គណៈប្រតិភូធុរកិច្ចកម្ពុជា​ប្រចាំទីក្រុង Montreal ​ស្វែងយល់ពីសក្ដានុពលវិនិយោគនៅកម្ពុជា ដើម្បីផ្សព្វផ្សាយទៅប្រទេសកាណាដា​

គណៈប្រតិភូធុរកិច្ចនៃការិយាល័យតំណាងសភាពាណិជ្ជកម្មកម្ពុជាប្រចាំទីក្រុង Montreal តំណាង​ដោយ លោក Kelvin Mo ប្រធានសភាពាណិជ្ចកម្ម មានបំណងស្វែងយល់អំពីសក្តានុពល និងកា​លានុវត្តភាពវិនិយោគនៅកម្ពុជា ជាពិសេសការវិនិយោគក្នុងវិស័យកសិកម្ម និងការកែច្នៃ វិស័យទេសចរណ៍ សុខាភិបាល អចនទ្រព្យ សេវាកម្ម និងឧស្សាហកម្ម ដើម្បីបន្តផ្សព្វផ្សាយទៅសហគមន៍កាណាដាមកបណ្ដាក់ទុននៅកម្ពុជា។

លោក នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជានៅព្រឹកថ្ងៃទី ០៥ ​ខែមិថុនា ឆ្នាំ ២០២៤​ បានដឹកនាំសហការីទទួលជួប គណៈប្រតិភូធុរកិច្ចកម្ពុជា​ប្រចាំទីក្រុង Montreal ប្រទេសកាណាដា។

​លោក នុត អ៊ុនវ័ណរ៉ា ​មានប្រសាសន៍ថា​ វឌ្ឍនភាពចុងក្រោយ​នៃការអភិវឌ្ឍរបស់​កម្ពុជាដែលស្តែងចេញតាមរយៈស្ថិរភាពនយោបាយ ម៉ាក្រូសេដ្ឋកិច្ចដែលមានលំនឹង និងកំណើន​ឥតឈប់ឈរនៃរំហូរវិនិយោគ។

លោក នុត អ៊ុនវ័ណរ៉ា ក៏បានគូសរំលេចអំពីបច្ចុប្បន្នភាព​នៃបរិយាកាស​វិនិយោគនៅកម្ពុជាដែលកាន់តែមានភាពបើកចំហ ទាក់ទាញ និងងាយស្រួល​សម្រាប់​ការបណ្តាក់ទុនវិនិយោគលើគ្រប់វិស័យ ជាពិសេសការគាំទ្ររបស់រាជរដ្ឋាភិបាលដល់ប្រព័ន្ធសេដ្ឋកិច្ច​ទីផ្សារតាមរយៈការធានានូវក្របខ័ណ្ឌច្បាប់ដែលមានប្រសិទ្ធភាព ការដាក់ចេញនូវ​ក្របខ័ណ្ឌ​គោលនយោ​បាយ និងផ្ដល់ការលើកទឹកចិត្តដល់ការវិនិយោគ និងការវិនិយោគយ៉ាងសន្ធឹក​សន្ធាប់​ទៅលើធនធានមនុស្ស និងប្រព័ន្ធហេដ្ឋារចនាសម្ព័ន្ធរូបវន្តចាំបាច់នានា ដើម្បីបង្កើនឧត្តមភាព​ប្រកួតប្រជែងរបស់កម្ពុជា។

ជាការឆ្លើយតប លោក Kelvin Mo បានសម្តែងនូវសុទិដ្ឋិនិយមថា ព័ត៌មានដែលការិយាល័យតំណាងទទួលបានយ៉ាងគ្រប់ជ្រុងជ្រោយនាឱកាសដំណើរទស្សនកិច្ចមកកាន់កម្ពុជាក្នុងពេលនេះគឺបានផ្តល់នូវមូលដ្ឋានគ្រប់ជ្រុងជ្រោយសម្រាប់គណៈប្រតិភូដែលរួមដំណើរនាពេលនេះ ហើយក៏នឹងសម្រាប់ពាំនាំយកទៅផ្សព្វផ្សាយជូនសហគមន៍ធុរកិច្ចនៅកាណាដាដែលមានបំណងពង្រីកសកម្មភាពវិនិយោគ និងធុរកិច្ចរបស់ខ្លួននៅកម្ពុជាផងដែរ៕