ឯកអគ្គរដ្ឋទូតអាមេរិក៖ កម្ពុជា ជា​គំរូ​​ប្រទេស​ឥណ្ឌូ​ប៉ាស៊ីហ្វិក​ ក្នុងកិច្ចព្រមព្រៀងវប្បធម៌

លោក W. Patrick Murphy ឯកអគ្គរដ្ឋទូតអាមេរិក មានប្រសាសន៍ថា ព្រះរាជាណាចក្រកម្ពុជា គឺជាប្រទេសតែមួយ គត់នៅតំបន់អាស៊ីអាគ្នេយ៍ ដែលមានកិច្ចព្រមព្រៀង ស្ដីពី កិច្ចសហប្រតិបត្តិការផ្នែកវប្បធម៌ ជាមួយសហរដ្ឋអាមេរិក។ កម្ពុជា​ ​ជា​គំរូ​សម្រាប់​ប្រទេស​ឥណ្ឌូ​ប៉ាស៊ីហ្វិក​ផ្សេង​ទៀត។

ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា និង ស្ថានទូតអាមេរិកនៅភ្នំពេញ បានចុះហត្ថលេខាលើកិច្ច ព្រមព្រៀងលើកទី៥ ស្ដីពី កិច្ចសហប្រតិបត្តិការផ្នែកវប្បធម៌ រវាងព្រះរាជាណាចក្រកម្ពុជា និងសហរដ្ឋអាមេរិក នៅសារមនី្ទរជាតិ នៅថ្ងៃទី៣០ ខែសីហា ឆ្នាំ២០២៣ ដែលនេះជាការបញ្ជាក់ជាថ្មី នូវការប្ដេជ្ញាចិត្តយូរអង្វែងរបស់សហរដ្ឋអាមេរិក ក្នុងការអភិរក្ស និងជួស ជុលបេតិកភណ្ឌវប្បធម៌ដ៏សម្បូរបែបរបស់កម្ពុជា។

អនុស្សរណៈ នៃការយោគយល់គ្នា ជាលើកដំបូងត្រូវបានចុះហត្ថលេខានៅ ឆ្នាំ២០០៣។ ក្នុងរយៈពេល ២០ឆ្នាំកន្លងមក អនុស្សរណៈ នៃការយោគយល់គ្នា នេះបានជួយសម្រួលដល់ការ បញ្ជូនត្រឡប់មកកម្ពុជាវិញនូវវត្ថុបុរាណដ៏មានតម្លៃចំនួនជាង ១០០ដុំ និងបានកសាងសមត្ថភាពរបស់ជនជាតិខ្មែរដែលធ្វើការងារថែរក្សា គាំពារបេតិកភណ្ឌវប្បធម៌។

លោក W. Patrick Murphy មានប្រសាសន៍ថា ប្រទេសទាំងពីរមើលឃើញអំពីអំណាច នៃវប្បធម៌ ក្នុងការធ្វើឱ្យមនុស្សមានការរួបរួមគ្នា។ សហរដ្ឋអាមេរិកមានមោទនភាពចំពោះការរួមចំណែករបស់ខ្លួន ក្នុងការជួសជុល និងអភិវឌ្ឍបេតិកភណ្ឌវប្បធម៌ នៃព្រះរាជាណាចក្រកម្ពុជា សម្រាប់មនុស្សជំនាន់ក្រោយៗទៀត។

ការបន្តអនុស្សរណៈ នៃការយោគយល់គ្នា រយៈពេល ៥ឆ្នាំទៀត អំពី “ការដាក់កម្រិតហាមប្រាមនូវការនាំចូលប្រភេទវត្ថុបុរាណ និងវត្ថុ ជាតិពន្ធុវិទ្យានៃប្រទេសកម្ពុជា” និងកាត់បន្ថយការលួចប្លន់ នៃវត្ថុបុរាណដ៏ល្អឯកពីប្រទេសកម្ពុជា។ ការបន្តអនុស្សរណៈ នៃការយោគយល់គ្នានេះ នឹងបន្តការផ្លាស់ប្តូរគ្នានូវវត្ថុបុរាណ និងវត្ថុជាតិពន្ធុវិទ្យា សម្រាប់បំណងផ្នែកវប្បធម៌ អប់រំ និងវិទ្យាសាស្ត្រ ដើម្បីផ្សព្វផ្សាយឱ្យសាធារណជនយល់កាន់តែច្បាស់ និងផ្តល់តម្លៃ ដល់បេតិកភណ្ឌវប្បធម៌ដ៏សម្បូរបែបរបស់កម្ពុជា។

លោក W. Patrick Murphy បានប្រកាស ផ្ដល់ជំនួយថវិកាចំនួន ៤៥ម៉ឺនដុល្លារ របស់ក្រសួងការបរទេសសហរដ្ឋអាមេរិក តាមរយៈមូលនិធិ ឯកអគ្គរដ្ឋទូតសម្រាប់ការអភិរក្សវប្បធម៌ ជូនដល់ក្រសួងវប្បធម៌ និងវិចិត្រសិល្បៈ សម្រាប់បន្តការងារ អភិរក្សនៅប្រាសាទភ្នំបាខែង។

គួររម្លឹកថា តាំងពីឆ្នាំ ២០០១ មក សហរដ្ឋអាមេរិក បានផ្ដល់ជំនួយជាថវិកាជិត ៦លានដុល្លារ សម្រាប់ការ អភិរក្ស វប្បធម៌នៅកម្ពុជា ដែលរួមមានជំនួយជាថវិកា សម្រាប់ជួសជុលប្រាសាទភ្នំបាខែង និងប្រាសាទ ព្រះវិហារ ជួយដល់សារមន្ទីរប្រល័យពូជសាសន៍ទួលស្លែង បង្កើតបញ្ជីសារពើភណ្ឌតាមប្រព័ន្ធអនឡាញ នៃវត្ថុសិល្បៈនៅសារមន្ទីរតាមខេត្តនានា និងអប់រំផ្សព្វផ្សាយដល់សាធារណជនលើការ ការពារបេតិកភណ្ឌវប្បធម៌។

គួរបញ្ជាក់ថា “ឥណ្ឌូប៉ាស៊ីហ្វិក” សំដៅ​ទៅលើ​តំបន់ ដែល​លាតសន្ធឹងរវាង​មហាសមុទ្រ​ពីរ គឺ​ចាប់ពី​មហាសមុទ្រ​ឥណ្ឌា ទៅដល់​មហាសមុទ្រ​ប៉ាស៊ីហ្វិក។ ក៏ប៉ុន្តែ ជាទូទៅ ពាក្យ​នេះ​ត្រូវ​បាន​គេ​ប្រើ មិនមែន​ដើម្បី​សំដៅ​ត្រឹមតែ​ទៅលើ​ទីតាំង​ភូមិសាស្រ្ត​នោះទេ តែជា​ពាក្យ​ដែល​មាន​អត្ថន័យ​ទាក់ទង​នឹង​ភូមិសាស្រ្ត​នយោបាយ៕

អត្ថបទ៖ ច័ន្ទ វីរៈ