ថៃ សង្ឃឹមទទួលបានភ្ញៀវទេសចរ សិង្ហបុរី ជាង ៥០ ម៉ឺននាក់ក្នុងឆ្នាំនេះ

អជ្ញាធរទេសចរណ៍ថៃ (TAT) រំពឹងថា ដំណាច់ឆ្នាំនេះ ថៃនឹងអាចទទួលបានភ្ញៀវទេសចរសិង្ហបុរីប្រមាណជាង ៥០ ម៉ឺននាក់មកកម្សាន្តក្នុងប្រទេស ។

លោក Tanes Petsuwan អនុប្រធាន TAT ប្រចាំតំបន់អាស៊ី និងប៉ាស៊ីហ្វិកខាងត្បូង បាននិយាយថា បន្ទាប់ពីប្រទេសបើកការហោះហើរឲ្យមានដំណើរការធម្មតាវិញ នៅក្នុងត្រីមាសទី ៤ នេះ ភ្នាក់ងារទេសចរណ៍ថៃ សង្ឃឹមខ្ពស់ថា ទេសចរសិង្ហបុរី នឹងអាចមានកំណើនដល់ ១៥ ម៉ឺននាក់ ចូលកម្សាន្តក្នុងប្រទេសថៃ ហើយនឹងឡើងដល់ ៥០ ម៉ឺននាក់សម្រាប់ឆ្នាំ ២០២២ នេះ ។

លោកបានបន្តថា ទីផ្សារនេះ នឹងមានសារៈសំខាន់សម្រាប់រដ្ឋាភិបាលថៃក្នុងការឈានដល់គោលដៅទេសចរណ៍ចំនួន ១០ លាននាក់នៅឆ្នាំនេះ ។

ជាមួយគ្នានោះ ថៃ ក៏មានយុទ្ធនាការ “High Aspirations” ជាមួយសិង្ហបុរី ដែលផ្តោតលើអ្នកដំណើរវ័យក្មេងដែលមានអាយុពី ១៦ ដល់ ១៧ ឆ្នាំដែលមិនធ្លាប់ទៅលេងថៃពីមុន ឲ្យបានមកកម្សាន្តក្នុងប្រទេសនេះ ។

ដោយឡែក គិតត្រឹមថ្ងៃទី ១៩ តុលា កន្លងទៅ ថៃទទួលបានទេចរសិង្ហបុរី ជិត ៣៥ ម៉ឺននាក់ ដែលបានមកទស្សនា ខណៈមកដល់បច្ចុប្បន្ន ថៃទទួលបានទេសចរអន្តរជាតិសរុបប្រមាណជិត ៧ លាននាក់ ៕

ប្រែសម្រួលដោយ ៖ នាង រតនៈ

ប្រភព ៖ Bangkok Post

ចុចអាន ៖ ដឹងមូលហេតុដែលលោក ហ៊ូ ជីនតាវ ចេញពីសមាជបក្សកុម្មុយនិស្ត ចិន