ក្រុមហ៊ុនយក្សចិន BYD ត្រៀមបើករោងចក្រផលិតរថយន្តអគ្គិសនីនៅកម្ពុជានៅឆ្នាំ ២០២៥

ដំណើរការចរចាបង្កើតរោងចក្រផលិតរថយន្តអគ្គិសនីរបស់ក្រុមហ៊ុនចិន BYD បានដល់ដំណាក់កាលចុងក្រោយ ហើយអាចនឹងឈានទៅបើកការដ្ឋានសាងសង់នៅឆ្នាំ ២០២៥ ខាងមុខនេះ។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មាន​ប្រ​សាសន៍​នៅថ្ងៃទី ២៧ ខែវិច្ឆិកាថា ក្រុមហ៊ុនបានរៀបចំឯកសាររួចរាល់ហើយ នៅតែដាក់ជូនសម្ដេចធិបតីក្នុងការពិនិត្យ និងឯកភាព និងដាក់ឯកសារចូលមកក្រុមប្រឹក្សាអភិវឌ្ឍន៍កម្ពុជា។

លោក ស៊ុន ចាន់ថុល ថ្លែងថា ទី១ក្រុមហ៊ុន BYD កំពុងរង់ចាំការសម្រេចចុងក្រោយពីសម្ដេចធិបតី ទី២ ក្រុមហ៊ុនកំពុងចរចាទីតាំង និងរៀបចំឯកសារដាក់ចូលមកក្រុមប្រឹក្សាអភិវឌ្ឍន៍កម្ពុជាបង្កើតឈ្មោះក្រុមហ៊ុន និងរំពឹងថា នឹងបើកការដ្ឋាន​សាងសង់នៅឆ្នាំ ២០២៥ ខណៈលោកមិនទាន់អាចបញ្ជាក់ពីទំហំទុនវិនិយោគបាននៅឡើយទេ ដោយសារក្រុមហ៊ុនកំពុង​សិក្សាពីចំនួនរថយន្តដែលត្រូវដំឡើងក្នុងមួយឆ្នាំ។

រាជរដ្ឋាភិបាលបានកំណត់ការប្រើប្រាស់យានយន្តអគ្គិសនីឱ្យបានជិត៨សែនគ្រឿងត្រឹមឆ្នាំ២០៣០ ដើម្បីឱ្យដើរទន្ទឹមគ្នាទៅនឹងនិន្នាការតំបន់ ​និងសកល ស្របពេលដែលវិស័យនេះមិនត្រឹមតែរួមចំណែកដល់ការការបរិស្ថានប៉ុណ្ណោះទេ ប៉ុន្តែ​ថែម​ទាំងជំរុញកំណើនសេដ្ឋកិច្ច និងពង្រឹងសន្តិសុខថាមពល ជាពិសេសដើរស្របតាមប្តេជ្ញាចិត្តរបស់រដ្ឋាភិបាលក្នុងការសម្រេចឱ្យបាននូវអព្យាក្រឹត​​កាបូននៅត្រឹមឆ្នាំ២០៥០។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន មានប្រសាសន៍ថា គិតមកដល់ពេលនេះកម្ពុជា មានរថយន្តអគ្គិសនីចុះបញ្ជីនៅក្រសួងសាធារណការ និងដឹកជញ្ជូនចំនួន ២៣២៧ គ្រឿង ក្នុងនោះរថយន្តអគ្គិសនីរបស់ក្រុមហ៊ុន BYD ចំនួន ៧៩០គ្រឿងឈរលើកំពូលតារាង និងបន្តបន្ទាប់ដោយរថយន្តអគ្គិសនីរបស់ក្រុមហ៊ុនតូយ៉ូតាចំនួន ៤៤៣គ្រឿង, រថយន្តអគ្គិសនីរបស់ក្រុមហ៊ុនTeslaចំនួន២៦៩គ្រឿង និងរថយន្តអគ្គិសនីរបស់ក្រុមហ៊ុនផ្សេងៗទៀត។

នៅក្នុងរយៈពេល៩ខែឆ្នាំ២០២៣ មានរថយន្តអគ្គិសនីចុះបញ្ជីចំនួន ២០៣គ្រឿង ខណៈដែលរយៈពេលដូចគ្នានៅឆ្នាំ២០២៤ មានរថយន្តអគ្គិសនីចុះបញ្ជីចំនួន១៦៤៤ គ្រឿង ដែលមានន័យថា រថយន្តអគ្គិសនីមានសន្ទុះកើនឡើង​៧១០% ខណៈដែលទោចក្រយានកើនឡើង ៣៦៨% រីឯត្រីចក្រយានថយចុះ ១៥%។ នេះបើយោងតាមក្រសួងសារធារណកា និងដឹកជញ្ជូន៕

អត្ថបទ៖ ឡេង ដេត