ព័ត៌មានអន្ដរជាតិ

ម៉ាឡេស៊ីកំណត់គោលដៅក្លាយជាមជ្ឈមណ្ឌល AI របស់សកល

បានផុស

២ years មុន

នៅ

ថ្ងៃពុធ ៣១ កក្កដា ២០២៤

ដោយ

អនុរដ្ឋមន្ត្រីក្រសួងឌីជីថលរបស់ម៉ាឡេស៊ី លោក Datuk Wilson Ugak Kumbong បាននិយាយថា រដ្ឋាភិបាលម៉ាឡេស៊ីបានចាប់យកឱកាសនៃការរីកចម្រើនរបស់បញ្ញាសិប្បនិមិត្ត (AI) ដើម្បីកែប្រែប្រទេសឱ្យក្លាយជាមជ្ឈមណ្ឌល AI របស់សកលលោក។ នេះបើតាមការចុះផ្សាយរបស់កាសែត The Star កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថ្លែងក្នុងកិច្ចប្រជុំកំពូលមួយក្រោមប្រធានបទ «ការផ្លាស់ប្តូរសេដ្ឋកិច្ចឌីជីថលសកលជាមួយ AI បង្កើត» ថា រដ្ឋាភិបាលម៉ាឡេស៊ីនឹងសម្រេចគោលដៅនេះ ដោយផ្តោតលើទិដ្ឋភាព៣ក្នុងពេលដំណាលគ្នា រួមមាន ធនធានមនុស្សផ្នែក AI ហេដ្ឋារចនាសម្ព័ន្ធ AI និងភាពជាអ្នកដឹកនាំសកលនៅក្នុងខ្សែសង្វាក់ផ្គត់ផ្គង់ AI ។

អនុរដ្ឋមន្រ្តីដដែល លោកបានកត់សម្គាល់ឃើញថា ម៉ាឡេស៊ីស្ថិតក្នុងទីតាំងដ៏ល្អមួយសម្រាប់កសាងធនធានមនុស្សផ្នែក AI ទូទាំងប្រទេស ទាំងតាមរយៈការលើកកម្ពស់គុណភាពជីវិតសម្រាប់ប្រជាជន និងការបង្កើតថ្មីដោយប្រើ AI បង្កើត (Generative AI) ដែលឈានមុខគេក្នុងពិភពលោក។

ចំពោះហេដ្ឋារចនាសម្ព័ន្ធ AI លោកបានចង្អុលបង្ហាញថា ប្រព័ន្ធកុំព្យូទ័រ AI ត្រូវបានផ្តល់ជូននៅក្នុងមជ្ឈមណ្ឌលទិន្នន័យដែលតភ្ជាប់ទៅបណ្តាញអគ្គិសនី និងបណ្តាញទូរគមនាគមន៍។ ដូច្នេះហើយ នេះបានក្លាយជាធនធានជាតិដែលម៉ាឡេស៊ីត្រូវការដើម្បីជំរុញកំណើនសេដ្ឋកិច្ចរបស់ខ្លួន ដែលដឹកនាំដោយ AI។

ពាក់ព័ន្ធនឹងការកសាងខ្សែសង្វាក់ផ្គត់ផ្គង់ AI លោកបានចែករំលែកថា ក្នុងនាមជាអ្នកចាប់ផ្តើមដំបូងក្នុងការផ្លាស់ប្តូរសេដ្ឋកិច្ចដែលដឹកនាំដោយ AI នោះម៉ាឡេស៊ីអាចក្លាយជាអ្នកនាំមុខគេរបស់ពិភពលោកលើវិស័យនេះ។

លោកបាននិយាយថា៖ «ភាពជាអ្នកដឹកនាំសកល នឹងជំរុញកំណើនដែលដឹកនាំដោយ AI នៅក្នុងសេដ្ឋកិច្ចម៉ាឡេស៊ី ឱ្យលើសពីការប៉ាន់ស្មានរបស់ក្រុមហ៊ុនប្រឹក្សា McKinsey»។

គួរគូសបញ្ជាក់ថា ការសិក្សារបស់ McKinsey ក្នុងឆ្នាំ ២០១៨ បានបង្ហាញថា AI អាចបន្ថែមកំណើនប្រហែល ១,២ ភាគរយដល់សេដ្ឋកិច្ចម៉ាឡេស៊ី និងលើសពីកម្រិតកំណើនមូលដ្ឋានពី ៤,៥ ភាគរយ ទៅ ៥ ភាគរយ៕