អាមេរិកបង្ហាញចេតនាចង់ដកទណ្ឌកម្មលើប្រេង​រុស្ស៊ី​បន្ថែមទៀត ចំពេលមាន​ជម្លោះមជ្ឈិមបូព៌ា​

រដ្ឋមន្ត្រីក្រសួងរតនាគារអាមេរិក លោក ស្កុតថ៍ បេសិនថ៍ បានឱ្យដឹងកាលពីថ្ងៃសុក្រ (៦ មីនា) ថា ​សហរដ្ឋ​អាមេរិក​អាចដកទណ្ឌកម្មចេញពីប្រេងរុស្ស៊ីបន្ថែមទៀត ចំពេលដែលទីផ្សារប្រេងសកលធ្លាក់ចូលទៅក្នុងភាពចលាចលដោយសារតែជម្លោះអ៊ីស្រាអែល-អាមេរិក ជាមួយ​អ៊ីរ៉ង់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឱ្យដឹងរបស់លោក បេសិនថ៍ ធ្វើឡើងតែ១ថ្ងៃប៉ុណ្ណោះ ក្រោយសហរដ្ឋអាមេរិ​កបាន​ចេញអាជ្ញាប័ណ្ណ​បណ្ដោះអាសន្នឱ្យប្រទេសឥណ្ឌា អាចនាំចូលប្រេងពីរុស្ស៊ីដែល​ជាប់គាំងលើសមុទ្រ ​រយៈពេល ៣០ ថ្ងៃ។

​លោក ​បេសិនថ៍ បានប្រាប់កម្មវិធី «Kudlow» របស់បណ្ដាញព័ត៌មាន​ Fox Business ថា៖ «យើងអាចដកទណ្ឌកម្មប្រេងរុស្ស៊ីផ្សេងទៀតចេញ»។

លោកបានបន្ថែមថា៖ «មានប្រេងឆៅរាប់រយលានបារ៉ែលដែល​រងទណ្ឌកម្មហើយជាប់គាំងនៅលើទឹក(សមុទ្រ) ហើយតាមពិតទៅ ដោយការដកទណ្ឌកម្មទាំងនោះ ក្រសួងរតនាគារអាចបង្កើតការផ្គត់ផ្គង់ ហើយយើងកំពុងពិនិត្យមើលរឿងនោះ»។

គួរគូសបញ្ជាក់ថា ជម្លោះមជ្ឈិមបូព៌ា ដែលបង្កការរាំងស្ទះដល់ច្រកដឹកជញ្ជូនប្រេងសំខាន់ ហ័រមូហ្ស (Hormuz) បាន​ធ្វើឱ្យ​ការផ្គត់ផ្កង់ប្រេងសកលមានភាពតានតឹង និងធ្វើឱ្យតម្លៃប្រេងអន្តរជាតិសំខាន់ៗ ហក់ឡើងដល់ ៩០ ដុល្លារ/បារ៉ែល ពេលបិទការជួញដូរថ្ងៃសុក្រ។

ក្នុងពេលដំណាលគ្នានោះ ប្រធានាធិបតីអាមេរិក លោក ដូណាល់ ត្រាំ បាន​និយាយថា លោកមាន​បារម្ភពីការហក់ឡើងនៃតម្លៃប្រេងនៅអាមេរិក ដែលស្របតាមនិន្នាការសកលនោះទេ ហើយប្រតិបត្តិការយោធាជាអាទិភាពរបស់លោក។ យ៉ាងណាមិញ មន្រ្តី​រដ្ឋបាលរបស់លោក បាន​ប្រាប់​សារព័ត៌មាន​អាមេរិក ថាខ្លួនកំពុងខ្នះខ្នែង​ដោះស្រាយបញ្ហាផ្គត់ផ្គង់ដែលធ្វើឱ្យប្រេងឡើងថ្លៃ។

ពេលប្រកាសពីការលើកលែងសម្រាប់ឥណ្ឌា​នៅថ្ងៃព្រហស្បតិ៍ លោក បេសិនថ៍ បានថ្លែងថា វិធានការរបស់អាមេរិក​គឺ ​«​ដើម្បីឱ្យប្រេងអាចបន្តហូរចូលទៅក្នុងទីផ្សារពិភពលោក​»

លោកបានបន្តយ៉ាងដូច្នេះថា៖ «វិធានការរយៈពេលខ្លី​នេះ នឹងមិនផ្តល់អត្ថប្រយោជន៍ហិរញ្ញវត្ថុធំដុំ ដល់រដ្ឋាភិបាលរុស្ស៊ីទេ ព្រោះវាអនុញ្ញាតតែប្រតិបត្តិការដែលពាក់ព័ន្ធនឹងប្រេងដែលជាប់គាំងនៅលើសមុទ្ររួចហើយតែប៉ុណ្ណោះ»៕