រដ្ឋមន្ត្រីរតនាគារ អាមេរិក ថា ស្ថាប័នចំនួន ២ មានសារៈសំខាន់ធ្វើឲ្យមាន​តុល្យភាពសេដ្ឋកិច្ចជាមួយ ចិន

រដ្ឋមន្ត្រីក្រសួងរតនាគារអាមេរិក លោកស្រី Janet Yellen បាននិយាយកាលពីពេលថ្មីៗនេះថា ស្ថាប័នហិរញ្ញវត្ថុអន្តរជាតិ (IFIs) ដូចជា ធនាគារពិភពលោក និងមូលនិធិរូបិយវត្ថុអន្តរជាតិ (IMF) មានសារៈសំខាន់ណាស់ក្នុងការធ្វើឲ្យមានតុល្យភាពសេដ្ឋកិច្ចជាមួយប្រទេសចិន ។

លោកស្រី Yellen បានលើកឡើង អំឡុងពេលផ្តល់សក្ខីកម្មនៅចំពោះមុខគណៈកម្មាធិការហិរញ្ញវត្ថុថា ស្ថាប័នទាំងនេះឆ្លុះបញ្ចាំងពីតម្លៃរបស់អាមេរិក ។ ជំនួយពី IFIs ភ្ជាប់មកជាមួយនូវតម្រូវការដ៏រឹងមាំសម្រាប់អភិបាលកិច្ច គណនេយ្យភាព និងនិរន្តរភាពបំណុល ។ វាបម្រើជាបន្ទុកដ៏សំខាន់ចំពោះការផ្តល់ប្រាក់កម្ចីមិនតម្លាភាព និងគ្មាននិរន្តរភាពពីប្រទេសផ្សេងដូចជា ចិនជាដើម ។

ប៉ុន្មានឆ្នាំកន្លងមកនេះ សារៈសំខាន់នៃស្ថាប័នទាំងនេះ គឺជាផ្នែកមួយនៃកញ្ចប់ឧបករណ៍គោលនយោបាយសេដ្ឋកិច្ច និងគោលនយោបាយបរទេសដ៏ទូលំទូលាយរបស់អាមេរិក ។ ទន្ទឹមនោះ ស្ថាប័នហិរញ្ញវត្ថុអន្តរជាតិក៏បានជំរុញផលប្រយោជន៍ជាតិអាមេរិកផងដែរ ជាពិសេសជំរុញសេដ្ឋកិច្ចពិភពលោកឲ្យកាន់តែមានភាពធន់ជាងមុន ។

លោកស្រី Yellen បានកត់សម្គាល់ថា IMF បានអនុម័តកម្មវិធីសេដ្ឋកិច្ច ១៥ ពាន់លានដុល្លារសម្រាប់អ៊ុយក្រែននៅដើមឆ្នាំនេះ ដែលនឹងជួយដល់តម្រូវការហិរញ្ញវត្ថុភ្លាមៗរបស់ប្រទេសនេះ។ មិនតែប៉ុណ្ណោះ ធនាគារពិភពលោក​ក៏មានបំណងបន្ថែម ៥០ ពាន់លានដុល្លារ​ក្នុងកញ្ចប់ផ្តល់ប្រាក់កម្ចី​បន្ថែមក្នុងទសវត្សរ៍ក្រោយផងដែរ ។

ជាចុងក្រោយប្រធានរតនាគាររូបនេះបញ្ជាក់ថា IFIs ផ្តល់ធនធានដើម្បីដោះស្រាយបញ្ហាប្រឈមដែលពិភពលោកកំពុងជួប ដូចជា ការយកឈ្នះលើការលំបាកផ្នែកសេដ្ឋកិច្ច និងការលើកទឹកចិត្តដល់ការអភិវឌ្ឍន៍សេដ្ឋកិច្ចរយៈពេលវែងជាដើម ៕

ប្រែសម្រួល៖ នាង រតនៈ

ប្រភព៖ Anadolu

ចុចអាន ៖ ៥ ខែដំបូងនៃឆ្នាំនេះ វៀតណាម កើបចំណូលពីការនាំចេញទុរេនជាង ៥០០ លានដុល្លារ