សេដ្ឋកិច្ច

ហាងឆេងមាសក្នុងស្រុកលក់ចេញជិត ៥ ពាន់ដុល្លារ មួយតម្លឹង

បានផុស

៧ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

តម្លៃហាងឆេងមាសបានហក់ឡើងវិញទៅរកតម្លៃ ៥០០០ ដុល្លារ ក្នុងមួយតម្លឹង ដោយសារកម្រិតប្រាក់ដុល្លារខ្សោយ នៅចំពេលដែលគេរំពឹងថា ធនាគារកណ្ដាលអាមេរិក នឹងកាត់បន្ថយអត្រាការប្រាក់នៅដំណាច់ឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសតាមបណ្ដាហាងនានា ក្នុងរាជធានីភ្នំពេញ នៅថ្ងៃទី ១២ ខែវិច្ឆិកា ឆ្នាំ ២០២៥ លក់ចេញ ក្នុងតម្លៃ ៤៩៩៥ ដុល្លារ ក្នុងមួយតម្លឹង និងទិញចូល ៤៩៨០ ដុល្លារ ក្នុងមួយតម្លឹង។

អ្នកស្រី ហ៊ង រីណា អាជីវករផ្សារលក់មាស ផ្សាធំថ្មី បានឱ្យដឹងថា ហាងឆេងមាសបានហក់ឡើងវិញ កាលពីថ្ងៃទី ១១ ខែវិច្ឆិកា ឆ្នាំ ២០២៥ ខណៈអ្នកស្រីបញ្ជាក់ថា មាសឡើងចុះតាមទីផ្សារអន្តរជាតិ។

អ្នកស្រី ច័ន្ទ ណា អាជីវករលក់មាស បានឱ្យដឹងថា៖ «មាសបានកើនឡើងវិញ អត់មានអ្នកទិញទេ ព្រោះមាសវាឡើងថ្លៃពេក មានតែគេយកមកលក់»។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities បានឱ្យដឹងថា ព័ត៌មានដែលអាចធ្វើឱ្យតម្លៃមាសធ្លាក់ចុះវិញ គឺអាចពាក់ព័ន្ធនឹងការបើករដ្ឋបាលអាមេរិកឡើងវិញ។ លោកបន្ថែមថា កម្រិតនៃការទិញ-លក់ នៅប៉ែកអឺរ៉ុបបានធ្លាក់ចុះ ដោយសារតែរដូវនេះ ជារដូវវិស្សមកាលដើរលេង។

ទោះជាយ៉ាងណា លោក ឡុង សំណាង បញ្ជាក់ថា ភាគរយខ្ពស់នៃការកាត់បន្ថយអត្រាការប្រាក់របស់ធនាគារកណ្តាលអាមេរិក អាចនឹងកាត់បន្ថយបន្ថែមទៀត ដើម្បីទាក់ទាញការវិនិយោគនោះតម្លៃមាសនឹងបន្តកើនឡើងទៀត៕