អាមេរិកស្នើកុំឱ្យម៉ិកស៊ិក និងកាណាដា ធ្វើជាមជ្ឈមណ្ឌលផ្ទុកទំនិញចិន វៀតណាម ឥណ្ឌូណេស៊ី

តំណាងពាណិជ្ជកម្មសហរដ្ឋអាមេរិក លោក Jamieson Greer បាន​និយាយកាលពីថ្ងៃព្រហស្បតិ៍ថា ប្រទេសកាណាដា និងម៉ិកស៊ិកមិនគួរ​ធ្វើខ្លួនជាមជ្ឈមណ្ឌលស្ដុកទំនិញនាំចេញសម្រាប់​ចិន វៀតណាម ឥណ្ឌូណេស៊ី និងប្រទេសដទៃទៀតទេ ប៉ុន្តែករណីនេះបានកើតឡើងរួចហើយសម្រាប់ម៉ិកស៊ិក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

លោក Greer បានប្រាប់សន្និសីទ​សារព័ត៌មាន​នៅទីក្រុងវ៉ាស៊ីនតោនថា មានបញ្ហា​លើ​កិច្ចព្រមព្រៀងពាណិជ្ជកម្មសហរដ្ឋអាមេរិក-ម៉ិកស៊ិក-កាណាដា ​ប៉ុន្តែវិធានការមួយចំនួន​ រួមទាំងពន្ធលើរថយន្តបរទេស ​គឺដាក់ចេញឡើងដើម្បីជួយកែតម្រូវបញ្ហា។

គួរគូសបញ្ជាក់ថា ការលើកឡើងរបស់លោក Greer ធ្វើឡើងខណៈរដ្ឋបាលរបស់លោកប្រធានាធិបតី ដូណាល់ ត្រាំ បាន​ដាក់ដំឡើងពន្ធនាំចូលលើប្រទេសផ្សេងៗរួមទាំងចិន និងបណ្ដារដ្ឋអាស៊ីអាគ្នេយ៍ ដែលជាដៃគូពាណិជ្ជកម្មសំខាន់ៗ ដើម្បីដោះស្រាយបញ្ហាពាណិជ្ជកម្មដែលអាមេរិកចាត់ទុកថាមិនស្មើភាពគ្នា។

បញ្ហាមួយក្នុងចំណោមនោះ គឺទំនិញឆ្លងកាត់ ដែលចិននាំចេញទៅប្រទេសដទៃ មុននាំចេញទៅសហរដ្ឋអាំមេរិក​បន្ត។ ធ្វើដូច្នេះ ចិនអាចគេចពន្ធខ្ពស់ ដែលអាមេរិកបានដាក់លើខ្លួន៕

​