យោងតាមធនាគារពិភពលោក (WB) បានឲ្យដឹងថា ធនាគារជាតិវៀតណាមត្រូវតែបង្កើនកិច្ចខិតខំប្រឹងប្រែងក្នុងការគ្រប់គ្រងវិស័យធនាគាររបស់ប្រទេស និងរៀបចំការពារគ្រប់កាលៈទេសៈដែលអាចកើតមានទាំងអស់ ជាពិសេសត្រូវអន្តរាគមន៍ឲ្យទាន់ពេលវេលា និងប្រកបដោយប្រសិទ្ធភាព ។

លោកស្រី Carolyn Turk នាយក WB ប្រចាំប្រទេសវៀតណាមបាននិយាយថា សេដ្ឋកិច្ចពិភពលោកទំនងជានឹងឈានចូលដល់ដំណាក់កាលនៃភាពចលាចល ខណៈពេលដែលកំពុងមានកំណើនយឺត ការថយចុះតម្រូវការ អតិផរណាខ្ពស់ និងធនាគារកណ្តាលជុំវិញពិភពលោករឹតបន្តឹងឥណទានជាដើម ។

ការអត្ថាធិប្បាយរបស់លោកស្រី Turk ត្រូវបានធ្វើឡើង បន្ទាប់ពីធនាគារអាមេរិកចំនួន ៣ ដូចជា ធនាគារ Silicon Valley Bank, ធនាគារ Silvergate និងធនាគារ Signature Bank បានដួលរលំក្នុងរយៈពេលត្រឹមមួយសប្តាហ៍ ។

លោកស្រីបាននិយាយថា ផលប៉ះពាល់នៃព្រឹត្តិការណ៍បែបនេះ ទំនងជានឹងកើតឡើងក្នុងរយៈពេលដ៏ខ្លី ហើយផលវិបាកក៏កើតឡើងនៅទូទាំងទីផ្សារហិរញ្ញវត្ថុពិភពលោក ដែលបញ្ជាឲ្យអ្នកបង្កើតគោលនយោបាយ យកចិត្តទុកដាក់ និងរៀបចំផែនការសម្រាប់អន្តរាគមន៍ចាំបាច់ ។

លោកស្រីបាននិយាយថា មានភាពស្រដៀងគ្នាជាច្រើនដែលអាចកើតមានឡើង រវាងធនាគារអាមេរិកដែលទើបប្រកាសក្ស័យធន និងប្រព័ន្ធធនាគារវៀតណាម ជាពិសេសនៅក្នុងធនាគារតូចៗ ។

យោងតាមរបាយការណ៍របស់ធនាគារពិភពលោកដែលចេញផ្សាយកាលពីថ្ងៃទី ១៣ ខែមីនា បានឲ្យដឹងថា កំណើនសេដ្ឋកិច្ចរបស់ប្រទេសវៀតណាម នឹងថយចុះមកត្រឹម ៦.៣ ភាគរយនៅឆ្នាំ ២០២៣ ខណៈកាលពីឆ្នាំ ២០២២ មានកំណើនដល់ ៨ ភាគរយ ដោយសារតែកំណើនសេវាកម្មមានកម្រិត ក៏ដូចជាអត្រាការប្រាក់ខ្ពស់ ដែលធ្វើឲ្យប៉ះពាល់ដល់អ្នកវិនិយោគ ៕

ប្រែសម្រួលដោយ ៖ ជីវ័ន្ត

ប្រភព ៖ Vietnam Plus

ចុចអាន ៖ ធនាគារមួយទៀតរបស់ អាមេរិក ក៏កំពុងដាំក្បាលចុះក្រោម