទ្ធិមនុស្ស និងបំពានបទឈប់បាញ់របស់ថៃ ព្រមទាំងបង្ហាញនិងប្រគល់ភស្ភុតាងនៃការរំលោភបំពានទាំងនេះទៅឱ្យអគ្គលេខាធិការអង្គការសហប្រជាជាតិលោក António Guterres ផងដែរ៕