កម្ពុជាទទួលបានអ្នកអ្នកដំណើរ ចេញ-ចូលតាមផ្លូវអាកាស​ជាង ៣លាននាក់ក្នុងឆមាសទី១

ទោះបីជាកំណើនភ្ញៀវទេចរអន្តរជាតិដែលមកកាន់ប្រទេសកម្ពុជាហាក់មានកំណើននៅទាបជាងចំនួនមុនការរីករាលដាលនៃជំងឺកូវីដ១៩ក្តី ប្រទេសនៅក្នុងតំបន់​អាស៊ីអាគ្នេយ៍​មួយ​នេះ​បានស្វាគមន៍ភ្ញៀវទេចរជាតិនិងអន្តរជាតិជាង៣លាននាក់ដែល​បាន​ធ្វើដំណើតាម​ផ្លូវអាកាស។​

បើយោងតាមរបាយការណ៍ពីអាកាសចរណ៍ស៊ីវិលដែលកម្ពុជាថ្មីទទួលបាននៅព្រឹកថ្ងៃទី៩ខែសីហា ចំនួនអ្នកដំណើរចេញ-ចូល មានប្រមាណជាង ៣លាននាក់ (៣,០៣៦,៩៤៤ នាក់) ក្នុងនោះរួមមានអ្នកដំណើរអន្តរជាតិ(ក្រៅស្រុក) មានចំនួន ២,៨៨៤,៧៤៦នាក់ (ទ្វេទិស) ខណៈអ្នកដំណើរក្នុងស្រុក មានចំនួន ១៥២,១៩៨នាក់ (ទ្វេទិស)

ជាមួយគ្នានោះដែរ ​ចំនួនជើងហោះហើរ ចេញ-ចូល​ (ទ្វេទិស) អាកាសយានដ្ឋានអន្តរជាតិអន្តរជាតិទាំងបី(០៣) ​ ភ្នំពេញ-សៀមរាប-ព្រះសីហនុ) មាន ២៨,៧២៥ ជើង​។ ដោយក្នុងនោះជើងហោះហើរអន្តរជាតិ(ក្រៅស្រុក) មានចំនួន ២៥,៩១៧ ជើង (ទ្វេទិស) ខណៈជើងហោះក្នុងស្រុក មានចំនួន ២,៨០៨ ជើង (ទ្វេទិស) ដោយមិនរាប់បញ្ជូលការហោះហើររំលង និងការហោះហើរផ្សេងៗ។

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា បាន​ប្រាប់​កម្ពុជាថ្មី ក្នុងអំឡុងពេល​ស្ថានភាព​សេដ្ឋកិច្ចពិភពលោក​បន្ត​ជួប​វិបត្តិ​ដូចជា កូ​វីដ​ ១៩ សង្គ្រាម​រវាង​រុស្ស៊ី​-​អ៊ុយ​ក្រែ​ន និង​បញ្ហា​អតិផរណា​នោះ ការធ្វើដំណើរ​ពី​កន្លែង​ ១​ ទៅ​កន្លែង ​១ ជាពិសេស​ការធ្វើដំណើរ​ឆ្លង​ប្រទេស​ឆ្ងាយៗ​គឺ​ពុំ​សូវ​មាន​ទេ​។

លោក​បន្តថា៖« ក្នុងដំណាក់កាល​នេះ​ភ្ញៀវទេសចរ​បរទេស​ដែល​មក​កម្ពុជា ភាគច្រើន​ជា​ប្រជាជន​ក្នុង​តំបន់ ឬ​មកពី​ប្រទេស​មាន​ព្រំដែន​ជាប់​គ្នា​តែប៉ុណ្ណោះ ព្រោះ​ងាយស្រួល​ធ្វើដំណើរ​ដោយ​អាច​តាម​ផ្លូវគោក ផ្លូវទឹក និង​ផ្លូវអាកាស​»។​

​លោក​ថ្លែងថា​៖ «​យើងទាំងអស់គ្នាដឹងហើយថាសារ​ស្ថានភាព​ពិភពលោក​បន្ត​ស្ថិតក្នុង​ភាពមិន​ច្បាស់​លាស់ ដូច្នេះ​ខ្ញុំ​ពិតជា​ពិបាក​ព្យាករ​ថា វិស័យ​ទេសចរណ៍​កម្ពុជា ក៏ដូចជា​ការ​មកដល់​របស់​ភ្ញៀវ​តាមផ្លូវ​អាកាស​នឹងមាន​ស្ថានភាព​បែបណា​នោះទេដោយសារតែបណ្តាប្រទេសនានាជិតខាងយើងក៏គេបានព្យាយាមទាក់ទាញភ្ញៀវទេចរខ្លាំងណាស់នាពេលបច្ចុប្បន្ន​ដើម្បីជួយស្តារសេដ្ឋកិច្ចរបស់គេ»។ ​

​​បើតាមលោកស៊ីណាន កម្ពុជាត្រូវទាមទារការសហការគ្នាទាំងរដ្ឋនិងវិស័យឯកជន​ក្នុងការ​ចូលរួមផ្សព្វផ្សាយបន្ថែមទៀតដើម្បីទាក់ទាញភ្ញៀវបរទេសកាន់តែច្រើនស្របពេលដែលព្រលានយន្តហោះអន្តរជាតិក្នុងស្រុកក៏កាន់ទេល្អប្រសើរ។

បើយោងតាមរបាយការណ៍ដដែល ​សម្រាប់រយៈពេល ឆមាសទី១ឆ្នាំ ២០២៤ នេះក្នុងនោះចំនួន​ជើងហោះហើរ ចេញ-ចូល (ទ្វេទិស)  អាកាសយានដ្ឋានអន្តរជាតិភ្នំពេញមានចំនួនជិត ២០ពាន់ជើង (១៩,៨៨៧ ជើងកើនឡើង១២.៨៣%) និងអ្នកដំណើរចេញ-ចូល មានចំនួន​ ២,២៨១,៤៩៩នាក់(កើនជាង១៨%) ។ សម្រាប់ចំនួនជើងហោះហើរ ចេញ-ចូល (ទ្វេទិស)  ​អាកាសយានដ្ឋានអន្តរជាតិសៀមរាបអង្គរ ​ មានចំនួនជិត ៨ពាន់ជើង (៧,៧៩០ជើង កើន២៧%)​ និងអ្នកដំណើរចេញ-ចូលមានចំនួនជិត ៧២០ ពាន់នាក់ (៧១៩,៩៨២នាក់ កើន៣៧%) ខណៈចំនួនជើងហោះហើរ ចេញ-ចូល (ទ្វេទិស)  ​អាកាសយានដ្ឋានអន្តរជាតិខេត្តព្រះសីហនុ ​ មានចំនួនជាង ១ពាន់ជើង (១,០៤៨ ជើង កើនជិត៤%)​ និងអ្នកដំណើរចេញ-ចូលមានចំនួនជាង ៣៥ពាន់នាក់ (៣៥,៤៦៣នាក់​ កើនជិត១៣%)៕