ព័ត៌មានអន្ដរជាតិ

IEA៖ តម្រូវការប្រេង និងឧស្ម័នសកលអាចកើនឡើងរហូតដល់ឆ្នាំ ២០៥០

បានផុស

៨ ខែ មុន

នៅ

ថ្ងៃពុធ ១២ វិច្ឆិកា ២០២៥

ដោយ

ទីភ្នាក់ងារថាមពលអន្តរជាតិ (IEA) បានចេញរបាយការណ៍ព្យាករមួយនៅថ្ងៃពុធនេះថា តម្រូវការប្រេង និងឧស្ម័នសកល អាចបន្តកើនឡើងរហូតដល់ឆ្នាំ ២០៥០ ដោយវាខុសពីការរំពឹងទុកចាស់ ដែលថាពិភពលោកនឹងផ្លាស់ប្ដូរទៅប្រើប្រាស់ឥន្ធនៈស្អាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ IEA ក៏បាននិយាយផងដែរថា ពិភពលោកនឹងបរាជ័យក្នុងការសម្រេចគោលដៅអាកាសធាតុ ដែលផ្ដោតសំខាន់ខ្លាំងលើការកាត់បន្ថយការបំភាយឧស្ម័នផ្ទះកញ្ចក់។

ក្នុងរបាយការណ៍ប្រចាំឆ្នាំស្តីពីទស្សនវិស័យថាមពលពិភពលោក ដែលបានចេញផ្សាយនៅថ្ងៃពុធ IEAបានព្យាករក្រោមសេណារីយ៉ូគោលនយោបាយបច្ចុប្បន្នថា តម្រូវការប្រេងនឹងឡើងដល់ ១១៣ លានបារ៉ែល/ថ្ងៃនៅពាក់កណ្តាលសតវត្សរ៍ (២០៥០) កើនឡើងប្រហែល ១៣% ពីការប្រើប្រាស់ឆ្នាំ ២០២៤។

ភ្នាក់ងារអន្តរជាតិដដែលបន្តថា តម្រូវការថាមពលសកល នឹងកើនឡើង ៩០ Exajoule (EJ) នៅឆ្នាំ ២០៣៥ ដែលជាការកើនឡើង ១៥% ពីកម្រិតបច្ចុប្បន្ន។

របាយការណ៍ថ្មី ក៏រួមបញ្ចូលសេណារីយ៉ូអាព្យាក្រឹតកាបូន ដែលពិពណ៌នាអំពីផ្លូវឆ្ពោះទៅរកការកាត់បន្ថយការបំភាយឧស្ម័នពីថាមពលរបស់់សកលដល់ «សូន្យសុទ្ធ» នៅឆ្នាំ ២០៥០។ ប្រទេសជាង ១៩០ បានសន្យានៅក្នុងកិច្ចពិភាក្សាអាកាសធាតុនៅទីក្រុងប៉ារីសក្នុងឆ្នាំ ២០១៥ ដើម្បីព្យាយាមរក្សាពិភពលោកពីការឡើងកំដៅលើសពី ១,៥ អង្សាសេ ធៀបនឹងមុនសម័យបដិវត្តន៍ឧស្សាហកម្ម។ ប៉ុន្តែបើតាមរបាយការណ៍ថ្មី ពិភពលោកនឹងឡើងកំដៅលើសពី ១,៥ អង្សាសេ នៅគ្រប់់សេណារីយ៉ូទាំងអស់។

IEA ដែលជាអង្គការឃ្លាំមើលសន្តិសុខថាមពលរបស់លោកខាងលិច បានស្ថិតក្រោមសម្ពាធពីសហរដ្ឋអាមេរិកប៉ុន្មានឆ្នាំចុងក្រោយនេះ ជុំវិញការផ្តោតលើគោលនយោបាយថាមពលស្អាត ខណៈលោកប្រធានាធិបតីអាមេរិក ដូណាល់ ត្រាំ បានអំពាវនាវឱ្យក្រុមហ៊ុនអាមេរិកពង្រីកផលិតកម្មប្រេង និងឧស្ម័ន បន្ថែមទៀត។ ក្នុងអាណត្តិរបស់លោក ចូ បៃដិន IEA បានព្យាករថា តម្រូវការប្រេងសកលនឹងឡើងដល់កម្រិតកំពូលក្នុងទសវត្សរ៍នេះ ហើយបាននិយាយថា ប្រសិនបើពិភពលោកចង់សម្រេចបានគោលដៅអាកាសធាតុ នោះមិនចាំបាច់វិនិយោគបន្ថែមលើប្រេង និងឧស្ម័នទៀតទេ៕