​វៀតណាម​រងការ​ខាតបង់សេដ្ឋកិច្ច ៣,២ ប៊ីលាន​ដុល្លារ​ ពីគ្រោះធម្មជាតិឆ្នាំនេះ

២០២៥ ក្លាយជាឆ្នាំនៃគ្រោះធម្មជាតិ​ដ៏មហន្តរាយមួយសម្រាប់ប្រទេសវៀតណាម​ ដោយសម្លាប់មនុស្សប្រមាណ ៤០៩ នាក់ និងបង្កការខាតបង់សេដ្ឋកិច្ចរហូតដល់ទៅ ៨៥ ទ្រីលានដុង (៣,២ ប៊ីលានដុល្លារ) រាប់តាំងពីដើមឆ្នាំមក។ នេះបើតាមការចុះផ្សាយរបស់កាសែត VnExpress កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះមហន្តរាយទាំងនេះ បានបណ្តាលឱ្យផ្ទះចំនួន ៣៣៧ ២៩៧ ខ្នង​ ដួលរលំំ អូសតាមទឹក និងខូចខាត ខណៈ​ដំណាំស្រូវ និងដំណាំផ្សេងៗ​ចំនួន ៥៥៣ ៤១៧ ហិកតា រួមជា​ចំំការដំំណាំរុក្ខជាតិ ៣៧៦ ៧៩២ ហិកតាផ្សេងទៀត ត្រូវលិចលង់ និងខូចខាត។

ក្នុងវេទិកាមួយស្តីពីការប្រើប្រាស់វិទ្យាសាស្ត្រ និងបច្ចេកវិទ្យាសម្រាប់ការព្យាករគ្រោះមហន្តរាយ និងការព្រមានជាមុន ដែលរៀបចំឡើងដោយក្រសួងកសិកម្ម និងបរិស្ថាន កាលពីថ្ងៃអង្គារ លោក Nguyen Ton Quan អនុប្រធាននាយកដ្ឋានគ្រប់គ្រងហានិភ័យគ្រោះមហន្តរាយ​ បានរាយការណ៍ថា ការខូចខាត​ទាំងនោះ បណ្តាលមកពីព្យុះចំនួន ១៤ និងព្យុះត្រូពិកចំនួន ៥ ដែលបាន​វាយប្រហារពីសមុទ្រចិនខាងត្បូងនៅឆ្នាំនេះ។

លោក Quan ក៏បានកត់សម្គាល់ផងដែរថា ថ្មីៗនេះ ភ្លៀងធ្លាក់ខ្លាំង និងទឹកជំនន់ដែលមិនធ្លាប់មានពីមុនមកលើអាងទន្លេចំនួន ១៣ នៅតំបន់ភាគខាងជើង និងកណ្តាល បានបណ្តាលឱ្យមានទឹកជំនន់ធ្ងន់ធ្ងរនៅតាមតំបន់​ក្រុង និងតំបន់ទំនាប រួមទាំងទីក្រុងទេសចរណ៍សំខាន់ៗដូចជា ទីក្រុងហាណូយ ទីក្រុងហ៊ូ ដាណាង និងទីក្រុងញ៉ាត្រាង ជាដើម។

លោកបានព្យាករណ៍ថា ​នៅចុងឆ្នាំ ២០២៥ នេះ ​វៀតណាម​នៅតែរងហានិភ័យនៃទឹកជំនន់ធំ​ក្នុងតំបន់​ភាគ​កណ្តាល ​នៅពេលព្យុះកូតុ បក់បោកមកដល់៕