ការកក់បន្ទប់ស្នាក់នៅតាមគោលដៅទេសចរណ៍មានតិចតួច ក្នុងឱកាសបុណ្យភ្ជុំបិណ្ឌ

ការកក់បន្ទប់ផ្ទះសំណាក់ សណ្ឋាគារសម្រាប់​ស្នាក់របស់ភ្ញៀវទេសចរក្នុងស្រុកនៅតាមគោល​ដៅ​ទេស​​​ចរណ៍​មួយចំនួន មានតិចតួចក្នុងឱកាសបុណ្យភ្ជុំបិណ្ឌនេះ។

បុគ្គលិកផ្នែកលក់ នៅផ្ទះសំណាក់មណ្ឌលគិរី កញ្ញា លីណា បានប្រាប់ថា ការកក់បន្ទប់ស្នាក់​នៅ​ក្នុង​​ឱកាស​បុណ្យ​ភ្ជុំ​​សម្រាប់ភ្ញៀវទេសចរមានតិចតួច។

ចំណែក អ្នកស្រី ម៉ាលីស បុគ្គលិកនៅសណ្ឋាគារ La Palmeraie d’Angkor Charming Hotel នៅខេត្តសៀមរាប បានឱ្យដឹងដែរថា ការកក់បន្ទប់ស្នាក់នៅសម្រាប់បុណ្យភ្ជុំបិណ្ឌ​សឹងតែគ្មាន​នោះ​ទេ ដោយសារបញ្ហាសេដ្ឋកិច្ច។

ចំណែកបុគ្គលិកផ្នែកលក់នៅខេត្តព្រះសីហនុក៏បានបង្ហើបថា ការកក់បន្ទប់ស្នាក់នៅ​មិនច្រើន​នោះទេ។

លោក ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATACC) ប្រាប់​កម្ពុជាថ្មីនៅថ្ងៃទី ២៧ ខែកញ្ញានេះថា ទម្លាប់ភ្ញៀវទេសចរក្នុងស្រុកមិនសូវមានការកក់ទុកមុនទេ ខណៈពួកគាត់អាងថា មិនសូវមានភ្ញៀវទេសចរ។

លោក ធួន ស៊ីណាន បញ្ជាក់ថា បុណ្យភ្ជុំបិណ្ឌ ១៥ ថ្ងៃនេះ ជាបុណ្យប្រពៃណីជាតិ ហើយជា​បុណ្យ​សាសនា ដែលប្រជាជនកម្ពុជាមានទម្លាប់មួយគឺមានលុយ ឬមិនមានលុយ គឺគាត់ត្រូវតែ​បំពេញកិច្ចរបស់គាត់ហើយ ម្យ៉ាងទៀតពួកគាត់តែតែធ្វើដំណើរទៅស្រុកកំណើត​ដើម្បីជួបជុំញាតិ​មិត្តឪពុកម្ដាយ បងប្អូន ជាទម្លាប់ដូចបុណ្យចូលឆ្នាំ ហើយការដើរកម្សាន្ត ទម្លាប់ជនជាតិយើង​គាត់តែងតែដើរ។

លោក ធួន ស៊ីណាន បន្ថែមថា៖ «ខ្ញុំគិតថា ១០០% ប្រាកដជាមានការដើរលេងកម្សាន្ត ប៉ុន្តែ​គ្រាន់​​តែតិច និងច្រើន យើងមិនទាន់អាចស្មានដឹងនៅឡើយ ឆ្នាំ ២០២៤ នេះសេដ្ឋកិច្ចធ្ងន់​ជាង​ឆ្នាំ​មុន អញ្ចឹងពួកគាត់អាចប្ដូរគោលដៅ ដោយដើររយៈពេលខ្លី វិលល្ងាច ដើម្បីទប់​ទល់​ចំណូល​សេដ្ឋ​កិច្ច​របស់ខ្លួន​»៕

អត្ថបទ៖ ឡេង ដេត