សេដ្ឋកិច្ច
មាសលក់លើទីផ្សារកម្ពុជាបច្ចុប្បន្ន នាំចូលពីប្រទេសណាខ្លះ?
កម្ពុជា នាំចូលមាសពីបណ្តាប្រទេសជាច្រើន ប៉ុន្តែមាសដែលអ្នកលក់ និងពលរដ្ឋពេញនិយមប្រើប្រាស់បំផុត គឺមាសនាំចូលពីប្រទេសស៊្វីស។
កញ្ញា ហុង ហ៊ុយហ្គិច ម្ចាស់ហាងលក់មាស គា ឃីម នៅផ្សារសាលាលេខ៥ ខេត្តកំពង់ឆ្នាំង បានឲ្យកម្ពុជាថ្មីដឹងថា មាសដែលកំពុងចរាចរណ៍នៅកម្ពុជាបច្ចុប្បន្ន ភាគច្រើននាំចូលពីប្រទេសស្វ៊ីស ព្រោះមាសនៅប្រទេសនេះមានគុណភាពល្អ និងពេញនិយមប្រើប្រាស់នៅកម្ពុជា។ កញ្ញាលើកឡើងដូច្នេះថា« និយាយទៅមាសគីឡូដុំ គឺមាសស្វ៊ីសនេះហើយដែលល្អជាងគេនៅកម្ពុជា មានលក់ច្រើនទាំងហាងតូច និងហាងធំៗ។ តាមពិតទៅមាស មានមកពីច្រើនកន្លែងណាស់ ប៉ុន្តែមាសដែលល្បី គេជឿជាក់ថាមាសសុទ្ធ និងគេជាវប្រើប្រាស់ច្រើនបំផុត គឺមាសស្វ៊ីស»។
កញ្ញា ហុង ហ៊ុយហ្គិច បន្ថែមថា ប៉ុន្មានថ្ងៃនេះ មាសចាប់ផ្តើមមានសន្ទុះទិញលក់កើនឡើងវិញ ពោលគឺក្នុងសប្តាហ៍នេះមាស ១តម្លឹងមានតម្លៃ ២២៤០ដុល្លារ ពោលគឺឡើងថ្លៃ ២០ដុល្លារ បើធៀបនឹងសប្តាហ៍មុន។ ទោះយ៉ាងណា កញ្ញាបានបញ្ជាក់ថា តម្លៃមាសមិននៅថេរនោះទេ គឺឡើងចុះជាប្រចាំទៅតាមទីផ្សារអន្តរជាតិ។
ដូចគ្នានេះដែរ លោក ទី មង្គល ម្ចាស់ហាងមាសពេជ្រទីមង្គល បានប្រាប់កម្ពុជាថ្មី នៅថ្ងៃសុក្រនេះថា តម្លៃមាសមានសន្ទុះឡើងថ្លៃខ្លាំងរយៈពេល២ថ្ងៃចុងក្រោយនេះ ពោលគឺកាលពីថ្ងៃទី ១១ ខែវិច្ឆិកា មាស១តម្លឹងតម្លៃចន្លោះពី ២២៣០-២២៤០ដុល្លារឡើងចុះតាមហាងឆេង។ លោក មង្គល បានឲ្យដឹងទៀតថា កាលពីខែមុន មាសមានតម្លៃត្រឹមតែ ១តម្លឹង ២២១០ដុល្លារប៉ុណ្ណោះ។ បើតាមការប៉ាន់ស្មានរបស់លោក ទី ម៉ង្គល មានបទពិសោធន៍ក្នុងវិស័យមាសជាង ៦ឆ្នាំមកហើយនោះ បានលើកឡើងថា មាសអាចនៅបន្តឡើងថ្លៃដល់ចុងខែវិច្ឆិកានេះ ប៉ុន្តែការប្រែប្រួលយ៉ាងណាទៀតនោះ អាស្រ័យទៅលើស្ថានការសេដ្ឋកិច្ចពិភពលោក។
ផ្ទុយពីការលើកឡើងរបស់អាជីវករ លោក ឡុង សំណាង ប្រធានផ្នែកប្រឹក្សាយោបល់ ហិរញ្ញវត្ថុ នៃក្រុមហ៊ុនហ្គោលដេន អេហ្វអិកស៍ លីងឃែភីថល មើលឃើញថា កម្ពុជា ភាគច្រើននាំចូលមាសពីប្រទេសចិន ដោយយោងតាមទំនាក់ទំនងកិច្ចសហប្រតិបត្តិការរវាងទាំងពីរ។ ប៉ុន្តែលោកយល់ស្របចំពោះការលើកឡើងថា តម្លៃមាសឡើងថ្លៃនៅអំឡុងពេលនេះ។ លោក សំណាង បានកត់សម្គាល់ថា តម្លៃមាសឡើងថ្លៃខ្លាំងដោយសារអត្រាអតិផរណានៅសហរដ្ឋអាមេរិក។ លោកថា «មួយរយៈនេះលុយដុល្លារធ្លាក់ថ្លៃខ្លាំងដោយសារឥទ្ធិពលអតិផរណានៅអាមេរិកកើនទ្វេ ដែលធ្វើឲ្យទំនិញកើនឡើងដល់ ៥.៨% ។ ជាធម្មតាតម្លៃមាសឡើងចុះ មើលលើតម្លៃលុយដុល្លារ និងតម្រូវការផ្គត់ផ្គង់មាស»។ លោក សំណាង បន្ថែមថា មាសអាចនឹងចុះថ្លៃនៅដើមឆ្នាំ ២០២២ ខាងមុខ ប៉ុន្តែនឹងអាចឡើងថ្លៃវិញនៅមុនចូលឆ្នាំខ្មែរ។
«បើពលរដ្ឋចង់ទិញមាសទុកចំណេញ អាចរង់ចាំក្រោយចូលឆ្នាំខ្មែរ ព្រោះមាសនឹងអាចចុះថ្លៃបន្តិចវិញ» នេះបើតាមការវិភាគរបស់លោក ឡុង សំណាង»។
បន្ថែមលើនេះ លោក ឡុង សំណាង បានសង្កត់ធ្ងន់ថា មាសក៏បានជួយទ្រទ្រង់វិស័យសេដ្ឋកិច្ចកម្ពុជាខ្លាំងផងដែរ។ ដោយលោកមើលឃើញថា គ្រប់ប្រទេសទាំងអស់ តែងតែមានមាសតម្កល់ទុក ដើម្បីការពារពេលប្រទេសជួបវិបត្តិសេដ្ឋកិច្ច គឺមានមាសទុកសម្រាប់ដោះស្រាយ៕
អត្ថបទ៖ ទួន សុផល
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?