​កម្ពុជា​ ជំរុញ​ឱ្យ​វិនិយោគ​​ស្ថានីយ​បញ្ចូល​អគ្គិសនី នៅចំពេលកំណើនយានយន្តអគ្គិសនី

អាជ្ញាធរ​អគ្គិសនីកម្ពុជា​ បាន​ជំរុញ​ឱ្យ​អ្នក​ដែល​កាន់​អាជ្ញា​បណ្ណផ្ដល់សេវាផ្គត់ផ្គង់អគ្គិសនី សិក្សា​លទ្ធភាព​​វិនិ​យោគបង្កើត​ស្ថានីយបញ្ចូលថាមពលយានយន្តអគ្គិសនី​ ព្រមទាំង​ជំរុញកំណើន​នៃ​ការ​ប្រើប្រាស់​យាន​យន្ត​អគ្គិសនីនៅកម្ពុជា។​

គិតត្រឹមដើមឆ្នាំ ២០២៤ ស្ថានីយបញ្ចូលថាមពលសម្រាប់យានយន្តអគ្គិសនីបានកើនឡើងដល់ ២១ ទី​តាំង​ជាមួយនឹងទូបញ្ចូលថាមពលអគ្គិសនីសរុបចំនួន ២៧ ទូ។

​ការប្រើប្រាស់យានយន្តអគ្គិសនី​នឹងចូលរួមចំណែកក្នុងការកាត់បន្ថយការប្រើប្រាស់ប្រេងឥន្ធនៈ ស្រប​ពេលដែលកម្ពុជាបានប្តេជ្ញាសម្រេចឱ្យបានអព្យាក្រឹតកាបូន​នៅឆ្នាំ២០២៥០។ ​

​គោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ គឺជាត្រីវិស័យ និង​ជា​ឧបករណ៍គោលនយោបាយរបស់រាជរដ្ឋាភិបាលក្នុងការតម្រង់ទិស និងជំរុញការអភិវឌ្ឍវិស័យ​យាន​យន្តអគ្គិសនីនៅកម្ពុជា។​

រាជរដ្ឋាភិបាលផ្តល់សេរីភាព និងជម្រើសកាន់តែសំបូរបែប សម្រាប់ការប្រើប្រាស់យានយន្ត ដើម្បី​សម្រួល​ការធ្វើដំណើរ ដឹកជញ្ជូនទំនិញ និងសេវាកម្មផ្សេងៗ។ ជាក់ស្តែង អត្រានៃការ​ប្រើប្រាស់​យាន​យន្តកើនយ៉ាងខ្លាំង ជាពិសេសទោចក្រ​យានយន្ត និងរថយន្ត។ ​

​លោក ផន រឹម អ្នកនាំពាក្យក្រសួងសារធាណការ ​និងដឹកជញ្ជូន មានប្រសាសន៍ថា ​បច្ចុប្បន្ន ការ​អភិវឌ្ឍ​យានយន្តអគ្គិសនី គឺជានិន្នាការសកល ដែលកំពុងកើនឡើងយ៉ាងលឿន។

ការប្រើប្រាស់យានយន្តអគ្គិសនីត្រូវបានគេមើលឃើញថា ផ្តល់អត្ថប្រយោជន៍ជា​ច្រើន​ក្នុង​ទិដ្ឋភាព​បរិស្ថាន សេដ្ឋកិច្ច សន្តិសុខថាមពល និងជាពិសេសការ​ឈោង​ចាប់នូវបច្ចេកវិទ្យាថ្មីៗ ស្របនឹងនិន្នាការតំបន់ និងសកលលោក។

​​លោក​ កែវ រតនៈ រដ្ឋមន្រ្តីក្រសួងរ៉ែ និងថាមពល ​មានប្រសាសន៍ថា ​ការប្រើប្រាស់ថាមពលស្អាត ​មិនត្រឹមតែជួយកាត់បន្ថយនូវការបំភាយឧស្ម័នទៅបរិយាកាសនោះទេ ​ប៉ុន្តែការប្រើប្រាស់​រថយន្តអគ្គិសនី​នឹងជួយកាត់បន្ថយការចំណាយ​ក្នុងការធ្វើអាជីវកម្មចំពោះក្រុមហ៊ុន ​សហគ្រាសដែលធ្វើការដឹកជញ្ជូន។

​លោកថា ​ការប្រើប្រាស់រយន្តអគ្គិសនី ​មិនត្រឹមតែចូលរួមចំណែកក្នុងការ​បង្កើតឱ្យបរិស្ថានស្អាត​នោះ​ទេ ​ប៉ុន្តែគឺជាការសន្សំសំចៃ ​ក្នុងការចំណេញដល់ថវិការបស់ខ្លួន។

​គិតត្រឹមខែកញ្ញា ឆ្នាំ២០២៥ ​មានយានយន្តអគ្គិសនីចុះបញ្ជីសរុប ១០ ៥៦៨គ្រឿង ក្នុងនោះរថយន្ត​អគ្គិសនី ៧ ១៨៧​គ្រឿង, ត្រីចក្រយានយន្តអគ្គិសនីចំនួន ៦៧១គ្រឿង និងម៉ូតូអគ្គិសនីចំនួន ២៧​១០​គ្រឿង៕

អត្ថបទ៖ ឡេង ដេត