ព័ត៌មានអន្ដរជាតិ

ក្រុមហ៊ុនអាមេរិក រកឃើញកំណប់ប្រេងក្រោមសមុទ្រលើស ៤៣០ លានបារ៉ែល នៅវៀតណាម

បានផុស

៦ ខែ មុន

នៅ

ថ្ងៃសុក្រ ៩ មករា ២០២៦

ដោយ

ក្រុមហ៊ុនថាមពលយក្សរបស់សហរដ្ឋអាមេរិក Murphy Oil បានប្រកាសពីការរកឃើញស្ដុកប្រេងលើស ៤៣០ លានបារ៉ែល នៅក្នុងសមុទ្រភាគខាងត្បូងវៀតណាម ដោយវាអាចក្លាយជាការរកឃើញកំណប់ប្រេងដ៏ធំជាងគេនៅអាស៊ីអាគ្នេយ៍ក្នុងរយៈពេលជាង ២០ ឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Nikkei បានរាយការណ៍កាលពីថ្ងៃព្រហស្បតិ៍ ដោយស្រង់ព័ត៌មានពីក្រុមហ៊ុនពិគ្រោះយោបល់ថាមពល Wood Mackenzie ថា ការរកឃើញថ្មីនេះ ធ្វើឡើងក្រោមប្រតិបត្តិការរុករករបស់ក្រុមហ៊ុនបុត្រសម្ព័ន្ធរបស់ Murphy Oil នៅវាលប្រេងក្រោមសមុទ្រ Hai Su Vang ក្នុងតំបន់អាងសមុទ្រ Cuu Long Basin ដែលនៅខាងកើតតំបន់ដីសណ្តទន្លេមេគង្គ និងក្បែរទីក្រុងហូជីមិញ។

ពីមុន ក្រុមហ៊ុន Murphy Oil ធ្លាប់បានប៉ាន់ប្រមាណថា វាលប្រេងនេះអាចមានស្ដុកប្រេងដែលអាចទាញយកបាន ចន្លោះពី ១៧០-៤៣០ លានបារ៉ែល។ យ៉ាងណាមិញ ការវាយតម្លៃថ្មីរបស់ក្រុមហ៊ុន បានប៉ាន់ស្មានថា បរិមាណប្រេងជាមធ្យមអាចស្ថិតនៅក្បែរ ៤៣០ លានបារ៉ែល រួចទៅហើយ ខណៈបរិមាណប៉ាន់ស្មានខ្ពស់បំផុត អាចមានលើស ៤៣០ លានបារ៉ែល ឯណោះ។

ការរកឃើញដដែល អាចជួយវិស័យថាមពលវៀតណាម ដែលពឹងផ្អែកខ្លាំងលើការនាំចេញប្រេងសម្រាប់វិស័យឧស្សាហកម្ម និងការចម្រាញ់ប្រេងក្នុងស្រុក។ វៀតណាម មានគោលដៅក្លាយជាប្រទេសឧស្សាហកម្មពេញទីនៅឆ្នាំ ២០៤៥ យ៉ាងណាមិញ ផលិតកម្មប្រេងរបស់ប្រទេសនេះ បានធ្លាក់ចុះពីប្រហែល ៣៦៥ ០០០ បារ៉ែល/ថ្ងៃ នៅឆ្នាំ ២០០៥ មកក្រោម ១២០ ០០០ បារ៉ែល/ថ្ងៃ នៅឆ្នាំ ២០២៥។ នេះបើកំណត់ត្រារបស់ Wood Mackenzie។

លោក Eric Hambly ប្រធាន និងជានាយកប្រតិបត្តិក្រុមហ៊ុន Murphy Oil Corporation បានថ្លែងថា៖ «នេះគឺជាពេលវេលាដ៏សំខាន់សម្រាប់អាជីវកម្មនៅវៀតណាមរបស់យើង។ យើងមានមោទនភាពចំពោះប្រតិបត្តិការរបស់យើង ហើយនៅតែប្តេជ្ញាធ្វើការយ៉ាងជិតស្និទ្ធជាមួយដៃគូ និងរដ្ឋាភិបាលវៀតណាម ដើម្បីទាញយកសក្តានុពលពេញលេញនៃធនធាននេះ»។

គួររំឭកថា ការរកឃើញប្រេងធំៗនៅអាស៊ីអាគ្នេយ៍ពីមុន រួមមាន វាលប្រេង Banyu Urip នៅឥណ្ឌូណេស៊ី ក្នុងឆ្នាំ ២០០១ និងវាលប្រេង Gumusut របស់ម៉ាឡេស៊ី ក្នុងឆ្នាំ ២០០៣៕