Connect with us

សេដ្ឋកិច្ច

មន្ត្រីជំនាញ៖ ទំហំជួញដូរ និងការវិនិយោគ​លើវិស័យមូលបត្រ​នៅកម្ពុជា កើនឡើងខ្ពស់

បានផុស

នៅ

មន្ត្រីជំនាញផ្នែកទីផ្សារមូលបត្រនៅកម្ពុជាបានអះអាងថា បច្ចុប្បន្នទោះបីជាមានបញ្ហាជំងឺកូវីដ១៩ ក៏ទំហំជួញដូរ និងការវិនិយោគលើវិស័យមូលបត្រនៅកម្ពុជា មានការកើនឡើងខ្ពស់គួរឱ្យកត់សម្គាល់ ដោយសារមានការគាំទ្រពីក្រុមហ៊ុនវិនិយោគថ្មីៗ និងតួអង្គពាក់ព័ន្ធជាច្រើនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីប្រគល់ និងទទួលវិញ្ញាបនបត្រទទួលស្គាល់ជាភ្នាក់ងាររក្សាសុវត្ថិភាពក្នុងវិស័យមូលបត្រដល់ធនាគារ អេស៊ីលីដា ភីអិលស៊ី កាលពីរសៀលថ្ងៃទី១២ខែឧសភា លោក ហុងសុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានមានប្រសាសន៍ថា ទីផ្សារមូលបត្រកម្ពុជា មានការរីកចំរើនពីមួយឆ្នាំទៅមួយឆ្នាំទាំងការវិនិយោគ និងទំហំជួញដូរ។ ជាក់ស្តែងចាប់ពីឆ្នាំ ២០០៨ ដល់ឆ្នាំ២០១៨ ទំហំការជួញដូរជាមធ្យមក្នុង១ថ្ងៃ មានត្រឹមក្រោមឬលើស១ម៉ឺនដុល្លារប៉ុណ្ណោះ តែដល់ឆ្នាំ២០១៨ បានកើនឡើងដល់ទៅជាង ២ម៉ឺនដុល្លារ។

លោកបានបន្តថា ឆ្នាំ ២០១៨ ជាឆ្នាំដែលចាប់ផ្តើមមានសន្ទុះកើនឡើងនៃការជួញដូរមូលបត្រដោយ​ឆ្នាំ២០១៩បានបន្តកើនឡើងដល់ជិត១៦ម៉ឺនដុល្លារក្នុង១ថ្ងៃ។

លោកបានបន្តទៀតថា ជាអកុសលនៅឆ្នាំ២០២០បានធ្លាក់ចុះនៅសល់ត្រឹម ១១ម៉ឺនដុល្លារដោយសារវិបត្តិជំងឺកូវីដ១៩។ ប៉ុន្តែសំណាងល្អដោយសារកម្ពុជាបានចាត់វិធានការបានយ៉ាងល្អរបស់ប្រមុខរដ្ឋាភិបាលយើងឆាប់បានវិលត្រឡប់ទៅរកស្ថានភាពល្អប្រសើរជាងមុន ដែលធ្វើឱ្យ២០២១ មានទំហំជួញដូរបានកើនឡើក្នុងទំហំ ២៧ម៉ឺដុល្លារ និងចំនួនគណជួញដូរបើកថ្មីក៏មានច្រើន ដោយជាមធ្យមក្នុង១ខែមានវិនិយោគិនថ្មីបើកគណនីថ្មីចន្លោះពី២០០ទៅ៥០០។

លោក ហុង សុហួរ បានបន្ថែមថា«ទោះបីជាវានៅមិនទាន់ដល់កម្រិតដែលយើងចង់បាន​ក៏ដោយតែវាស្ថិតនៅ​ផ្លូវហ្នឹងហើយ។ អ៊ីចឹងការចូលរួមរបស់តួអង្គថ្មីៗដូចជាក្រុមហ៊ុនមូលប័ត្រថ្មី​ក្រុមហ៊ុនថែរក្សាទ្រព្យសម្បត្តិជំនួស​មានក្រុមហ៊ុនគ្រប់គ្រងមូលនិធិផ្សេងៗដែលនិយ័តករកម្ពុជាបានផ្តល់អាជ្ញាប័ណ្ណជាដើមធ្វើឱ្យហេដ្ឋារចនាសម្ព័ន្ធយើងកាន់តែពេញលេញអាចស្វាគមន៍វិនិយោគិនបានជាច្រើនប្រភេទ»។

ធនាគារអេស៊ីលីដាជាតួអង្គមួយយ៉ាងសំខាន់នៅក្នុងផ្សារមូលបត្រម្ពុជានិងបានធ្វើឱ្យទំហំការជួញដូរមានការកើនឡើងនិងធ្វើឱ្យទីផ្សារកើនឡើង បើកគណនីថ្មីនិងការចាប់អារម្មណ៍ពីសាធារណៈជនក៏មានការកើន​ឡើងដែរចាប់​តាំងពីទីផ្សារមូលបត្រកម្ពុជាបានដំណើរការ ១០ឆ្នាំមកហើយ គិតមកដល់ឆ្នាំ២០២២នេះ។ នេះបើតាមលោក ហុង សុហួរ។

លោកសង្ឃឹមថា ២ទៅ៣ឆ្នាំខាងមុខ ទំហំជួញដូរនឹងឡើងដល់១លានដុល្លារជាមធ្យមក្នុង១ថ្ងៃហើយវិនិយោគិន នឹងកើនឡើងដល់ ១០ម៉ឺនគណនីជាមួយនឹងការបើកប្រព័ន្ធចល័តជាផ្លូវការក៏ដូចជាការអនុញ្ញាតឱ្យបើក​គណនីបានតាមប្រព័ន្ធអនឡាញ ខណៈបច្ចុប្បន្ននេះយើងកំពុងធ្វើការ និងដោះស្រាយបញ្ហាមួយចំនួនជាមួយ​និយ័តករកម្ពុជា និងតួអង្គពាក់ព័ន្ធ ដើម្បីជាកក្តាមួយទៀត ចូលរួមទីផ្សារមូលបត្ររបស់វិនិយោគិន។

លោកបានបញ្ជាក់ថា នៅក្នុងរយៈពេល៤ខែដំបូងឆ្នាំ២០២២នេះ ដោយសារមានការជួញដូរធំៗពីក្រុមហ៊ុនមួយចំនួន បានសម្រេចជាមធ្យម១លានដុល្លារក្នុង១ថ្ងៃ។លោកបានបន្ថែមទៀតថា «ក្តីស្រមៃរបស់យើងគឺ២ទៅ៣ឆ្នាំខាងមុខ​ទំហំការជួញដូរឱ្យបាន១លានដុល្លារក្នុង១ថ្ងៃដដែលដែលបានមកពីការចូលរួមពីអ្នកវិនិយោគិនតូចៗហើយ៦ទៅ៧ឆ្នាំបន្ទាប់ទៀតយើងនឹងដាក់គោលដៅឱ្យបាន៥០លានដុល្លារជាមធ្យមក្នុង១ថ្ងៃ»៕សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម