វៀតណាមកត់ត្រាពីកំណើនតម្លៃនាំចេញគ្រាប់ស្វាយចន្ទី

ប្រាក់ចំណូលពីការនាំចេញគ្រាប់ស្វាយចន្ទីរបស់វៀតណាម បានកើនឡើង ១៨ ភាគរយ ដល់ប្រមាណ ២,៨ ប៊ីលាន​ដុល្លារ ក្នុងរយៈពេល ៧ ខែដើមឆ្នាំ ​ធៀប​នឹ​ងរយៈពេល​ដូចគ្នា​កាលពីឆ្នាំមុន។ នេះបើតាមការចុះផ្សាយរបស់កាសែត Việt Nam News។

​ទិន្នន័យពីក្រសួងឧស្សាហកម្ម និងពាណិជ្ជកម្មវៀតណាម បង្ហាញថា កំណើននេះត្រូវបាន​កត់ត្រាឡើង បើទោះបីជាបរិមាណនៃការនាំចេញថយថយចុះ ២,៦ ភាគរយ មកត្រឹម ៤១៣ ០០០ តោន ក៏ដោយ​ ដែល​នេះ​បង្ហាញពី​ភាពរឹងមាំនៃតម្លៃគ្រាប់ស្វាយចន្ទីសកល។

ក្រសួងបាន​ឱ្យដឹងទៀតថា កំណើនតម្លៃទាំងមូលជំរុញដោយ​ការកើនឡើងការនាំចេញទៅចិន ដែលរួមចំណែក ៩៦ ០០០ តោន ស្មើនឹង​តម្លៃ ៦០៨ លាន​ដុល្លារអាមេរិក​ ដែលនេះបង្ហាញពីកំណើន ២៩ ភាគរយ បើគិតជាបរិមាណ និង ៤៧ ភាគរយ បើគិតពីតម្លៃ។ ​

ជាមួយគ្នានោះ ចិន​បាន​វ៉ាដាច់សហរដ្ឋអាមេរិក ក្លាយជាប្រទេសនាំចូលគ្រាប់ស្វាយចន្ទីដ៏ធំបំផុតរបស់វៀតណាម។ ក្នុងរយៈពេល ៧ ខែដូចគ្នា វៀតណាមនាំចេញគ្រាប់ស្វាយចន្ទីទៅអាមេរិក ប្រមាណ ៨៣ ០០០ តោន ដោយធ្លាក់ចុះជិត ៣០ ភាគរយ ក្នុងតម្លៃសរុប ៥៦១ លាន​ដុល្លារ (ធ្លាក់ចុះ ១២ ភាគរយ)។ ​​

អ្នកជំនាញលើកឡើងថា ការនាំចេញគ្រាប់ស្វាយចន្ទីទៅ​ចិន បានកើនឡើងដោយសារតែការស្ទុះងើបឡើងវិញនៃសេដ្ឋកិច្ចរបស់ប្រទេស កំណើន​តម្រូវការអាហារសម្រន់​ដែលល្អសម្រាប់សុខភាព ​និង​កិច្ចខិតខំប្រឹងប្រែងធ្វើឱ្យប្រសើរឡើង​របស់អ្នកនាំចេញ ​ដែលបំពេញតាមស្តង់ដារនាំចូលរបស់​ចិន៕