ព័ត៌មានអន្ដរជាតិ

ចិនឆ្លើយតបពន្ធ ត្រាំ៖ ការនាំចូលសណ្ដែកសៀងពីអាមេរិកធ្លាក់ចុះដល់ ០% ខែមុន

បានផុស

៧ ខែ មុន

នៅ

ថ្ងៃចន្ទ ២០ តុលា ២០២៥

ដោយ

ក្នុងបរិបទនៃភាពតានតឹងពាណិជ្ជកម្មដែលជំរុញដោយគោលនយោបាយពន្ធគយខ្ពស់របស់លោកប្រធានាធិបតីអាមេរិក ដូណាល់ ត្រាំ ការនាំចូលសណ្ដែកសៀងអាមេរិករបស់ប្រទេសចិននៅខែកញ្ញា បានធ្លាក់ចុះដល់ ០ ភាគរយ ជាលើកដំបូង រាប់តាំងពីខែវិច្ឆិកា ឆ្នាំ ២០១៨។ នេះបើតាមការចុះផ្សាយរបស់ទីភ្នាក់ងារសារព័ត៌មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទុយទៅវិញ ចិនបានងាកទៅរកការផ្គត់ផ្គង់ជំនួសពីបណ្ដាប្រទេសនៅអាមេរិកខាងត្បូង ដែលរួមចំណែកទីផ្សារសរុបជិត ១០០ ភាគរយ។

ទិន្នន័យពីរដ្ឋបាលទូទៅចិន ដែលចេញផ្សាយនៅថ្ងៃចន្ទ ទី ២០ តុលា នេះ បានបង្ហាញថា ការនាំចូលសណ្ដែកសៀងពីសហរដ្ឋអាមេរិក បានធ្លាក់ចុះដល់សូន្យ ពី ១,៧ លានតោន ក្នុងរយៈពេលដូចគ្នាឆ្នាំមុន។

ការធ្លាក់ចុះនេះ បណ្ដាលមកពីការងាកចេញទៅរកអ្នកផ្គត់ផ្គង់ថ្មី ក្រោយចិនដាក់ពន្ធខ្ពស់សងសឹកទៅនឹងវិធានការបង្កហេតុរបស់ ត្រាំ ដែលដាក់ពន្ធខ្ពស់លើចិនជាបន្តបន្ទាប់ក្រោយឡើងកាន់អំណាចនៅចុងខែមករា។ ចិនគឺអ្នកនាំចូលសណ្ដែកសៀងដ៏ធំបំផុតរបស់ពិភពលោក។

ផ្ទុយទៅវិញ ការនាំចូលសណ្ដែកសៀងពីប្រទេសប្រេស៊ីលបានកើនឡើង ២៩,៩ ភាគរយ ដល់ ១០,៩៦ លានតោន នៅខែកញ្ញា ដោយស្មើនឹង ៨៥,២ ភាគរយ នៃការនាំចូលសរុបរបស់ចិន។ ការនាំចូលពីអាហ្សង់ទីនវិញ បានកើនឡើង ៩១,៥ ភាគរយ ដល់ ១,១៧ លានតោន ឬរួមចំណែកប្រមាណ ៩ ភាគរយ នៃការនាំចូលសរុបរបស់ចិន។

នៅខែកញ្ញា ចិននាំចូលសណ្ដែកសៀងសរុប ១២,៨៧ លានតោន ដែលជាកម្រិតខ្ពស់បំផុតទី២ក្នុងកំណត់ត្រា។

បច្ចុប្បន្ន ការលក់សណ្តែកសៀងរបស់សហរដ្ឋអាមេរិកកំពុងធ្លាក់ចុះ ខណៈអ្នកទិញធានាការនាំចេញរហូតដល់ខែវិច្ឆិកា ដែលភាគច្រើនមកពីប្រេស៊ីល និងអាហ្សង់ទីន ដែលជួយដោយការបន្ធូរបន្ថយពន្ធបណ្តោះអាសន្នរបស់អាហ្សង់ទីន។

បើគ្មានវឌ្ឍនភាពក្នុងកិច្ចពិភាក្សាពាណិជ្ជកម្មទេ កសិករអាមេរិកប្រថុយនឹងការខាតបង់រាប់ពាន់លាន ដោយសារក្រុមហ៊ុនចិនបន្តទិញសណ្ដែកសៀងពីអាមេរិកខាងត្បូង។ បច្ចុប្បន្ន រដ្ឋបាល ត្រាំ កំពុងត្រៀមចំណាយថវិការដ្ឋដើម្បីជួយកសិករ ប៉ុន្តែកសិករអាមេរិកដែលបាត់បង់អតិថិជនចិន ទាមទារចង់បានដំណោះស្រាយរយៈពេលវែង។

ទោះជាយ៉ាងណាក៏ដោយ ចិនឯណោះវិញ អាចនឹងប្រឈមមុខនឹងវិបត្តិផ្គត់ផ្គង់ខ្សោយផងដែរ នៅដើមឆ្នាំក្រោយ មុនពេលរដូវប្រមូលផលថ្មីរបស់ប្រេស៊ីលចូលមកដល់។