ហេតុអ្វីតម្លៃមាសបន្តបំបែកកំណត់ត្រាខ្ពស់បំផុត​ឥតស្រាកស្រាន្ត?

តម្លៃមាសអន្តរជាតិ​នៅថ្ងៃចន្ទនេះ បាន​បន្តកើនឡើងបំបែកកំណត់ត្រាខ្ពស់បំផុតជាង ៤ ០០០ ដុល្លារ/អោន ដែលនេះជាការបង្ហាញឱ្យ​ឃើញកំណើនឥតស្រាកស្រាន្តរបស់មាស ដែលគេរាប់ចាត់ទុកថាជាទ្រព្យសម្បត្តិសុវត្ថិភាព។

តម្លៃមាសជួញដូរដោយ​ផ្ទាល់ បាន​កើនឡើង ៦៧ ដុល្លារ ឬ ១,៧០ ភាគរយ ដោយជួញដូរនៅតម្លៃ ៤ ០៥២ ដុល្លារ/អោន គិតត្រឹមម៉ោង ១១ និង ៣៥ នាទី នៅទីក្រុងហុងកុង។ តម្លៃនេះ ហក់ឡើងរហូតដល់ ៤ ០៥៩ ដុល្លារ/អោន នៅវគ្គមុខ នាព្រឹកចន្ទដដែល។

តម្លៃមាសនាពេលអនាគតរបស់អាមេរិកវិញ បាន​កើនឡើង ១,៥ ភាគរយ ដល់ ៤ ០៥៩ ដុល្លារ/អោន។

រាប់តាំងពីដើមឆ្នាំមក តម្លៃមាសអន្តរជាតិ​បាន​កើនឡើងប្រមាណជាង ៥០ ភាគរយ ខណៈបណ្ដាធនាគារធំៗ និងអ្នកជំនាញទីផ្សារបាន​លើកឡើងថា តម្លៃនេះនឹង​បន្តកើនខ្ពស់ទៀត។ ហេតុអ្វីបាន​ជាតម្លៃមាសបន្តកើនឡើងនៅពេលនេះ?

តម្លៃមាស​នៅថ្ងៃសប្ដាហ៍មុន និងថ្ងៃចន្ទនេះ បាន​កើនឡើងដោយកត្តាធំៗជាច្រើន ប៉ុន្តែសំខាន់បំផុតគឺដោយសារតែកំណើននៃភាពតានតឹងជាថ្មីនៃសង្រ្គាមពាណិជ្ជកម្ម​ និងការរំពឹងទុកខ្លាំងថា ធនាគារកណ្ដាល​សហព័ន្ធអាមេរិក​ (Fed) នឹង​កាត់បន្ថយអត្រាការប្រាក់បន្ថែមទៀត ចំពេលសេដ្ឋកិច្ចមិនសូវស្រួលដែលប៉ះពាល់ដល់វិស័យការងារ ដែលអាចធ្វើឱ្យតម្លៃប្រាក់ដុល្លារធ្លាក់ចុះបន្ត។

ភាពតានតឹងពាណិជ្ជកម្ម​អាមេរិក-ចិន បាន​កើនឡើងជាថ្មី​ ក្រោយ​ប្រធានាធិបតីអាមេរិក លោក ដូណាល់ ត្រាំ ប្រកាសដាក់ពន្ធ ១០០ បន្ថែមថ្មី លើចិន​ ដែល​ទើបនឹង​បង្កើនការរឹតត្បឹតការនាំចេញរ៉ែកម្រ កាលពីសប្ដាហ៍មុន។ ​

សង្រ្គាម​ពាណិជ្ជកម្ម ជាធម្មតា បង្កភាព​ស្រពិចស្រពិល​នៃសេដ្ឋកិច្ច ដែលធ្វើឱ្យ​តម្រូវការមាសកើនឡើង ហើយ​មែនទែនទៅ វារួមចំណែកយ៉ាងសំខាន់ដល់កំណើនតម្លៃមាសនៅឆ្នាំនេះ ជាពិសេសក្រោយ​លោក ត្រាំ ប្រកាសពន្ធខ្ពស់ជាបន្តបន្ទាប់រាប់តាំងពីលោកឡើងកាន់អំណាចនៅខែមករា។

កន្លងមក អ្នកជំនាញបាន​លើកឡើងថា តម្លៃមាសកើនឡើងដោយសារតែតម្រូវការរឹងមាំពីធនាគារកណ្ដាល ភាពស្រពិលនៃសេដ្ឋកិច្ចសកល ​ភាព​តានតឹងពាណិជ្ជកម្ម និង​ភូមិសាស្រ្តនយោបាយ កម្សោយប្រាក់ដុល្លារ និងកំណើនពាណិជ្ជកម្ម​មាសផ្សេងៗក្រៅតែពីការជួញដូរដុំមាស ជាពិសេសនៅទីផ្សារលោកខាងលិចជាដើម៕

​