ព័ត៌មានអន្ដរជាតិ

អាកាសចរណ៍ស៊ីវិលវៀតណាមរាយការណ៍ពីកំណើនថ្លៃសំបុត្រយន្តហោះ ដោយសារជម្លោះមជ្ឈិមបូព៌ា

បានផុស

៤ ខែ មុន

នៅ

ថ្ងៃចន្ទ ២៣ មីនា ២០២៦

ដោយ

អាជ្ញាធរអាកាសចរណ៍ស៊ីវិលវៀតណាម (CAAV) បានរាយការណ៍ថា ក្រុមហ៊ុនអាកាសចរណ៍អន្តរជាតិជាង ៦០% បានដំឡើងថ្លៃ ឬមានគម្រោងដំឡើងថ្លៃសំបុត្រយន្តហោះចាប់ពីពាក់កណ្តាលខែមីនា ដោយសារតែកំណើនតម្លៃប្រេងឥន្ធនៈ។ នេះបើតាមការចុះផ្សាយរបស់ភ្នាក់ងារព័ត៌មាន VNS កាលពីថ្ងៃសៅរ៍ (២១ មីនា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CAAV បានឱ្យដឹងថា ខ្លួនកំពុងបន្តតាមដាន និងវាយតម្លៃពីផលប៉ះពាល់នៃភាពតានតឹងនៅមជ្ឈិមបូព៌ាលើវិស័យអាកាសចរណ៍របស់វៀតណាម ខណៈជម្លោះធ្វើឱ្យវៀតណាមប្រឈមមុខនឹងកង្វះខាតប្រេងយន្តហោះ។

ចំពេលដែលតម្លៃប្រេងឥន្ធនៈអាកាសចរណ៍សកលកំពុងកើនឡើងខ្ពស់ ក្រុមហ៊ុនអាកាសចរណ៍អន្តរជាតិជាច្រើនបានដាក់ចេញនូវគោលនយោបាយគិតប្រាក់បន្ថែមលើប្រេងឥន្ធនៈខ្ពស់ ដើម្បីទូទាត់ថ្លៃដើមប្រតិបត្តិការ និងរក្សាប្រតិបត្តិការឱ្យមានស្ថេរភាព។

ការស្ទង់មតិបន្ទាន់របស់ CAAV កាលពីថ្ងៃសុក្រ លើក្រុមហ៊ុនអាកាសចរណ៍អន្តរជាតិ និងក្នុងតំបន់ជិត ៤០ ដែលមានប្រតិបត្តិការជើងហោះហើរទៅវៀតណាម បានបង្ហាញថា ជាង ៦០% បានអនុវត្តការដំឡើងថ្លៃសំបុត្ររួចហើយ ឬគ្រោងកែសម្រួលតម្លៃសំបុត្រយន្តហោះឱ្យស៊ីនឹងការចំណាយ ដោយចាប់ផ្តើមពីពាក់កណ្តាលខែមីនា។

លទ្ធផលនៃការស្ទង់មតិដដែលបង្ហាញថា និន្នាការដំឡើងថ្លៃគ្របដណ្ដប់ទូទាំងទីផ្សារអន្តរជាតិ ទាំងនៅអាស៊ី អឺរ៉ុប និងអាមេរិកខាងជើង ដែលឆ្លុះបញ្ចាំងពីសម្ពាធថ្លៃដើមកាន់តែខ្លាំងសម្រាប់ឧស្សាហកម្មអាកាសចរណ៍ពិភពលោក។

ក្រុមហ៊ុនអាកាសចរណ៍នៅអាស៊ីឦសាន រួមទាំងតៃវ៉ាន់ ចិន ជប៉ុន និងកូរ៉េខាងត្បូង បានបង្កើនតម្លៃចន្លោះពី ៣០០,០០០ ដុង (១១,៥ ដុល្លារអាមេរិក) ដល់ជិត ៣ លានដុង/សំបុត្រ។ ១ លានដុង គឺស្មើនឹង ៣៨-៣៩ ដុល្លារ។

ទន្ទឹមនឹងនេះ អាស៊ីអាគ្នេយ៍ និងអាស៊ីខាងត្បូង បានបង្កើនតម្លៃតិចតួច ចាប់ពីប្រហែល ១៣០ ០០០ ដុង ដល់ប្រហែល ១,៦ លានដុង/សំបុត្រ។

សម្រាប់ផ្លូវហោះហើរផ្លូវឆ្ងាយទៅកាន់អឺរ៉ុប និងអាមេរិកខាងជើង ការគិតថ្លៃបន្ថែមជាធម្មតាមានចាប់ពី ១ លានដុង ដល់ជាង ៥ លានដុង/សំបុត្រ ហើយអាចខ្ពស់ជាងនេះសម្រាប់កៅអីថ្នាក់អាជីវកម្ម (Business Class)៕